Exodus 40;1-38
40 Ekem Jehovah ọdọhọ Moses ete:
2 “Ke akpa usen, ke akpa ọfiọn̄,+ afo enyene ndiwụk tent utuakibuot, oro edi, tent usopidem.+
3 Ndien nịm ekebe ntiense+ do nyụn̄ kọn̄ ikpehe+ kwi Ekebe oro.
4 Ndien afo enyene ndinịm okpokoro+ nnyụn̄ ndori se ẹkpedoride ke esịt, afo onyụn̄ enyene ndidiọk uwụk utuenikan̄+ nnyụn̄ ndomo mme utuenikan̄ esie.+
5 Nyụn̄ nịm itieuwa ufọp incense oro ẹnamde ke gold+ ke iso ekebe ntiense nyụn̄ kọn̄ ọfọn̄ enyịnusụn̄ tent utuakibuot.+
6 “Nyụn̄ nịm itieuwa emi ẹsiwade edifọp uwa+ ke iso enyịnusụn̄ tent utuakibuot, oro edi, tent usopidem,
7 nyụn̄ nịm besịn ke ufọt tent usopidem ye itieuwa nyụn̄ dọn̄ mmọn̄ ke esịt.+
8 Nyụn̄ nam okụre+ kanade nyụn̄ kọn̄ ọfọn̄ enyịnusụn̄+ inuaotop okụre.
9 Nyụn̄ da aran oro ẹsidade ẹyet owo+ yet ke tent utuakibuot ye ke kpukpru se idude ke esịt,+ nyụn̄ nam enye ye kpukpru n̄kpoduoho esie ẹsana, ndien enye ayakabade edi edisana.
10 Nyụn̄ yet aran ke itieuwa emi ẹsiwade edifọp uwa ye kpukpru n̄kpoduoho esie, nyụn̄ nam itieuwa asana,+ ndien enye ayakabade edi ata edisana itieuwa.+
11 Nyụn̄ yet aran ke besịn ye ke n̄kpọ udori besịn nyụn̄ nam enye asana.
12 “Ekem da Aaron ye nditọiren esie san̄a kpere enyịnusụn̄ tent usopidem nyụn̄ yet mmọ mmọn̄.+
13 Nyụn̄ nọ Aaron ndisana ọfọn̄+ oro esịne nyụn̄ yet enye aran+ nyụn̄ nam enye asana, ndien enye ayanam utom nte oku ọnọ mi.
14 Ekem da nditọiren esie san̄a kpere nyụn̄ nọ mmọ ewụra ẹsịne.+
15 Nyụn̄ yet mmọ aran kpa nte ekeyetde ete mmọ,+ ndien mmọ ẹyenam utom nte mme oku ẹnọ mi, ndien aran emi ediyetde mmọ ayanam mmọ ẹdu ke itie oku ke nsinsi ke ofụri emana mmọ.”+
16 Ndien Moses anam kpukpru se Jehovah eketemede enye.+ Enye anam kpa ntre.
17 Ekem ke akpa ọfiọn̄, ke ọyọhọ isua iba, ke akpa usen ke ọfiọn̄ oro, ẹwụk tent utuakibuot emi.+
18 Ke ini Moses owụkde tent utuakibuot emi, enye ọtọn̄ọ ke ndibon etak+ nnyụn̄ n̄wụk obubọk+ esie nnyụn̄ ndọn̄ mbiọn̄ eto+ nnyụn̄ n̄wụk mme adaha esie.+
19 Ekem enye atat ọfọn̄ tent+ ofụk tent utuakibuot oro onyụn̄ ada ufụkn̄kpọ+ ofụk ke enyọn̄ esie, kpa nte Jehovah eketemede Moses.
20 Ekem enye emen Ntiense+ esịn ke Ekebe+ onyụn̄ ọdọn̄ nnyan eto+ ke Ekebe oro ndien ekịbi okukịp+ ke Ekebe oro.+
21 Ekem enye emen Ekebe oro enịm ke tent utuakibuot onyụn̄ eyịri ikpehe+ ekwi ekebe ntiense,+ kpa nte Jehovah eketemede Moses.
22 Ekem enye enịm okpokoro+ ke tent usopidem ke n̄kan̄ tent utuakibuot emi esede edem edere ke iso ikpehe oro,
23 onyụn̄ atan̄ uyo+ odori ke iso Jehovah, kpa nte Jehovah eketemede Moses.
24 Ndien enye enịm uwụk utuenikan̄+ ke tent usopidem ke iso okpokoro, ke n̄kan̄ tent utuakibuot emi esede edem usụk.
25 Enye onyụn̄ odomo mme utuenikan̄+ emi ke iso Jehovah, kpa nte Jehovah eketemede Moses.
26 Ekem enye enịm itieuwa oro ẹnamde ke gold+ ke tent usopidem ke iso ikpehe oro,
27 man enye ọfọp edifuọn̄ incense do,+ kpa nte Jehovah eketemede Moses.
28 Ekem enye eyịri ọfọn̄ enyịnusụn̄+ ke inuaotop tent utuakibuot ke itie esie.
29 Ndien enye enịm itieuwa emi ẹsiwade edifọp uwa+ ke enyịnusụn̄ tent utuakibuot, oro edi, tent usopidem, man enye awa edifọp uwa+ ye uwa n̄kpasịp do, kpa nte Jehovah eketemede Moses.
30 Ekem enye enịm besịn ke ufọt tent usopidem ye itieuwa onyụn̄ ọdọn̄ mmọn̄ ke esịt ndida nyet ubọk ye ukot.+
31 Ndien Moses ye Aaron ye nditọiren esie ẹyet ubọk ye ukot mmọ do.
32 Ke ini mmọ ẹdụkde tent usopidem ye ke ini mmọ ẹsan̄ade ẹkpere itieuwa, mmọ ẹyeyet ubọk ye ukot do,+ kpa nte Jehovah eketemede Moses.
33 Ke akpatre enye anam okụre+ akanade tent utuakibuot ye itieuwa onyụn̄ eyịri ọfọn̄ enyịnusụn̄ inuaotop okụre.+
Ntem ke Moses anam utom emi ama.
34 Ndien obubịt enyọn̄+ ọtọn̄ọ ndifụk tent usopidem, ubọn̄ Jehovah onyụn̄ ọyọhọ ke tent utuakibuot emi.
35 Ndien Moses ikemeke ndidụk tent usopidem, koro obubịt enyọn̄+ odude ke enyọn̄ esie, ubọn̄ Jehovah onyụn̄ ọyọhọde tent utuakibuot oro.+
36 Ke ini obubịt enyọn̄ adahade ọkpọn̄ enyọn̄ tent utuakibuot oro, nditọ Israel ẹdaha isan̄ ke kpukpru ikpehe isan̄ mmọ.+
37 Edi edieke obubịt enyọn̄ mîdahake, mmọ inyụn̄ idahake isan̄ tutu esịm usen emi enye adahade.+
38 Koro obubịt enyọn̄ Jehovah okodude ke enyọn̄ tent utuakibuot ke uwemeyo, ikan̄ onyụn̄ odu ke okoneyo ke iso ofụri ufọk Israel ke kpukpru ikpehe isan̄ mmọ.+
