Mme N̄ke 5;1-23
5 Eyen mi, kpan̄ utọn̄ ke ọniọn̄+ mi. Biọn̄ utọn̄ fo ke mbufiọk+ mi,
2 man ekpeme ukeme ukere n̄kpọ fo;+ yak n̄kpọkinua fo ekpeme ifiọk.+
3 Koro n̄kpọkinua esen an̄wan ọtọide nte obukpa ọkwọk,+ nsịn̄ esie onyụn̄ ọdọnọ akan aran.+
4 Edi utịp esie odoro nte etidot ekpe;+ ọsọp nte akan̄kan̄ iso iba.+
5 Ukot esie osụhọde aka n̄kpa.+ Ikpat esie aka Udi.*+
6 Enye ikereke usụn̄ uwem.+ Ikpat esie oyoyo, enye ifiọkke ebiet eke enye akade.+
7 O nditọ, ke emi, ẹkpan̄ utọn̄ ẹnọ mi+ ẹkûnyụn̄ ẹwọn̄ọde ẹkpọn̄ ikọ inua mi.+
8 Du anyan usụn̄ kpọn̄ enye, kûnyụn̄ usan̄a ukpere enyịnusụn̄ ufọk esie,+
9 mbak afo udunọ mbon efen uku fo,+ udunyụn̄ uda mme isua fo unọ mfiomo;+
10 mbak isenowo ẹdida odudu fo ẹyụhọ idemmọ,+ mme n̄kpọ emi afo ọkọbọde ufen ke esịt ẹdinyụn̄ ẹdu ke ufọk owo esenidụt,+
11 mbak afo udutua ke ini iso+ ke ini obụkidem fo ye ofụri idem fo ẹsịmde utịt.+
12 Ndien afo ọyọdọhọ ete: “Sese nte n̄kasuade ntụnọ,+ esịt mi okonyụn̄ esede nsuannọ ke ndek!+
13 Ami n̄konyụn̄ n̄kpan̄ke utọn̄ ke uyo mme anditeme mi,+ n̄konyụn̄ nnọhọ mme andikpep mi utọn̄.+
14 Ke mbuari, mmedidụk kpukpru orụk idiọkn̄kpọ+ ke otu esop.”+
15 N̄wọn̄ mmọn̄ ke obube udọn̄ mmọn̄ fo, ye mmọn̄ emi otode idịm fo ọwọrọ.+
16 Nte idịm fo akpasiaha ke an̄wa,+ idịm mmọn̄ fo okponyụn̄ ewet ke an̄wa obio?
17 Yak mmọ ẹdi okwo ikpọn̄, ẹkûdi eke isenowo emi ẹdude ye afo.+
18 Yak ọfọn ọnọ obube mmọn̄ fo,+ nyụn̄ dara ye n̄wan uyen fo,+
19 ediye uman edop, ediye okoyo.*+ Yak eba esie enem fi kpukpru ini.+ Yak ima esie osụk adat fi esịt.+
20 Ntre, eyen mi, ntak emi esen an̄wan akpadatde fi esịt, mîdịghe ntak emi akpafatde ikpanesịt an̄wan esenidụt?+
21 Koro usụn̄ owo anade in̄wan̄ ke enyịn Jehovah,+ enye onyụn̄ odụn̄ọde ofụri usụn̄ esie.+
22 Ndudue idiọkowo oyoyom enye okụt,+ urụk idiọkn̄kpọ esie oyonyụn̄ ọbọp enye.+
23 Enye edikpa ke ntak unana ntụnọ,+ koro enye awahade ọkpọn̄ usụn̄ ke uwak ndisịme esie.+
