Judges 15;1-20
15 Edikem ke ndusụk ini ama ekebe, ke ini ukpen̄e wheat, Samson akama eyen ebot+ aka ndise n̄wan esie. Enye onyụn̄ ọdọhọ ete: “Mmọn̄ ndụk mbịne n̄wan mi ke esịt ubet.”+ Ndien ete n̄wan esie inyịmeke enye odụk.
2 Edi ete n̄wan esie ọdọhọ enye ete: “Ami n̄kekere nte, ‘Afo asasua enye.’+ Oro akanam nda enye nnọ mbet+ ndọ fo. Nte ekpri eyeneka esie an̄wan ifọnke ikan? Mbọk, kabade da enye oro utu ke enye eken.”
3 Edi Samson ọdọhọ mmọ ete: “Esịt idibiomke mi isan̄ emi iban̄a mbon Philistia edieke nnamde mmọ idiọk.”+
4 Ntre Samson adaha okomụm ebuaikọt+ ikie ita onyụn̄ omụm isịm kiet eyịri ye eken ndien ada nsadan̄ ikan̄ kiet esịn ke ufọt isịm mbiba.
5 Ndien enye odomo ikan̄ ke nsadan̄ oro onyụn̄ ebịn mme ebuaikọt oro ọdọn̄ ke in̄wan̄ wheat* mbon Philistia. Ntre ke enye esịn ikan̄ ke kpukpru n̄kpọ ọtọn̄ọde ke wheat emi ẹbonde ke ebek tutu esịm mmọ eke owo mîkpen̄eke kan̄a, esịn ikan̄ ke in̄wan̄ vine ye in̄wan̄ olive.+
6 Ndien mbon Philistia ẹbụp ẹte: “Anie anam n̄kpọ emi?” Mmọ ẹbọrọ ẹte: “Edi Samson, ebe eyen owo Timnah, koro enye ọkọbọde enye n̄wan ọnọ mbet+ ndọ esie.” Ntem mbon Philistia ẹdọk ẹka ẹkefọp n̄wan emi ye ete esie ke ikan̄.+
7 Ekem Samson ọdọhọ mmọ ete: “Edieke mbufo ẹnamde ntem, n̄kpọ efen idụhe ndinam n̄kan ndisio mbufo usiene,+ ndien mma nsio mma, nyetre.”
8 Ndien enye owot mmọ ọkwọkudịm, okpok mmọ ukot ye ifụhi obok ọtọkiet, ekem enye osụhọde aka okodụn̄ ke aba akwa itiat Etam.+
9 Ekem mbon Philistia+ ẹdọk ẹdi ẹdinam nna ke Judah+ ẹnyụn̄ ẹkpọrọde ẹsan̄a ke Lehi.+
10 Ndien mbon Judah ẹbụp ẹte: “Nso inam mbufo ẹdide ndin̄wana ye nnyịn?” ndien mmọ ẹbọrọ ẹte: “Nnyịn idi man ibọp Samson, inyụn̄ inam ye enye kpa nte enye akanamde ye nnyịn.”
11 Ndien irenowo Judah tọsịn ita ẹsụhọde ẹka aba akwa itiat Etam+ ẹkebụp Samson ẹte: “Ndi udiọn̄ọke ke mbon Philistia ẹkara nnyịn?+ Nso ke afo anam ntem ye nnyịn?” Ndien enye ọbọrọ mmọ ete: “Ami n̄kanam ye mmọ kpa nte mmọ ẹkenamde ye ami.”+
12 Edi mmọ ẹdọhọ enye ẹte: “Nnyịn isụhọde idi ndibọp fi nyak nsịn mbon Philistia ke ubọk.” Ndien Samson ọdọhọ mmọ ete: “Mbufo ẹn̄wọn̄ọ ẹnọ mi ẹte ke mbufo idiwotke mi.”
13 Ndien mmọ ẹdọhọ enye ẹte: “Baba-o, nnyịn idibọbọp fi kpọt, ndien iyak isịn mmọ ke ubọk; edi nnyịn idiwotke fi.”
Ntre mmọ ẹda mbufa urụk+ iba ẹbọp enye ẹnyụn̄ ẹsio enye ke aba akwa itiat oro.
14 Enye onyụn̄ edisịm Lehi, mbon Philistia ẹnyụn̄ ẹkpọk ukịbe ke ini ẹsobode ye enye.+ Ndien spirit Jehovah+ edidoro enye ke idem, mme urụk oro ẹkedade ẹbọp enye ubọk ẹkabade ẹtie nte urụk ndidi oro ẹn̄wande ke ikan̄,+ mme ebuka emi ẹkedọn̄de enye ke ubọk ẹtara ẹwọn̄ọ.
15 Ndien enye emenede enyịn okụt obufa ọkpọ mban̄ ayara ass onyụn̄ anyan ubọk emen, ada owot irenowo tọsịn kiet.+
16 Ndien Samson ọdọhọ ete:
“Nda ọkpọ mban̄ ayara ass—n̄kịbi ebok kiet, ebok iba!
Nda ọkpọ mban̄ ayara ass n̄wot owo tọsịn kiet.”+
17 Edikem ke ndondo oro enye etịn̄de ikọ okụre, enye otop ọkpọ mban̄ oro ke ubọk esie ọduọk onyụn̄ osio ebiet oro enyịn̄ Ramath-lehi.+
18 Ndien itọn̄ asat enye etieti, enye onyụn̄ eseme ọnọ Jehovah ete: “Edi afo ọnọ asan̄autom+ fo utọ akwa edinyan̄a emi, ndien, sese, nsatitọn̄ ọmọn̄ owot mi, nte ndinyụn̄ nduọ ke ubọk mbon edụt emi?”+
19 Ndien Abasi asiak odudu emi ebietde udụn̄ ke Lehi, mmọn̄+ oto do ọwọrọ, enye onyụn̄ ọn̄wọn̄, ndien spirit+ esie afiak edemede, enye onyụn̄ afiak okop odudu.+ Ntak edi oro enye osiode ebiet oro enyịn̄ Enhakkore, emi odude ke Lehi tutu esịm mfịn emi.
20 Ndien enye ekpe ikpe Israel ke eyo mbon Philistia ke isua edịp.+
Mme Ikọ Idakisọn̄
^ Mîdịghe, emi ekeme ndidi “barley.”
