Mark 5;1-43
5 Ekem, mmọ ẹsịm edem inyan̄ oko ẹnyụn̄ ẹdụk idụt mbon Gerasa.+
2 Ndien ke ndondo oro enye ọwọrọde ke ubom, owo emi enyenede ndedehe spirit oto mme udi edisobo ye enye.+
3 Enye okodụn̄ ke mme udi; ndien tutu esịm ini oro idụhe owo baba kiet emi ekekemede ndida n̄kpọkọbi n̄kọbi enye nnịm,
4 koro ẹma ẹkọbi enye ediwak ini ke ebuka ye n̄kpọkọbi, edi enye ekịbi n̄kpọkọbi onyụn̄ obụn̄ ebuka mbio mbio; owo ndomokiet inyụn̄ inyeneke ukeme ndisụk enye.
5 Ndien kpukpru ini, okoneyo ye uwemeyo, enye ofiori ke mme udi ye ke mme obot onyụn̄ ekpen̄e idem ke itiat.
6 Edi ke ini enye adade nsannsan okụt Jesus, enye efehe okonụhọ ọnọ enye,
7 ndien ke enye ama okofiori ke ọkpọsọn̄ uyo,+ enye ọdọhọ ete: “Nsan̄a nso ye afo, Jesus, Eyen Ata Edikon̄ Abasi?+ Mmọsọn̄ọ nda enyịn̄ Abasi n̄kpe fi ubọk+ nte okûtụhọde mi.”+
8 Koro enye ọkọdọhọde spirit emi ete: “Afo ndedehe spirit, wọrọ owo emi ke idem.”+
9 Edi enye obụp enye ete: “Afo ekere didie?” Ndien enye ọbọrọ enye ete “Ami n̄kere Udịm,+ koro nnyịn imawak.”+
10 Ndien enye ekpe enye ubọk ediwak ini ete okûbịn mme spirit emi osion̄o ke idụt oro.+
11 Edi akwa otu edi+ ẹma ẹdu do ke obot oro ẹdia n̄kpọ.+
12 Ntre mmọ ẹkpe enye ubọk, ẹte: “Sion̄o nnyịn dọn̄ ke mme edi, man ikodụk mmọ idem idọn̄ọ.”
13 Ndien enye enyịme ọnọ mmọ. Ndedehe spirit oro ẹwọn̄ọ ẹkedụk mme edi oro ke idem ẹdọn̄ọ; ndien otu ufene emi ẹbụmede ẹfen̄e ẹsụhọde ebeden̄ ẹkeduọn̄ọ ẹdọn̄ọ inyan̄, n̄kpọ nte edi tọsịn iba, mmọ kiet kiet ẹnyụn̄ ẹkpan̄a ke inyan̄.+
14 Edi mme andikpeme mmọ ẹfen̄e ẹkebụk n̄kpọ emi ke akwa obio ye ke obio-in̄wan̄; ndien mbio obio ẹdi ndise se iketịbede.+
15 Ntre mmọ ẹdi ẹdisịm Jesus, ẹnyụn̄ ẹkụt owo emi ekenyenede demon nte esịnede ọfọn̄ etie, ibuot onyụn̄ ọfọn enye, kpa owo emi ekenyenede udịm oro; ndien ndịk anam mmọ.
16 N̄ko, mbon oro ẹkekụtde ẹbụk ẹnọ mmọ nte n̄kpọ emi eketịbede ọnọ owo emi ekenyenede demon ye se iketịbede inọ mme edi.
17 Ntre mmọ ẹtọn̄ọ ndikpe enye ubọk ẹte ọkpọn̄ n̄kann̄kụk mmimọ.+
18 Ekem nte enye edierede ke ubom, owo emi ekenyenede demon do ekpe enye ubọk ete ayak imọ itiene enye.+
19 Edi enye iyakke, edi ọdọhọ enye ete: “Nyọn̄ ufọk bịne mme iman fo,+ nyụn̄ tịn̄ nọ mmọ kpukpru n̄kpọ eke Jehovah+ anamde ọnọ fi ye nte enye akatuade fi mbọm.”+
20 Ndien enye ọnyọn̄ ọkọtọn̄ọ nditan̄a ke Decapolis+ kpukpru n̄kpọ oro Jesus akanamde ọnọ enye, ndien idem akpa kpukpru owo.+
21 Ke Jesus ama ọkọtọn̄ọ ntak asan̄a ke ubom ebe esịm edem inyan̄ eken, akwa otuowo ẹsop idem ẹtiene enye; ndien enye okodu ke mbeninyan̄.+
22 Ekem kiet ke otu ikpọ owo emi ẹtiede ibuot ke synagogue, emi ekerede Jairus, edi, ndien ke ini okụtde enye, ọduọ enye ke ukot+
23 onyụn̄ ekpe enye ubọk ediwak ini, ete: “Ekpri eyen mi an̄wan odu ke ata idiọk idaha. Mbọk di didori enye ubọk+ man enye okpokop nsọn̄idem onyụn̄ odu uwem.”+
24 Ndien enye etiene enye adaha. Akwa otuowo ẹnyụn̄ ẹtiene enye ẹnyụn̄ ẹberi enye.+
25 Ndien n̄wan kiet ama odu emi ọkọdọn̄ọde uwọrọiyịp+ ke isua duopeba,+
26 enye onyụn̄ okụt ekese ubiak ke ubọk ediwak mbiausọbọ+ onyụn̄ abiat kpukpru se enye enyenede inyụn̄ ikwe ufọn, edi utu ke oro, ọdọdiọk akan.
27 Ke ini enye okopde mme n̄kpọ emi ẹban̄ade Jesus, enye oto edem edem abahade otuowo odụk editụk+ ewụra esie;
28 koro enye akade iso ndidọhọ ete: “Mma n̄kam ntotụk ekpedi ewụra esie nyokop nsọn̄idem.”+
29 Ndien kpa idaha oro uwọrọiyịp esie etre, enye onyụn̄ okop ke idemesie ete ke ẹma ẹnam idiọk udọn̄ọ imọ okụre.+
30 Kpa idaha oro, Jesus ọfiọk ete ke odudu+ ọwọrọ imọ ke idem, ndien enye ọwọn̄ọde ke otuowo onyụn̄ obụp ete: “Anie okotụk ewụra mi?”+
31 Edi mme mbet esie ẹbọrọ enye ẹte: “Afo omokụt nte otuowo ẹberide fi,+ ndien afo ete, ‘Anie okotụk mi?’”
32 Nte ededi, enye ese akanade ete ikụt n̄wan oro akanamde emi.
33 Edi n̄wan emi okop ndịk onyụn̄ enyek idem, sia ọfiọkde se iketịbede inọ enye, onyụn̄ edi ediduọ enye ke iso etịn̄ ofụri akpanikọ ọnọ enye.+
34 Enye ọdọhọ n̄wan emi ete: “Eyenan̄wan, mbuọtidem fo amanam idem ọsọn̄ fi. Nyọn̄ ke emem,+ bọhọ idiọk udọn̄ọ fo nyụn̄ kop nsọn̄idem.”+
35 Ke adan̄aemi enye osụk etịn̄de ikọ, ndusụk owo ẹto ufọk akwa owo emi etiede ibuot ke synagogue ẹdidọhọ ẹte: “Eyen fo an̄wan ama akpa! Ntak emi osụk afịnade andikpep?”+
36 Edi ke ini Jesus adade okop ikọ emi ẹtịn̄de, ọdọhọ akwa owo emi etiede ibuot ke synagogue ete: “Kûfehe ndịk, kam nyene mbuọtidem.”+
37 Ndien enye iyakke baba owo kiet asan̄a ye enye ke mîbọhọke Peter ye James ye John eyeneka James.+
38 Ntre mmọ ẹdisịm ufọk akwa owo emi etiede ibuot ke synagogue, ndien enye okụt nte ẹsịnde editịm ye nte mme owo ẹtuan̄ade ẹnyụn̄ ẹsemede etieti,
39 ndien, ke ama okodụk ufọk, enye ọdọhọ mmọ ete: “Ntak emi mbufo ẹsịnde editịm ẹnyụn̄ ẹtuan̄ade? Ekpri eyen emi ikpaha-kpa, edi edede.”+
40 Ntem mmọ ẹtọn̄ọ ndisak enye nsahi. Edi, ke ama akanam kpukpru mmọ ẹwọn̄ọ, enye ada ete ye eka ekpri eyen oro ye mmọ emi ẹdude ye enye odụk ebiet emi ekpri eyen emi odude.+
41 Ndien enye omụm ekpri eyen emi ubọk, onyụn̄ ọdọhọ enye ete: “Talʹi·tha cuʹmi,” emi ọwọrọde: “N̄kaiferi, ndọhọ fi nte, Daha ke enyọn̄!”+
42 Ndien kpa idaha oro n̄kaiferi emi adaha ke enyọn̄ onyụn̄ ọtọn̄ọ ndisan̄a, koro enye ekedide isua duopeba ke emana. Ndien kpa idaha oro mmọ ẹdu ke akwa idatesịt.+
43 Edi enye owụk mmọ afiak owụk ete ẹkûyak baba owo kiet ọfiọk+ n̄kpọ emi, enye onyụn̄ ọdọhọ ẹnọ enye n̄kpọ adia.
