Ndi Abasi Ododu ke Kpukpru Itie?

BRE

Se Bible ọdọhọde

Abasi ekeme ndikụt kpukpru n̄kpọ, onyụn̄ ekeme ndinam se enye amade ke ebiet ekededi. (Mme N̄ke 15:3; Mme Hebrew 4:13) Edi Bible ikpepke ke Abasi ododu ke kpukpru itie, m̀mê ke kpukpru n̄kpọ nte ndusụk owo ẹsidọhọde. Bible ọdọhọ ke Abasi enyene ebietidụn̄, ke enye enyene akpan itie emi enye odude.

Utọ idem emi Abasi enyenede: Abasi edi Spirit. (John 4:24) Enye enyene idem emi owo mîkemeke ndikụt. (John 1:18) Mbon emi Abasi okowụtde idem ke n̄kukụt emi ẹwetde ke Bible, ẹma ẹkụt ke enyene itie emi enye odude. Idụhe owo mmọ emi ọdọhọde ke ikokụt enye ke kpukpru itie.—Isaiah 6:1, 2; Ediyarade 4:2, 3, 8.
Itie emi Abasi odude: Abasi odụn̄ ke ebiet emi enyịn owo mîkemeke ndikụt. Ke n̄kan̄ oro, Abasi enyene ebietidụn̄ emi Bible okotde heaven. (1 Ndidem 8:30) Bible ọdọhọ ke enyene usen emi mme angel ẹkedụkde “ẹdida ke itie mmọ ke iso Jehovah.” a Emi owụt ke idem ke heaven oro, ke Abasi enyene ebiet emi enye esitiede.—Job 1:6.

Ndi Abasi ekeme ndidu ke itie kiet nse mban̄a mi?

Ih, ekeme. Abasi ama kpukpru nnyịn owo kiet kiet. Kpa ye oro Abasi odude ke heaven, enye esikụt kpukpru mbon oro ẹmade enye, ẹnyụn̄ ẹmade ndinam se enye ọdọhọde; enye esinyụn̄ an̄wam mmọ. (1 Ndidem 8:39; 2 Chronicle 16:9) Yak ise se iwụtde ke Jehovah ama mbon oro ẹnamde n̄kpọ esie ke ofụri esịt:

Ke ini afo ọbọn̄de akam: Jehovah ekeme ndikop akam emi afo ọbọn̄de ọkpọkọm idaha idahaoro.—2 Chronicle 18:31.
Ke ini esịt etịmerede fi: “Jehovah emekpere mmọ eke esịt obụn̄ọde; enye onyụn̄ anyan̄a mmọ eke spirit mmọ anuahade.”—Psalm 34:18.
Ke ini oyomde un̄wam: Jehovah ayada Ikọ esie, Bible, ‘anam fi enyene ikike onyụn̄ eteme fi usụn̄ eke afo edisan̄ade.’—Psalm 32:8.

Se mme owo ẹsitịn̄de ẹban̄a Abasi ndidu ke kpukpru itie

Se mme owo ẹsitịn̄de: Abasi ododu ke kpukpru itie m̀mê ke kpukpru n̄kpọ.

Akpanikọ: Abasi idụn̄ke ke isọn̄ m̀mê ke ebiet ekededi emi enyịn owo ekemede ndikụt. (1 Ndidem 8:27) Imọdiọn̄ọ ke ntantaọfiọn̄ ye nsio nsio n̄kpọ ke enyọn̄ ye isọn̄ ke “ẹbụk ubọn̄ Abasi.” (Psalm 19:1) Edi oro iwọrọke ke Abasi odụn̄ ke mmọ. Owo ekeme ndidrọ ata ediye ndise emi ọnọde enye ubọn̄, edi oro iwọrọke ke owo oro odụn̄ ke ndise oro. Ukem ntre ke onyụn̄ edi ye Abasi. Kpa ye oro mme n̄kpọ emi enye okobotde ẹnọde enye ubọn̄, ẹnamde ẹkụt akwa odudu, ọniọn, ye ima esie, oro iwọrọke ke enye odụn̄ ke mme n̄kpọ oro.—Rome 1:20.

Se mme owo ẹsitịn̄de: Abasi ikpekemeke ndidiọn̄ọ kpukpru n̄kpọ nnyụn̄ nnyene ofụri odudu edieke enye mîdụhe ke kpukpru itie.

Akpanikọ: Abasi enyene edisana spirit, odudu esie emi anamde utom kpukpru ini. Edisana spirit emi anam Abasi ekeme nditie ke ebekpo esie ndiọn̄ọ kpukpru n̄kpọ nnyụn̄ nnam se ededi emi enye amade ini ekededi ye ke ebiet ekededi.—Psalm 139:7.

Se mme owo ẹsitịn̄de: Psalm 139:8 ọwọrọ ke Abasi ododu ke kpukpru itie m̀mê ke kpukpru n̄kpọ, sia itie oro ọdọhọ ete: “N̄kpọdọk ke enyọn̄, afo oyodu do; n̄kponyụn̄ mbri mbri mi ke Udi, sese! afo oyodu do.”

Akpanikọ: Itie N̄wed Abasi oro itịn̄ke iban̄a itie emi Abasi odude. Itie oro etịn̄ ikọ emi ẹsidade ẹwụt ke inyeneke ebiet owo okpodude yak Abasi okûkeme ndin̄wam enye.

a Bible ọdọhọ ke ata Abasi ekere Jehovah.