Ih. Edumbet Bible inan̄ emi ẹnemede mi ẹkeme ndin̄wam fi ke ini enyenede mfịna okụk man udukama isọn:

1.   Kpekpeme nte abiatde okụk. “N̄kọkibuot owo nsịnifịk itreke ndinyene ufọn, edi kpukpru owo eke ẹnamde n̄kpọ ke ibụmede iditreke ndidu ke unana.” (Mme N̄ke 21:5) Kûdi ama okokụt n̄kpọ afo edep. Tie kọk ibuot kan̄a mbemiso edepde n̄kpọ, kûdep ke ibụmede.

2.   Kûwak ndidụk isọn. “Andibọ ebuọt onyụn̄ edi ofụn andinọ ebuọt.” (Mme N̄ke 22:7) Edieke akamade owo isọn mûnyụn̄ ukemeke ndisọp nsio, neme ye owo oro akamade isọn nte edisan̄ade ekpe isọn oro. Sịn ifịk nam utom. Nam se Bible ọdọhọde owo emi akamade owo isọn anam: “Sụhọde idem, ka kọduọ owo oro ke ukot nyụn̄ kpe enye ubọk. Kûnọ enyịn fo idap baba kiet, kûnyụn̄ uyak idap baba kiet eyet enyịn fo.” (Mme N̄ke 6:1-5) Edieke enye mînyịmeke nsonso oro, ka iso ndikpe enye ubọk ke enye eyenyịme nte ini akade.

3.   Kûkere ke okụk edi kpukpru n̄kpọ. “Kûdiọk itọn̄ ubịne inyene—idiọkitọn̄ inyene ayanam itie fo ọdiọk akan akpa.” (Mme N̄ke 28:22, Contemporary English Version) Idiọkitọn̄ ye isịnenyịn esitahade owo inyụn̄ iyakke owo ama n̄kpọ Abasi.

4.   Yụhọ ye se enyenede. “Ke inyenede se idiade ye se isịnede ye itie udakibuot, nnyịn iyoyụhọ ye mme n̄kpọ emi.” (1 Timothy 6:8) Okụk inamke owo okop inemesịt. Ndusụk mbon emi ẹkopde inemesịt ẹkan ke ererimbot emi idịghe mme imọ owo. Se isinamde esịt enem mmọ edi ke mmọ ẹdi ufan Abasi, ndinyene nti ubon nnyụn̄ nnyene nti ufan.—Mme N̄ke 15:17; 1 Peter 5:6, 7.