Matthew 18;1-35
18 Ke hour oro mme mbet ẹsan̄a ẹkpere Jesus ẹnyụn̄ ẹbụp enye ẹte: “Anie ndien okpon akan ke obio ubọn̄ heaven?”+
2 Ntre, enye okot ekpri eyenọwọn̄ enịm ke ufọt mmọ+
3 onyụn̄ ọdọhọ ete: “Ke akpanikọ ke ndọhọ mbufo nte, Ibọhọke mbufo ẹkpụhọde ẹnyụn̄ ẹkabade ẹtie nte n̄kpri nditọ,+ mbufo idikemeke-keme ndidụk obio ubọn̄ heaven.+
4 Ke ntre, owo ekededi eke edisụhọrede idem+ nte ekpri eyenọwọn̄ emi, edi enye okpon akan ke obio ubọn̄ heaven;+
5 ndien owo ekededi eke adarade utọ ekpri eyenọwọn̄ emi ke ntak enyịn̄ mi adara mi n̄ko.+
6 Edi owo ekededi eke anamde kiet ke otu n̄kpri owo eke ẹbuọtde idem ye ami atuak ukot ọduọ, ọkpọfọn ye enye akan edieke ẹkpemende utọ itiat ukọkn̄kpọ+ emi ass esiyụtde ẹkọn̄ enye ke itọn̄ ẹnyụn̄ ẹtop enye ẹduọk ke akwa inyan̄.+
7 “Mbọm ererimbot koro mme n̄kpọ iduọ ẹdude! Ke akpanikọ, mme n̄kpọ iduọ ẹnyene ndidi,+ edi mbọm owo emi edidade n̄kpọ iduọ+ edi!
8 Mmọdo, edieke ubọk fo m̀mê ukot fo anamde fi atuak ukot ọduọ, sịbe enye top duọk;+ ọfọn afo ndibiomo ndo m̀mê ndidi mbụn̄ọ ndụk uwem akan ndinyene ubọk iba m̀mê ukot iba ndien ẹtop fi ẹsịn ke nsinsi ikan̄.+
9 N̄ko, edieke enyịn fo anamde fi atuak ukot ọduọ, wụbede enye top duọk; ọfọn afo ndida enyịn kiet mbe ndụk uwem akan ndinyene enyịn iba ndien ẹtop fi ẹduọk ke Gehenna.+
10 Ẹkụt ẹte mbufo isịnke kiet ke otu n̄kpri owo emi ke ndek; koro ndọhọ mbufo nte mme angel+ mmọ ke heaven ẹsikụt iso Ete mi emi odude ke heaven kpukpru ini.+
11 * ——
12 “Mbufo ẹkere didie? Edieke owo kiet enyenede erọn̄ ikie ndien kiet ke otu mmọ osop usụn̄,+ nte enye idikpọn̄ke anan̄ ye efịtenan̄ ke enyọn̄ obot inyụn̄ idaha ikoyom kiet emi osopde usụn̄ do?+
13 Ndien edieke enye okụtde, ke akpanikọ ke ndọhọ mbufo nte, enye adara enye akan anan̄ ye efịtenan̄ emi mîkosopke usụn̄.+
14 Kpasụk ntre Ete mi emi odude ke heaven iyomke kiet ke otu n̄kpri owo emi atak.+
15 “Akan oro, edieke eyenete fo eduede fi, ka kemen ndudue esie wụt enye, sụk fi ye enye ikpọn̄.+ Edieke enye okopde uyo fo, afo amada eyenete fo enyene.+
16 Edi edieke enye mîkopke, da owo kiet m̀mê iba en̄wen san̄a, man ke inua ntiense iba m̀mê ita kpukpru ikọ ẹkpesọn̄ọ ẹda.+
17 Edieke enye mîkopke uyo mmọ, tịn̄ nọ esop. Edieke enye mîkam ikopke uyo esop, yak enye etie fi nte owo mme idụt+ ye nte ọbọ a-tax.+
18 “Ke akpanikọ ke ndọhọ mbufo nte, N̄kpọ ekededi eke mbufo ẹbọpde ke isọn̄ kpa mme n̄kpọ oro ke ẹbọp ke heaven, n̄kpọ ekededi eke mbufo ẹnyụn̄ ẹtatde ke isọn̄ kpa mme n̄kpọ oro ke ẹtat ke heaven.+
19 Mmọtọn̄ọ ntak ndọhọ mbufo ke akpanikọ nte, Edieke owo iba ke otu mbufo emi ẹdude ke isọn̄ ẹnyịmede ndiben̄e akpan n̄kpọ ekededi, Ete mi ke heaven ayanam emi ọnọ mmọ.+
20 Koro ke ebiet eke owo iba m̀mê ita ẹsopde idem ke enyịn̄ mi,+ ami ndodu ke ufọt mmọ.”+
21 Ekem Peter asan̄a ekpere edibụp enye ete: “Ọbọn̄, ikafan̄ ke eyenete mi edinam mi idiọkn̄kpọ ndien ami mfen nnọ enye?+ Tutu esịm utịm ikatiaba?”+
22 Jesus ọdọhọ enye ete: “Ndọhọ fi nte, idịghe, Tutu esịm utịm ikatiaba, edi, Tutu esịm utịm ike-ata ye efịteba.+
23 “Ntak edi oro obio ubọn̄ heaven ebietde owo kiet, edidem,+ oro oyomde ndinam ibat+ ye ifịn esie.
24 Ke ini enye ọtọn̄ọde ndinam ibat ye mmọ, ẹda owo kiet ẹdi emi akamade enye talent tọsịn duop [denarius 60,000,000].
25 Edi sia enye mînyeneke usụn̄ nte osiode isọn oro, eteufọk esie ọnọ uyo ete ẹnyam enye ye n̄wan esie ye nditọ esie ye kpukpru se enye enyenede ẹnyụn̄ ẹda ẹkpe isọn emi.+
26 Ntre ofụn oro ọduọ ke isọn̄ onyụn̄ ekpe enye ubọk, ete: ‘Nyene ime ye ami ndien nyekpe fi kpukpru.’
27 Ntem, eteufọk ofụn oro atua enye mbọm onyụn̄ asana enye ayak+ onyụn̄ abiat isọn esie efep.+
28 Edi ofụn oro ọwọrọ okokụt kiet ke otu ekemmọ ifịn emi akamade enye denarius ikie;+ ndien omụm enye, ọtọn̄ọ ndifịk enye itọn̄, ete, ‘Sio se ededi oro afo akamade mi.’
29 Ntre ekemmọ ofụn oro ọduọ ke isọn̄ ekpe enye ubọk, ete, ‘Nyene ime+ ye ami ndien nyosio isọn fo.’
30 Nte ededi, enye inyịmeke, edi adaha akanam ẹtop enye ẹsịn ke ufọk-n̄kpọkọbi tutu enye osio isọn emi enye akamade.
31 Ke ntre, ke adan̄aemi ekemmọ ifịn ẹkụtde se itịbede, mmọ ẹfụhọ etieti, ẹnyụn̄ ẹka ẹketịn̄ kpukpru se itịbede ẹnọ eteufọk mmọ.+
32 Ekem eteufọk esie okot enye onyụn̄ ọdọhọ enye ete, ‘Idiọk ofụn, mma mbiat kpukpru isọn fo mfep, ke ini afo ekekpede mi ubọk.
33 Nte afo n̄ko ukpatuaha ekemmọ ofụn mbọm,+ kpa nte ami n̄katuade fi mbọm?’+
34 Ntem eteufọk esie ayat esịt onyụn̄ ayak enye ọnọ mme ekpeme ufọk-n̄kpọkọbi,+ tutu enye osio kpukpru se enye akamade.
35 Kpasụk ntre+ ke Ete mi eke heaven edinam ye mbufo edieke mbufo mîfenke inọ eyenete mbufo ke ofụri esịt.”+
