Mme N̄ke 26;1-28
26 Nte snow ke ini ndaeyo ye nte edịm ke ini ukpen̄e,+ ntre ke ubọn̄ mîdotke ye ndisịme owo.+
2 Kpa nte inuen enyenede ntak ndife, nte akadan̄abasi onyụn̄ enyenede ntak ndife, kpasụk ntre ke isụn̄i mîsịmke owo ke akpan ntak mîdụhe.+
3 Ikpa enyene enan̄-mbakara,+ n̄kpahainua+ enyene ass, eto onyụn̄ enyene edem mbon ndisịme.+
4 Kûbọrọ ndisịme owo usịn ke ebiọ esie, mbak afo n̄ko udubiet enye.+
5 Bọrọ ndisịme owo sịn ke ebiọ esie, mbak enye edikụt idemesie nte owo ọniọn̄.+
6 Owo eke ayakde n̄kpọ esịn ndisịme owo ke ubọk etie nte owo emi esịbede ikpat esie efep ye nte owo eke ọn̄wọn̄de afai.+
7 Nte ukot mbụn̄ọ ekeme ndisụhọde n̄kokoi mmọn̄? Do, n̄ke odu ke inua mbon ndisịme.+
8 Owo eke ọnọde ndisịme owo ubọn̄ etie nte owo eke obụkde itiat ke ebok itiat.+
9 Nte mbaraekpe etiede ke ubọk akpammịn, ntre ke n̄ke etie ke inua mbon ndisịme.+
10 Owo eke ekpede ndisịme+ owo utom m̀mê ekpede mmọ eke ẹsan̄ade ẹbe utom ebiet otop-utịgha emi ekịmde kpukpru n̄kpọ.
11 Kpa nte ebua afiakde akadia ikpọhi esie, ndisịme owo afiak anam ebiọ esie.+
12 Nte afo omokụt owo emi okụtde idem ke owo ọniọn̄?+ Ndisịme owo enyene idotenyịn akan enye.+
13 Ifu ọdọhọ ete: “Abak ekpe do ke usụn̄, ekpe odu ke an̄wa obio.”+
14 Usụn̄ ọwọn̄ọde ke afaraikụt, ifu onyụn̄ ọwọn̄ọde ke n̄kpana esie.+
15 Ifu obụk ubọk esie ke usan udia; ndien akak enye ndifiak nda enye n̄ka inua.+
16 Ifu okụt idemesie ke owo ọniọn̄+ akan owo itiaba emi ẹdade eti ibuot ẹnọ ibọrọ.
17 Owo ekededi eke asan̄ade ebe, ndien ofụt esịt ke utọk eke mîdịghe esiemmọ, etie nte owo eke omụmde ebua utọn̄.+
18 Kpa nte idat otopde enyịm ikan̄,+ idan̄ ye n̄kpa,
19 ntre ke edi ye owo eke ebrede ekemmọ owo n̄kari ndien ọdọhọ ete: “Nte n̄kanamke mbubru?”+
20 Ke ini ifia okụrede ikan̄ enịme, ndien ke ini owo edidọk mîdụhe utọk odobo.+
21 Nte ukan̄ enyenede mbubek ikan̄, ifia onyụn̄ enyenede ikan̄, ntre ke owo utọk anam utọk+ obụbede.
22 Ikọ owo edidọk etie nte n̄kpọ eke ẹmende ke en̄weme, emi osụhọrede odụk ata esịt idịbi.+
23 Nneminua eke asan̄ade ye esịt ibak ebiet ubak usiọn̄ eke ẹdade silver ẹbana.+
24 Asua ada n̄kpọkinua esie anam ẹkûdiọn̄ọ enye, edi edịp abian̄a ke esịt esie.+
25 Okposụkedi emi enye anamde uyo ikọ esie enem,+ kûnịm enye ke akpanikọ,+ koro mbubiam n̄kpọ itiaba+ ẹdude enye ke esịt.
26 Abian̄a edịp usua. Idiọkido esie ayayarade ke otu mbon esop.+
27 Owo eke etịbide obube ọyọduọ odụk ke esịt,+ owo eke onyụn̄ ewerede itiat efep, itiat oro ayafiak ewere ebịne enye.+
28 Edeme nsu asasua owo emi enye ọnọmọde,+ nneminua onyụn̄ akama nsobo.+
