Luke 19;1-48
19 Ekem enye odụk Jericho+ asan̄a ebe.
2 Ndien sese owo kiet odu do emi ekerede Zacchaeus; enye edi etubom mme ọbọ a-tax, onyụn̄ edi owo inyene.
3 Ndien, enye oyom ndikụt+ m̀mê Jesus emi edi anie, edi ikemeke ndikụt ke ntak otuowo, koro enye omụhọde ke idaha.
4 Ntre ke enye ebem iso efehe aka iso iso ọkọdọk eto fig man okụt enye, koro enye okoyomde ndisan̄a ke usụn̄ oro mbe.
5 Edi ke ini Jesus esịmde ebiet oro, enye emenede enyịn ọdọhọ enye ete: “Zacchaeus, wara sụhọde di, koro nnyene ndidan̄ ke ufọk fo mfịn.”
6 Ndien enye awara osụhọde edi onyụn̄ ada enye nte esen ọnyọn̄ ke idatesịt.
7 Edi ke ini mmọ ẹkụtde emi, kpukpru mmọ ẹtọn̄ọ ndikụni,+ ẹte: “Enye aka ndidan̄ ke ufọk owo emi edide anamidiọk.”
8 Edi Zacchaeus adaha ada onyụn̄ ọdọhọ Ọbọn̄ ete: “Sese! Ọbọn̄, ke nnọnọ mme ubuene ubak inyene mi, ndien se ededi emi n̄kodoride owo ikọ+ mbọ ke n̄kanubọk, nsosio usiene utịm ikanan̄.”+
9 Edi Jesus ọdọhọ enye ete: “Edinyan̄a ama odụk ufọk emi mfịn emi, koro enye n̄ko edide eyen Abraham.+
10 Koro Eyen owo ekedi ndiyom nnyụn̄ nnyan̄a se ikosopde.”+
11 Ke adan̄aemi mmọ ẹkpan̄de utọn̄ ẹkop mme n̄kpọ emi, enye adian uwụtn̄kpọ kiet do, koro enye ekperede Jerusalem, mmọ ẹkenyụn̄ ẹkere ẹte obio ubọn̄ Abasi ọmọn̄ owụt idem idaha oro.+
12 Ntre ke enye ọdọhọ ete: “Ọbọn̄ kiet akaka anyan idụt ndikọbọ ubọn̄ nda nnyụn̄ mfiak nnyọn̄ ndi.+
13 Enye okot ifịn esie duop, ọnọ mmọ mina duop onyụn̄ ọdọhọ mmọ ete, ‘Ẹnam mbubehe tutu ndi.’+
14 Edi mbio obio esie ẹsua+ enye ẹnyụn̄ ẹsio otu mme isụn̄utom ẹdọn̄ ẹka ẹbịne enye, ẹkedọhọ ẹte, ‘Nnyịn iyomke owo emi edi edidem nnyịn.’+
15 “Ekem ke ini enye ama ọkọbọ ubọn̄ ada onyụn̄ afiak ọnyọn̄ edi, enye ọnọ uyo ete ẹkot ifịn emi imọ ikọnọde okụk silver ẹdi, man idụn̄ọde ifiọk udori eke mmọ ẹkenyenede ke mbubehe.+
16 Edi akpa owo edi, edidọhọ ete, ‘Ọbọn̄, mina duop odoro ke mina fo.’+
17 Ntre enye ọdọhọ owo oro ete, ‘Emetịm anam, eti ofụn! Sia akanamde akpanikọ ke ata ekpri n̄kpọ, di andikara obio duop.’+
18 Ndien udiana edi, edidọhọ ete, ‘Ọbọn̄, mina ition odoro ke mina fo.’+
19 Enye ọdọhọ enye emi n̄ko ete, ‘Afo, nde, kara obio ition.’+
20 Edi owo en̄wen edi, edidọhọ ete, ‘Ọbọn̄, sese mina fo, emi n̄kọbọpde ke ọfọn̄ nnịm.
21 Okokụt do, mfefehe fi, koro afo edide owo nsọn̄ido; afo atatan̄ se mûkenịmke onyụn̄ ọdọdọk se mûkọtọhọ.’+
22 Enye ọdọhọ owo oro ete, ‘Nyada ikọ inua+ fo n̄kpe ikpe nnọ fi, afo idiọk ofụn. N̄kọ ama ọfiọk ete ndi owo nsọn̄ido, emi ntan̄de se mmen̄kenịmke nnyụn̄ ndọkde se mmen̄kọtọhọ?+
23 Ntak ndien mûkemenke okụk silver mi usịn ke itie unịm okụk? Ndien ke nnyọn̄de ndi n̄kpọbọ iso okụk ye udori.’+
24 “Ntre enye ọdọhọ mmọ emi ẹdade ẹkpere ete, ‘Ẹbọ enye mina oro ẹmen ẹnọ owo emi enyenede mina duop.’+
25 Edi mmọ ẹdọhọ enye ẹte, ‘Ọbọn̄, enye enyenyene mina duop!’—
26 ‘Ndọhọ mbufo nte, Ẹyedian efen efen ẹnọ owo eke enyenede; edi ẹyebọ owo eke mînyeneke kpa se enye enyenede.+
27 Akan oro, mbufo ẹda mme asua mi emi mîkoyomke ndi edidem mmọ ẹdi mi, ẹnyụn̄ ẹwot mmọ ke iso mi.’”+
28 Ntre, ke enye ama eketịn̄ mme ikọ emi ama, enye ebem iso, ọdọk aka Jerusalem.+
29 Ndien ke ini enye asan̄ade ekpere Bethphage ye Bethany ke obot emi ekerede Obot Olive,+ enye osio owo iba ke otu mbet ọdọn̄,+
30 ete: “Ẹka ẹkedụk obio-in̄wan̄ emi mbufo ẹdade ẹkụt ko, ndien ke ini mbufo ẹbede ẹdụk mbufo ẹyekụt abak ass emi ẹyịride, emi akanam baba owo kiet mîdoroke enye ke edem. Ẹtat enye ẹda ẹdi.+
31 Edi edieke owo ekededi obụpde mbufo ete, ‘Ntak emi mbufo ẹtatde enye?’ Mbufo ẹbọrọ ntem ẹte, ‘Ọbọn̄ oyom enye.’”+
32 Ntre mbon oro ẹkesiode ẹdọn̄ ẹdaha ẹka ẹkekụt kpa nte enye ọkọdọhọde mmọ.+
33 Edi nte mmọ ẹtatde abak ass oro, mme andinyene enye ẹbụp mmọ ẹte: “Ntak emi mbufo ẹtatde abak ass oro?”+
34 Mmọ ẹbọrọ ẹte: “Ọbọn̄ oyom enye.”+
35 Ndien mmọ ẹda enye ẹsọk Jesus, mmọ ẹnyụn̄ ẹda ewụra mmọ ẹbri abak ass ke edem ẹnyụn̄ ẹnam Jesus ọdọk odoro.+
36 Nte enye odorode aka+ iso, mmọ ẹbri ewụra mmọ ke usụn̄.+
37 Ke ndondo oro enye ekperede usụn̄ emi otode Obot Olive osụhọde, ofụri udịm mbet ẹtọn̄ọ ndidara nnyụn̄ ntoro Abasi ke ọkpọsọn̄ uyo mban̄a kpukpru utom odudu emi mmọ ẹkekụtde,+
38 ẹte: “Itoro enyene Enye emi edide nte Edidem ke enyịn̄ Jehovah!+ Emem odu ke heaven, ubọn̄ onyụn̄ odu ke n̄kon̄n̄kan ebiet!”+
39 Nte ededi, ndusụk mme Pharisee emi ẹdude ke otuowo ẹdọhọ enye ẹte: “Andikpep, sua nọ mme mbet fo.”+
40 Edi enye ọbọrọ ete: “Ndọhọ mbufo nte, Edieke mmọ emi ẹkpedopde uyo, mme itiat+ ẹkpesio n̄kpo.”
41 Ndien ke ini enye asan̄ade ekpere, enye okụt obio onyụn̄ atua aban̄a enye,+
42 ete: “Edieke afo ọkpọfiọkde+ mfịn emi mme n̄kpọ eke ẹnamde emem odu—edi ke emi mmọ ẹmedịbe fi ke enyịn.+
43 Koro mme usen ẹyesịm fi eke mme asua fo ẹdidade nsọsọp iso eto+ ẹbọp ọkọ ukpeme+ ẹkanade fi, ẹyenyụn̄ ẹkan fi ẹkụk,+ ẹnyụn̄ ẹbaha+ fi ke kpukpru n̄kan̄,
44 ndien mmọ ẹyesụhọde fi ye nditọ fo emi ẹdụn̄de fi ke esịt ẹnịm ke isọn̄,+ mmọ idinyụn̄ ikpọn̄ke itiat kiet ke enyọn̄ itiat+ efen ke esịt fo, koro afo mûkọfiọkke ini eke ẹdide ndidụn̄ọde fi.”+
45 Ndien enye odụk temple onyụn̄ ọtọn̄ọ ndibịn mmọ eke ẹnyamde n̄kpọ nsion̄o,+
46 onyụn̄ ọdọhọ mmọ ete: “Ẹwet ẹte, ‘Ufọk mi edidi ufọk akam,’+ edi mbufo ẹmenam enye edi itie udịbe mbon n̄wo.”+
47 Ndien enye ekpep n̄kpọ ke usen ke usen ke temple. Edi mbọn̄ oku ye mme scribe* ye mme etubom mbio obio ẹyom usụn̄ ndiwot enye;+
48 edi mmọ ikwe se mmọ ẹkpenamde, koro kpukpru owo ẹyịrede enye man ẹkop ikọ esie.+
