1 Ndidem 5;1-18
5 Ndien Hiram+ edidem Tyre+ osio mme isụn̄utom+ esie ọdọn̄ ete ẹka ọtọ Solomon, koro enye okokopde ete ke ẹma ẹyet enye aran nte edidem ndida itie ete esie; koro Hiram ama esima David.+
2 Mmọdo Solomon ọdọn̄ ẹkedọhọ Hiram ẹte:+
3 “Afo emetịm ọfiọk ete ke David ete mi ikekemeke ndibọp ufọk nnọ enyịn̄ Jehovah Abasi esie ke ntak ekọn̄+ emi enye ekesin̄wanade ye mbon oro ẹkekande enye ẹkụk, tutu Jehovah ada mmọ enịm enye ke idak ikpat.
4 Ndien, ke emi, Jehovah Abasi mi ọmọnọ mi nduọkodudu akanade.+ Baba owo kiet eke ọbiọn̄ọde mi idụhe, idiọkn̄kpọ baba kiet inyụn̄ itịbeke.+
5 Ndien, sese, ami mmekere ndibọp ufọk nnọ enyịn̄ Jehovah Abasi mi,+ kpa nte Jehovah ọkọn̄wọn̄ọde ọnọ David ete mi, ete, ‘Eyen fo emi ndidoride ke ebekpo ke itie fo edibọp ufọk ọnọ enyịn̄ mi.’+
6 Ndien, ke emi, wụk ete ẹkpen̄e cedar eke ẹtode Lebanon+ ẹnọ ẹsọk mi; mme asan̄autom mi ẹyenyụn̄ ẹdu ye mme asan̄autom fo, ndien ami nyekpe mme asan̄autom fo se afo edidọhọde n̄kpe, koro afo emetịm ọfiọk ete ke idụhe mbon emi ẹfiọkde ndikpen̄e eto ke otu nnyịn nte mbon Sidon.”+
7 Edikem ke ndondo oro Hiram+ okopde ikọ Solomon emi, enye adat esịt etieti, onyụn̄ ọdọhọ ete: “Itoro+ enyene Jehovah mfịn emi koro enye ọnọde David eyen emi enyenede ọniọn̄+ ete akara utọ ediwak owo emi!”+
8 Ntem Hiram ọdọn̄ utom ọnọ Solomon ete: “Mmokop utom emi afo ọdọn̄de ọnọ mi. Ami nyanam kpukpru se afo oyomde kaban̄a eto cedar ye eto juniper.+
9 Mme asan̄autom mi ẹyesion̄o mmọ ke Lebanon+ ẹsụhọde ẹdi inyan̄; ndien ami nyọbọp ikpọ ekpat eto oro nnyụn̄ nnam mmọ ẹfiọrọ ẹka ọtọ emi afo edidọhọde mi;+ nyonyụn̄ nnam ẹsiak mmọ do, afo oyonyụn̄ obiom mmọ; ndien se afo edinamde enem mi esịt edi ndinọ mbonufọk mi udia.”+
10 Ntre ke Hiram ọnọ Solomon kpukpru eto cedar ye eto juniper nte enye oyomde.
11 Ndien Solomon ọnọ Hiram cor+ wheat tọsịn edịp nte udia mbonufọk esie ye cor aran edịp emi ẹnyịmide-nyịmi.+ Se Solomon ekesinọde Hiram edi oro ke isua ke isua.+
12 Ndien Jehovah ọnọ Solomon ọniọn̄ kpa nte enye ọkọn̄wọn̄ọde ọnọ enye;+ ndien emem odu ke ufọt Hiram ye Solomon, mmọ mbiba ẹnyụn̄ ẹdụk ediomi.
13 Ndien Edidem Solomon osion̄o mbon emi ẹnyịkde ẹnam ọkpọsọn̄ utom+ ke ofụri Israel; ndien mmọ ẹwak ẹsịm owo tọsịn edịp ye duop.
14 Enye onyụn̄ abahade mmọ ọdọn̄ ke mme otu emi kiet kiet esịnede owo tọsịn duop ndinam utom ke Lebanon ke ọfiọn̄ kiet. Ndien mmọ ẹdu ke Lebanon ọfiọn̄ kiet ẹnyụn̄ ẹdu ke ufọk mmọ ọfiọn̄ iba;+ ndien Adoniram+ ese aban̄a mbon emi ẹnyịkde+ ẹnam ọkpọsọn̄ utom.+
15 Ndien Solomon enyene+ mme obiom mbiomo+ tọsịn ata ye duop ye mme asiak-itiat+ ke obot+ owo tọsịn anan̄,
16 owo isịnke mbọn̄ mme adaidaha+ emi Solomon ẹkemekde ndise mban̄a utom, kpa mme etubom+ utom tọsịn ita ikie ita emi ẹkesede ẹban̄a mbon oro ẹsịnde idem ẹnam utom.
17 Ntem edidem owụk ete mmọ ẹdọk ikpọ itiat, mme ọsọn̄urua itiat,+ man ẹda itiat emi ẹsọide-sọi+ ẹsịn itiat idakisọn̄+ ufọk.
18 Ntre ke ikọt Solomon emi ẹdide mme ọbọp ufọk ye ikọt Hiram emi ẹdide mme ọbọp ufọk ye mbon Gebal+ ẹsiak itiat, mmọ ẹnyụn̄ ẹtịm mme eto ye mme itiat ndida mbọp ufọk.
