Genesis 29;1-35
29 Ke oro ebede, Jacob anam isan̄ aka idụt mbon Edem Usiahautịn.+
2 Ndien enye emenede enyịn ese onyụn̄ okụt obube mmọn̄ ke in̄wan̄, otuerọn̄ ita ẹnyụn̄ ẹna ẹkpere obube mmọn̄ oro, koro do ke ẹkesikoi mmọn̄ ẹnọ mme erọn̄ ẹn̄wọn̄;+ akamba itiat onyụn̄ okụbọ ke inua obube mmọn̄ oro.+
3 Ndien ke adan̄aemi kpukpru otuerọn̄ ẹdide ẹdisịm do, mme ekpemerọn̄ ẹyekpat itiat oro ẹsio ke inua obube mmọn̄ oro, ẹnyụn̄ ẹnọ mme erọn̄ mmọn̄ ẹn̄wọn̄, ndien ekem ẹyefiak ẹkpat itiat ẹkịbi ke inua obube mmọn̄ oro.
4 Ntre Jacob obụp mmọ ete: “Nditọete mi, mbufo ẹto m̀mọ̀n̄?” ndien mmọ ẹbọrọ ẹte: “Nnyịn ito Haran.”+
5 Ndien enye obụp mmọ ete: “Nte mbufo ẹmediọn̄ọ Laban,+ eyeyen Nahor?”+ mmọ ẹbọrọ ẹte: “Ih, nnyịn imọdiọn̄ọ enye.”
6 Ekem enye obụp mmọ ete: “Nte idem ọsọn̄ enye?”+ Mmọ ẹbọrọ ẹte: “Ih, idem ọsọn̄ enye. Se Rachel,+ eyen esie, asan̄ade ye mme erọn̄ ko edi!”+
7 Ndien enye ọdọhọ ete: “Kamse, ufọt uwemeyo edi emi. Ini ikemke kan̄a nditan̄ mme erọn̄ mbon ọtọkiet. Ẹnọ mme erọn̄ mmọn̄ ẹn̄wọn̄ ẹnyụn̄ ẹda mmọ ẹka man ẹketa mbiet.”+
8 Ndien mmọ ẹdọhọ ẹte: “Nnyịn isinamke ntre ibọhọke kpukpru otuerọn̄ ẹdisịm ndien ẹkpat itiat ẹsio ke inua obube mmọn̄. Ndien nnyịn inọ mme erọn̄ mmọn̄ ẹn̄wọn̄.”
9 Ke adan̄aemi enye osụk etịn̄de ikọ ye mmọ, Rachel+ asan̄a ye erọn̄ ete esie edisịm, koro enye ekedide ekpemerọn̄.+
10 Edi ke ini Jacob okụtde Rachel, eyen Laban, eyeneka eka esie ye erọn̄ Laban, eyeneka eka esie, Jacob asan̄a ekpere onyụn̄ akakpat itiat osio ke inua obube mmọn̄ oro, onyụn̄ ọnọ erọn̄ Laban, eyeneka eka esie, mmọn̄ ẹn̄wọn̄.+
11 Ekem Jacob etịm Rachel inua+ onyụn̄ emenede uyo atua eyet.+
12 Ndien Jacob asian Rachel ete ke imọ idi eyeneka+ ete esie, eyen Rebekah. Ndien eyenan̄wan emi efehe eketịn̄ ọnọ ete esie.+
13 Edikem ke ndondo oro Laban okopde n̄kpọ aban̄a Jacob, eyen eyeneka esie an̄wan, enye efehe okosobo ye enye,+ afat enye onyụn̄ etịm enye inua onyụn̄ ada enye ọnyọn̄ ufọk esie.+ Ndien enye ọtọn̄ọ nditịn̄ kpukpru n̄kpọ emi nnọ Laban.
14 Ekem Laban ọdọhọ enye ete: “Afo edi ọkpọ mi ye obụk mi.”+ Ntre Jacob odụn̄ ye enye ke ọfiọn̄ kiet.
15 Ekem Laban obụp Jacob ete: “Afo edi eyeneka mi,+ ndien nte afo edisan̄a utom ọnọ mi ke ikpîkpu?+ Sian mi, Nso ididi utịp utom fo?”+
16 Laban ama enyene nditọiban iba. Adiaha ekekere Leah+ ndien udun̄wan ekere Rachel.
17 Enyịn Leah ikayamake, edi Rachel+ ama eye idem onyụn̄ eye iso.+
18 Ndien Jacob ama Rachel. Ntre enye ọdọhọ ete: “Nyasan̄a utom nnọ fi isua itiaba ke ibuot Rachel, udun̄wan fo.”+
19 Ndien Laban ọdọhọ ete: “Ọfọn ami ndida enye nnọ fi akan ndida enye nnọ owo efen. Ka iso dụn̄ ye ami.”+
20 Ndien Jacob asan̄a utom isua itiaba ke ibuot Rachel,+ edi mme isua oro ẹketie nte ekpri ini ke enyịn esie sia enye amade eyenan̄wan oro.+
21 Ekem Jacob ọdọhọ Laban ete: “Nọ mi n̄wan mi, koro ini mi ekem, man nnyene ebuana ye enye.”+
22 Ntre Laban okot kpukpru owo ke ebiet oro onyụn̄ anam usọrọ.+
23 Edikem ke mbubreyo enye ada Leah, adiaha esie, ọsọk enye man enyene ebuana ye enye.
24 Laban onyụn̄ ada Zilpah,+ ofụn esie, ọnọ Leah, adiaha esie, nte ofụn an̄wan.
25 Edikem ke usenubọk enye okụt ete ke ekedi Leah! Ndien enye ọdọhọ Laban ete: “Nso ke anam mi ntem? Nte idịghe ke ibuot Rachel ke n̄kasan̄a utom nnọ fi? Ntak emi ebrede mi n̄kari?”+
26 Edi Laban ọdọhọ ete: “Owo isinamke ntre ke edem nnyịn, ndinọ udun̄wan ndọ mbemiso adiaha.
27 Nịm usọrọ+ an̄wan emi yọhọ ke urua kiet. Ndien ekem ẹyenọ fi n̄wan enye eken ke utom emi afo edisan̄ade ọnọ mi ke isua itiaba efen.”+
28 Ndien Jacob anam ntre onyụn̄ enịm usọrọ an̄wan oro ọyọhọ ke urua kiet, ekem Laban ọnọ enye Rachel, udun̄wan esie nte n̄wan esie.
29 Laban onyụn̄ ada Bilhah,+ ofụn an̄wan esie, ọnọ Rachel, udun̄wan esie, nte ofụn an̄wan.
30 Ndien enye enyene ebuana ye Rachel n̄ko onyụn̄ ama Rachel akan Leah,+ ndien enye asan̄a utom ọnọ enye ke isua itiaba efen.+
31 Ke adan̄aemi Jehovah okụtde ete ke ẹsua Leah, enye esịrede enye itie eyen,+ edi Rachel edi ada.+
32 Ndien Leah oyomo onyụn̄ aman eyeneren ndien osio enye enyịn̄ Reuben,+ koro enye ọdọhọde ete: “Koro Jehovah emese ukụt mi,+ ke emi ebe mi ọyọtọn̄ọ ndima mi.”
33 Ndien enye ọtọn̄ọ ntak oyomo onyụn̄ aman eyeneren ndien ọdọhọ ete: “Edi koro Jehovah amakpan̄ utọn̄,+ sia ẹsuade mi ndien enye ọnọ mi enye emi n̄ko.” Ntre enye osio enye enyịn̄ Simeon.+
34 Ndien enye ọtọn̄ọ ntak oyomo onyụn̄ aman eyeneren ndien ọdọhọ ete: “Ke emi ebe mi ayadiana ye ami, koro mmaman nditọiren ita nnọ enye.” Ndien ẹsio enye enyịn̄ Levi.+
35 Ndien enye ọtọn̄ọ ntak oyomo onyụn̄ aman eyeneren ndien ọdọhọ ete: “Ke emi nyotoro Jehovah.” Ntre enye osio eyen oro enyịn̄ Judah.+ Ke oro ebede enye etre uman kan̄a.
