Micah 1;1-16
1 Emi edi uyo Jehovah oro ekesịmde Micah+ owo Moresheth, ke eyo Jotham,+ Ahaz,+ Hezekiah,+ ndidem Judah,+ emi enye okokụtde ke n̄kukụt aban̄a Samaria+ ye Jerusalem:+
2 “O mbufo, kpukpru mbufo, ẹkop; O isọn̄ ye se iyọhọde ke esịt,+ ẹkpan̄ utọn̄, ndien yak Jehovah, kpa Jehovah Akakan Ọbọn̄ Andikara, odu ke edisana temple+ esie etie ntiense aban̄a mbufo.+
3 Koro, sese! Jehovah ke oto ebietidụn̄ esie ọwọrọ,+ enye oyonyụn̄ osụhọde edi edidịghi mme edikon̄ ebiet isọn̄.+
4 Ndien ikpọ obot ẹyetara ke idak esie,+ mme unaisọn̄ itịghede ẹyenyụn̄ ẹsiaha, kpa nte obukpa ọkwọk atarade ke ntak ikan̄,+ kpa nte mmọn̄ emi ẹn̄wan̄ade ẹduọk ke ebeden̄.
5 “Nsọn̄ibuot Jacob ye mme idiọkn̄kpọ ufọk Israel ẹnam kpukpru emi ẹtịbe.+ Nso idi nsọn̄ibuot Jacob? Nte idịghe Samaria?+ Nso inyụn̄ idi mme edikon̄ ebiet Judah?+ Nte mmọ idịghe Jerusalem?
6 Ami nyanam Samaria edi ibombom n̄wụre ke in̄wan̄,+ kpa ebiet emi ẹtọde in̄wan̄ vine; ndien nyan̄wan̄a mme itiat esie ndọn̄ ke ebeden̄, nnyụn̄ mfụhọde itiat idakisọn̄ esie.+
7 Ẹyenuak kpukpru ndisọi mbiet esie mbai mbai,+ ẹnyụn̄ ẹfọp kpukpru enọ oro ẹkenọde enye nte okụk esie;+ nyonyụn̄ nsobo kpukpru ndisọi mbiet esie. Koro enye ọkọbọde mme n̄kpọ oro ẹnọde enye nte okụk akpara, ndien amaedi mme n̄kpọ oro ẹkenọde nte okụk akpara, mmọ ẹyeyak ẹnọ.”+
8 Ke ntak emi nyeseme nnyụn̄ ntua;+ nyasan̄a ukpọk ikpat ye iferi.+ Nyeseme nte mme jackal, nnyụn̄ ntua nte mme uman ostrich.
9 Koro owo ikemeke ndikọk unan esie;+ koro enye emesịm Judah,+ udọn̄ọ emesịm inuaotop ikọt mi, omonyụn̄ esịm Jerusalem.+
10 “Mbufo ẹkûtịn̄ ke Gath; ẹkûdedei ẹtua.+
“Ẹwere ke ntọn̄ ke ufọk Aphrah.+
11 San̄a be iferi+ ye ke bụt, O n̄wan emi odụn̄de ke Shaphir. N̄wan emi odụn̄de ke Zaanan iwọrọke ika. Eseme Bethezel ọyọbọ mbufo itie emi enye adade.
12 Koro n̄wan emi odụn̄de ke Maroth etie ebet se ifọnde,+ edi se idiọkde oto Jehovah osụhọde edisịm inuaotop Jerusalem.+
13 Men chariot yịri ke mme ọsọp-itọk enan̄-mbakara, O n̄wan emi odụn̄de ke Lachish.+ Enye ekedi ntọn̄ọ idiọkn̄kpọ ọnọ eyenan̄wan Zion,+ koro ẹmekụt fi nsọn̄ibuot Israel ke idem.+
14 Mmọdo afo ọyọnọ Moresheth-gath+ enọ usio unyọn̄. Mme ufọk Achzib+ ẹkedi n̄kpọ abian̄a ẹnọ ndidem Israel.
15 Nyada owo emi edibọde fi inyene nsọk fi,+ O n̄wan emi odụn̄de ke Mareshah.+ Ubọn̄ Israel eyesịm Adullam.+
16 Kporo idet nịm ibọ, nyụn̄ fat idet ke ntak nditọ fo emi enen̄erede ẹdat fi esịt.+ Nam ibọ fo atara nte eke ntrukpom, koro mmọ ẹmekpọn̄ fi ẹka ntan̄mfep.”+
