Luke 12;1-59
12 Kan̄a ke emi, ke ini ata ediwak tọsịn owo ẹma ẹkebono ọtọkiet tutu mmọ ẹdịghi kiet eken, enye ọtọn̄ọ ke ndibem iso ndọhọ mme mbet esie ete: “Ẹkpeme idem ye leaven+ mme Pharisee, emi edide mbubịk.+
2 Edi n̄kpọ idụhe eke ẹtịmde ẹdịp oro owo mîdiyarakede, ndịben̄kpọ inyụn̄ idụhe oro owo mîdifiọkke.+
3 Mmọdo n̄kpọ ekededi eke mbufo ẹtịn̄de ke ekịm ẹyekop ke un̄wana, ndien odu eke mbufo ẹdọn̄de ke esịt ubet ẹyekwọrọ ke enyọn̄ ufọk.+
4 Akan oro, ndọhọ mbufo, mme ufan mi,+ nte, Ẹkûfehe mmọ emi ẹwotde ikpọkidem ndien mîkemeke ndinam n̄kpọ n̄kan oro.+
5 Edi nyowụt mbufo enye emi ẹkpefehede: Ẹfehe enye+ emi edide ke ama okowot, enye enyene odudu nditop nsịn ke Gehenna.+ Ih, ndọhọ mbufo nte, ẹfehe+ Enye emi.
6 Nte owo inyamke akadan̄abasi ition ke okudọk okụk iba? Kpa ye oro Abasi ifreke baba kiet ke otu mmọ.+
7 Edi ẹbat kpukpru idet+ ibuot mbufo. Ẹkûfehe ndịk; mbufo ẹmesọn̄ urua ẹkan ediwak akadan̄abasi.+
8 “Ndọhọ mbufo, ndien, nte, Owo ekededi eke enyịmede+ ke iso owo ete imabuana n̄kpọ ye ami, Eyen owo n̄ko eyenyịme ke iso mme angel Abasi ete ke imọ imabuana n̄kpọ ye enye.+
9 Edi owo eke akan̄de+ mi ke iso owo, nyakan̄ enye ke iso mme angel Abasi.+
10 Ndien owo ekededi eke editịn̄de ikọ adian Eyen owo, Abasi eyefen enye; edi owo eke edisụn̄ide edisana spirit, Abasi idifenke enye.+
11 Edi ke ini mmọ ẹdidade mbufo ẹka iso esop mbio obio ye ikpọ owo ukara ye mme enyene-odudu, ẹkûtịmede esịt ẹkere nte mbufo ẹditịn̄de ikọ ẹnyan̄a idem m̀mê se mbufo ẹdidọhọde;+
12 koro edisana spirit+ eyekpep mbufo kpa ke hour oro se mbufo ẹditịn̄de.”+
13 Ekem owo kiet ke otuowo ọdọhọ enye ete: “Andikpep, dọhọ eyeneka mi abahade n̄kpọ-akpa ọnọ mi.”
14 Enye ọdọhọ enye ete: “Da owo, anie ekemek mi nte ebiereikpe+ m̀mê edeme-udeme ke ufọt mbufo?”
15 Ndien enye ọdọhọ mmọ ete: “Ẹtịn̄ enyịn ẹkpeme idem ke kpukpru orụk edisịn esịt ke n̄kpọ owo,+ koro idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.”+
16 Ntem enye etịn̄ uwụtn̄kpọ kiet ọnọ mmọ, ete: “In̄wan̄ owo inyene kiet ama ọfọn n̄kpọ etieti.
17 Mmọdo enye ekere ke esịt esie, ete, ‘Ndinam nso, ke emi mmenyeneke ebiet eke mbonde mbun̄wụm in̄wan̄ mi?’
18 Ntre enye ọdọhọ ete, ‘Nyanam emi:+ Nyowụri mme ufọk ubonn̄kpọ mi nnyụn̄ mbọp se ikponde ikan, ndien do ke nditan̄ kpukpru mbun̄wụm mi ye ofụri nti n̄kpọ mi mbon;+
19 ndien nyọdọhọ+ ukpọn̄ mi nte: “Ukpọn̄, afo emenyene ediwak nti n̄kpọ emi obonde ọnọ ediwak isua; duọk odudu, dia, n̄wọn̄, kop inemesịt.”’+
20 Edi Abasi ọdọhọ enye ete, ‘Afo anana-ibuot owo, ẹyekpak ukpọn̄ fo ke ubọk fo ke okoneyo emi.+ Anie, ndien, edinyene mme n̄kpọ eke afo ọkọkọde obon?’+
21 Ntem ke etie ye owo eke ọkọde n̄kpọuto obon ọnọ idemesie edi mînyeneke inyene ke n̄kan̄ Abasi.”+
22 Ekem enye ọdọhọ mme mbet esie ete: “Mmọdo ndọhọ mbufo nte, Ẹtre nditịmede esịt mban̄a uwem* mbufo ẹte ididia nso m̀mê ẹban̄a ikpọkidem mbufo ẹte idisịne nso.+
23 Koro uwem* ọsọn̄de urua akan udia, ikpọkidem onyụn̄ akande edisịnen̄kpọ.
24 Ẹtịm ẹse mme raven+ ẹte mmọ isuanke n̄kpasịp inyụn̄ idọkke-dọk, mmọ inyụn̄ inyeneke ebiet ubon mbun̄wụm in̄wan̄ ye ufọk ubonn̄kpọ, edi Abasi ke ọbọk mmọ. Nte mbufo isọn̄ke urua ikan mme inuen?+
25 Anie ke otu mbufo ekeme ndidian cubit kiet ke isua uwem esie ke ntak emi enye okopde editịmede esịt?+
26 Ke ntre, edieke mbufo mîkemeke ndinam ata ekpri n̄kpọ emi, ntak emi ẹtịmerede esịt+ ẹban̄a mme n̄kpọ oro ẹsụhọde?
27 Ẹtịm ẹse ekpon̄idịm nte ẹkọride;+ mmọ ikpaha utom inyụn̄ ifiakke ndidi; edi ndọhọ mbufo nte, Kpa Solomon ke ofụri ubọn̄ esie ikesịneke n̄kpọ nte kiet ke otu mmọ emi.+
28 Edi, edieke Abasi esịnede mbiet ke ikọt n̄kpọ ntem, emi odude mfịn ndien n̄kpọn̄ ẹmen ẹsịn ke usan̄uyo, adan̄a didie akan oro ke enye edisịne mbufo n̄kpọ, mbufo mbon ekpri mbuọtidem!+
29 Ntem ẹtre ndiyom se mbufo ẹdidiade ye se mbufo ẹdin̄wọn̄de, ẹnyụn̄ ẹtre nditịmede esịt;+
30 koro kpukpru emi ẹdi mme n̄kpọ oro mme idụt ererimbot ẹsịnde idem ẹyom, edi Ete mbufo ọfiọk ke mbufo ẹmeyom mme n̄kpọ emi.+
31 Edi, ẹka iso ẹyom obio ubọn̄ esie, ndien ẹyedian mme n̄kpọ emi ẹnọ mbufo.+
32 “Ẹkûfehe ndịk,+ ekpri otuerọn̄,+ koro Ete mbufo emenyịme ndida obio ubọn̄ oro nnọ mbufo.+
33 Ẹnyam+ mme n̄kpọ emi mbufo ẹnyenede ẹda ẹnọ mme ubuene.*+ Ẹnam ekpatokụk eke mîditahake ẹnọ idem mbufo, kpa n̄kpọuto eke mîdikpụhu ke heaven,+ ke ebiet emi inọ mîsan̄ake ikpere, utan̄kpọ mînyụn̄ ibiatke n̄kpọ.
34 Koro ebiet emi n̄kpọuto mbufo odude, do ke esịt mbufo edidu n̄ko.+
35 “Ẹbọbọ mbọbọ ke isịn+ mbufo ẹnyụn̄ ẹnam mme utuenikan̄+ mbufo ẹsak,
36 mbufo ẹnyụn̄ ẹbiet mme owo emi ẹtiede ẹbet eteufọk+ mmọ ke ini enye otode ndọ ọnyọn̄ edi,+ man ke ini enye edidide edikọn̄ usụn̄,+ mmọ ẹkpeberede ẹnọ enye inikiet inikiet.
37 Ifịn emi eteufọk mmọ edidide edikụt mmọ ẹtiede ẹkpeme ẹkop inemesịt!+ Ke akpanikọ ke ndọhọ mbufo, Enye ayafak ọfọn̄+ onyụn̄ anam mmọ ẹtie ke okpokoro, onyụn̄ asan̄a utom ọnọ mmọ.+
38 Ndien edieke enye otode edi ke ufọt okoneyo, m̀mê ke n̄kpọusen, onyụn̄ okụtde mmọ ẹnamde ntem, mmọ ẹyekop inemesịt!+
39 Edi ẹfiọk emi ẹte, edieke enyeneufọk ọkpọfiọkde hour eke inọ edidide, enye ekpekpeme, ikponyụn̄ iyakke ẹbụn̄ ufọk esie ẹdụk.+
40 Mbufo nde, ẹben̄e idem, koro Eyen owo eyedi ke hour eke mbufo mîdorike enyịn.”+
41 Ekem Peter obụp ete: “Ọbọn̄, nte afo etịn̄ uwụtn̄kpọ emi ọnọ nnyịn m̀mê etịn̄ ọnọ kpukpru owo nde?”
42 Ndien Ọbọn̄ ọbọrọ ete: “Anie ndien edi akama-ukpọhọde emi anamde akpanikọ,+ onyụn̄ enyenede ọniọn̄,+ emi eteufọk esie edimekde ete ese aban̄a otu asan̄autom esie onyụn̄ ọnọ mmọ udeme udia mmọ ke nnennen ini?+
43 Ofụn oro eteufọk esie edidide okụt enye anamde ntem, okop inemesịt!+
44 Ke akpanikọ ke ndọhọ mbufo nte, Enye eyemek enye ete ese aban̄a kpukpru inyene esie.+
45 Edi edieke ofụn oro edidọhọde ke esịt esie ete, ‘Eteufọk mi ebịghi ndidi,’+ edinyụn̄ ọtọn̄ọde ndimia ifịn iren ye ifịn iban, onyụn̄ adia onyụn̄ ọn̄wọn̄ onyụn̄ akpa mmịn,+
46 eteufọk ofụn oro eyedi ke usen eke enye mîdorike enyịn enye ndidi ye ke hour eke enye mîfiọkke,+ oyonyụn̄ ọnọ enye ata ọkpọsọn̄ ufen onyụn̄ ọnọ enye udeme ke otu mmọ emi mînamke akpanikọ.+
47 Ndien ofụn oro ọkọfiọkde uduak eteufọk esie edi mîben̄eke idem mînyụn̄ inamke nte uduak eteufọk esie edide, ẹyemia enye ediwak ubọkikpa.+
48 Edi enye emi mîkọfiọkke+ ndien anamde n̄kpọ eke odotde ikpa, ẹyemia enye esisịt ubọkikpa.+ Ke akpanikọ, owo eke ẹnọde ediwak n̄kpọ, ke ẹdiyom ediwak n̄kpọ ẹto enye;+ owo eke mme owo ẹdọhọde ese aban̄a ediwak n̄kpọ, mmọ ẹyeyom se iwakde ikan ẹto enye.+
49 “N̄kedi ndisịn ikan̄+ ke isọn̄, ndien nso efen ke nyom edieke edide enye obobubede?
50 Ke akpanikọ, mmenyene baptism eke ẹdinịmde mi, ndien afịna mi didie ntem tutu ẹnịm mi ẹma!+
51 Nte mbufo ẹkere ẹte n̄kedi ndisịn emem ke isọn̄? Ndọhọ mbufo nte, Baba, utu ke oro n̄kedi ndisịn ubahade.+
52 Koro ọtọn̄ọde ke emi, ubahade oyodu ke otu owo ition ke ufọk kiet, owo ita ẹyeda ke n̄kan̄ kiet, iba ẹyeda ke n̄kan̄ eken.+
53 Mmọ ẹyebahade ẹda, ete ayadian̄ade ọkpọn̄ eyeneren esie, eyeneren oyonyụn̄ adian̄ade ọkpọn̄ ete, eka ayadian̄ade ọkpọn̄ eyen esie an̄wan, eyenan̄wan oyonyụn̄ adian̄ade ọkpọn̄ eka esie, eka ebe ayadian̄ade ọkpọn̄ n̄wan eyen esie, n̄wan eyen oyonyụn̄ adian̄ade ọkpọn̄ eka ebe esie.”+
54 Ekem enye ọdọhọ otuowo n̄ko ete: “Ke ini mbufo ẹkụtde idiọk enyọn̄ ọwọrọde ke edem usoputịn, idaha oro mbufo ẹte, ‘Oyobio ke edi,’ ndien osu ntre.+
55 Ndien ke ini mbufo ẹkụtde ofụm edem usụk abarade, mbufo ẹdọhọ ẹte, ‘Eyo oyofiop etieti,’ ndien ọwọrọ ntre.
56 Mbon mbubịk, mbufo ẹmefiọk nte ẹdụn̄ọrede idiọn̄ọ eke ẹdude ke iso isọn̄ ye ikpaenyọn̄, anam didie ndien mbufo mîfiọkke nte ẹdụn̄ọrede akpan ini emi?+
57 Ntak emi mbufo n̄ko mîbiereke ke idem mbufo se inende?+
58 Ke uwụtn̄kpọ, ke ini afo asan̄ade ye owo emi afo enyenede ikpe aka iso andikara, ke adan̄aemi odude ke usụn̄ domo ndinam emem ye enye, mbak enye edidụri fi aka iso ebiereikpe, ndien ebiereikpe ayak fi ọnọ asan̄autom ufọkesop, asan̄autom ufọkesop onyụn̄ otop fi esịn ke ufọk-n̄kpọkọbi.+
59 Ndọhọ fi nte, Uduwọrọke do tutu afo ekpe akpatre okudọk okụk emi afo akamade.”+
