Leviticus 8;1-36
8 Ndien Jehovah ọdọhọ Moses ete:
2 “Da Aaron ye nditọiren esie+ ye mme ọfọn̄+ oro ye aran oro ẹsidade ẹyet owo+ ye ayara enan̄ uwa idiọkn̄kpọ+ ye okukịm erọn̄ iba ye akpasa uyo eke leaven mîdụhe,+
3 nyụn̄ nam ofụri esop ẹsop idem+ ke enyịnusụn̄ tent usopidem.”+
4 Ekem Moses anam kpa nte Jehovah okowụkde enye, ofụri esop ẹnyụn̄ ẹsop idem ke enyịnusụn̄+ tent usopidem.
5 Ndien Moses ọdọhọ ofụri esop ete: “Ntem ke Jehovah owụk ete ẹnam.”+
6 Ntre Moses ada Aaron ye nditọiren esie asan̄a ekpere onyụn̄ ada mmọn̄ eyet+ mmọ idem.+
7 Ekem enye esịne enye ewụra+ onyụn̄ ọbọp enye ubọpisịn+ onyụn̄ esịne enye anana-ubọk kod+ ye ephod+ onyụn̄ ọbọp enye mbọbọ+ ephod onyụn̄ etebe enye adian enye ke idem.
8 Ekem enye ọkọn̄ọ enye mbana ikpanesịt+ onyụn̄ esịn Urim ye Thummim+ ke mbana ikpanesịt oro.
9 Ndien enye ọbọp enye mbọbọ ibuot+ onyụn̄ ada nsemnsem ubak gold, kpa edisana idiọn̄ọ uyakidem nnọ,+ adian ke mbọbọ ibuot oro ke ọkpọiso esie, kpa nte Jehovah okowụkde Moses.
10 Ndien Moses ada aran oro ẹsidade ẹyet owo eyet ke tent utuakibuot+ ye ke kpukpru se idude ke esịt onyụn̄ anam mmọ ẹsana.
11 Ke oro ebede enye ada ndusụk aran oro esịme ke itieuwa utịm ikatiaba onyụn̄ ada aran eyet ke itieuwa+ ye ke kpukpru n̄kpoduoho esie ye besịn ye n̄kpọ udori besịn, man anam mmọ ẹsana.
12 Ke akpatre enye ada ndusụk aran oro ẹsidade ẹyet owo ọtọhọ Aaron ke ibuot onyụn̄ eyet enye aran man anam enye asana.+
13 Ekem Moses ada nditọiren Aaron asan̄a ekpere+ onyụn̄ esịne mmọ ewụra onyụn̄ ọbọp mmọ ubọpisịn+ onyụn̄ ayara mmọ uyaraibuot,+ kpa nte Jehovah okowụkde Moses.
14 Ekem enye ada ayara enan̄+ uwa idiọkn̄kpọ edi, ndien Aaron ye nditọiren esie ẹdori ubọk mmọ ke ibuot+ ayara enan̄ uwa idiọkn̄kpọ oro.
15 Ndien Moses owot+ ayara enan̄ oro onyụn̄ ada iyịp+ ke nnuenubọk esie eyet ke mme nnụk itieuwa akanade onyụn̄ anam itieuwa asana ọbọhọ idiọkn̄kpọ, edi enye ọduọk iyịp oro osụhọde ke ukot itieuwa, man anam enye asana onyụn̄ osio isop+ ọnọ enye.
16 Ekem Moses ada ofụri ikpọn̄ oro ofụhọde ke nsia ye ikpọn̄ oro ofụkde esịt onyụn̄ ada ekpụt mbiba ye ikpọn̄ mmọ ọfọp ke itieuwa.+
17 Ndien enye anam ẹfọp ayara enan̄ oro ye ikpa esie ye obụk esie ye ifuọ esie ke ikan̄ ke edem itienna,+ kpa nte Jehovah okowụkde Moses.
18 Ndien enye ada okukịm erọn̄ edifọp uwa asan̄a ekpere, ndien Aaron ye nditọiren esie ẹdori ubọk mmọ ke ibuot okukịm erọn̄ oro.+
19 Ekem Moses owot erọn̄ oro onyụn̄ esịme iyịp esie akanade itieuwa.+
20 Ndien Moses abak okukịm erọn̄ oro ke mbak ke mbak,+ onyụn̄ ọfọp ibuot ye mme mbak oro ye ikpọn̄ esie.
21 Enye onyụn̄ eyet nsia ye ukot ke mmọn̄, ndien Moses ọfọp ofụri okukịm erọn̄ oro ke itieuwa.+ Enye ekedi edifọp uwa man osio edinem utebe.+ Enye ekedi uwa oro ẹfọpde ke ikan̄ ẹnọ Jehovah, kpa nte Jehovah okowụkde Moses.
22 Ekem enye ada ọyọhọ okukịm erọn̄ iba, kpa okukịm erọn̄ edida owo nsịn ke itieutom,+ asan̄a ekpere, ndien Aaron ye nditọiren esie ẹdori ubọk mmọ ke ibuot okukịm erọn̄ emi.
23 Ekem Moses owot okukịm erọn̄ oro onyụn̄ ada ndusụk iyịp esie eyet ke mben utọn̄ nnasia Aaron ye ke akpan nnuenubọk nnasia esie ye ke akpan nnuenukot nnasia esie.+
24 Ekem Moses ada nditọiren Aaron asan̄a ekpere onyụn̄ ada ndusụk iyịp oro eyet ke mben utọn̄ nnasia mmọ ye ke akpan nnuenubọk nnasia mmọ ye ke akpan nnuenukot nnasia mmọ; edi Moses esịme iyịp oro osụhọde akanade itieuwa.+
25 Ekem enye ada ikpọn̄ ye ikpọn̄ ikpọn̄ isịm ye kpukpru ikpọn̄ oro ofụhọde ke nsia+ ye ikpọn̄ oro ofụkde esịt ye ekpụt mbiba ye ikpọn̄ oro ofụhọde ke mmọ ye ukot nnasia.+
26 Ndien enye osio ekara uyo kiet emi leaven mîdụhe+ ye ekara uyo kiet emi ẹyetde aran+ ye mfefere uyo+ kiet ke akpasa uyo eke leaven mîdụhe emi odude ke iso Jehovah. Ndien enye odori mmọ ke enyọn̄ mbak oro ẹnyenede isek ye ke ukot nnasia.
27 Ekem enye ayak kpukpru mmọ esịn ke ekaubọk Aaron ye ke ekaubọk nditọiren esie onyụn̄ ọtọn̄ọ ndifụn̄ mmọ n̄ka iso mfiak edem nte edifụn̄ uwa ke iso Jehovah.+
28 Ekem Moses osion̄o mmọ efep ke ekaubọk mmọ onyụn̄ ọfọp mmọ ke itieuwa ke enyọn̄ edifọp uwa.+ Mmọ ẹkedi uwa edida owo nsịn ke itieutom+ man osio edinem utebe.+ Enye ekedi uwa oro ẹfọpde ke ikan̄ ẹnọ Jehovah.+
29 Ndien Moses emen ikọn̄esịt+ ofụn̄ aka iso afiak edem nte edifụn̄ uwa ke iso Jehovah.+ Ndien enye akabade edi udeme+ Moses eke otode ke okukịm erọn̄ edida owo nsịn ke itieutom, kpa nte Jehovah okowụkde Moses.
30 Ekem Moses ada ndusụk aran oro ẹsidade ẹyet owo+ ye ndusụk iyịp emi okodude ke itieuwa esịme Aaron ye ke ọfọn̄ esie ye nditọiren esie ye ke ọfọn̄ nditọiren esie emi ẹdude ye enye. Ntem ke enye anam Aaron ye mme ọfọn̄ esie ye nditọiren esie ye mme ọfọn̄ nditọiren esie+ emi ẹdude ye enye ẹsana.+
31 Ndien Moses ọdọhọ Aaron ye nditọiren esie ete: “Ẹtem+ obụk unam oro ke enyịnusụn̄ tent usopidem, koro do ke mbufo ẹdita enye+ ye uyo emi odude ke akpasa edida owo nsịn ke itieutom, kpa nte ẹkewụkde mi, ẹte, ‘Aaron ye nditọiren esie ẹdita enye.’
32 Ndien mbufo ẹyefọp obụk unam ye uyo eke ẹsụhọde ke ikan̄.+
33 Mbufo ẹkûnyụn̄ ẹwọrọ ẹkpọn̄ enyịnusụn̄ tent usopidem ke usen itiaba,+ tutu usen eke ẹdade mbufo ẹsịn ke itieutom ẹyọhọ, koro edida usen itiaba ndisịn mbufo odudu ke ubọk nyọhọ.*+
34 Kpa nte ẹnamde mfịn emi, Jehovah omowụk ete ẹnam man ẹsio isop ẹnọ mbufo.+
35 Ndien mbufo ẹyedu ke enyịnusụn̄ tent usopidem uwemeyo ye okoneyo ke usen itiaba,+ mbufo ẹnyụn̄ ẹnyene ndinịm ewụhọ ukpeme oro Jehovah+ ọnọde mbak mbufo ẹdikpan̄a; koro ntem ke ẹkewụk mi.”
36 Ndien Aaron ye nditọiren esie ẹnam kpukpru se Jehovah akadade Moses owụk.
