Psalm 119;1-176
א [ʼAleph]
119 Mbon oro usụn̄ mmọ ọfọnde ama,+Kpa mbon oro ẹsan̄ade ke ibet Jehovah, ẹkop inemesịt.+
2 Mbon oro ẹnamde se enye etide mmọ ẹkop inemesịt;+Mmọ ẹyom enye ke ofụri esịt mmọ.+
3 Mmọ inamke ukwan̄ido.+Mmọ ẹsan̄a ke usụn̄ esie.+
4 Afo omowụk nnyịn+Ete itịm ikpeme mme ewụhọ fo.+
5 O usụn̄ mi akpakam enyene iwụk+Man nnịm mme ewụhọ fo!+
6 Ndien bụt ikpanamke mi,+Ke ini ntịn̄de enyịn ke kpukpru mme ibet fo.+
7 Ami nyotoro fi ye esịt eke enende,+Ke ini mfiọkde ndinen ubiereikpe fo.+
8 Mmaka iso nnịm mme ewụhọ fo.+Mbọk kûkpọn̄ mi ofụri ofụri.+
ב [Behth]
9 Akparawa owo+ edisan̄a didie anam usụn̄ esie asana?Edi ke ndida ikọ fo n̄kpeme idemesie.+
10 Ami mmoyom fi ke ofụri esịt mi.+Kûyak mi nyo n̄kpọn̄ mme ewụhọ fo.+
11 Mmetịm nnịm ikọ fo ke esịt mi,+Mbak ndinam idiọkn̄kpọ ndue fi.+
12 Ekọm enyene fi, O Jehovah.Kpep mi mme ewụhọ fo.+
13 Mmada n̄kpọkinua mi ntan̄a+Kpukpru mme ubiereikpe inua fo.+
14 Mmadara mban̄a se afo etide mi,+Kpa nte ndarade mban̄a kpukpru ọsọn̄urua inyene eken.+
15 Nyetie n̄kere mme ewụhọ fo,+Nyonyụn̄ ntịn̄ enyịn ke mme usụn̄ fo.+
16 Koro nyama mme ewụhọ fo.+Ndifreke ikọ fo.+
ג [Gimel]
17 Nam n̄kpọ nte ọfọnde ye asan̄autom fo, man ami n̄kpodu uwem+N̄kponyụn̄ nnam ikọ fo.+
18 Fụhọde mi enyịn man n̄kpokụt+Mme utịben̄kpọ emi ẹdude ke ibet fo.+
19 Ami ndi esenowo ke isọn̄.+Kûdịp mi mme ewụhọ fo.+
20 Ukpọn̄ mi akpa mba+Koro mme ubiereikpe fo ẹdọn̄de mi kpukpru ini.+
21 Afo amasua ọnọ mbon iseri emi ẹma ẹkesụn̄i,+Emi ẹyode ẹkpọn̄ mme ewụhọ fo.+
22 Kpat esuene ye emiom kpọn̄ mi,+Koro nnamde se afo etide mi.+
23 Mbọn̄ ẹmebono; mmọ ẹmetie ye kiet eken ẹtịn̄ ikọ ẹdian mi.+Edi asan̄autom fo etie ekere mme ewụhọ fo.+
24 N̄ko, mmama se afo etide mi,+Mmọ ẹtie nte mbon item mi.+
ד [Daleth]
25 Ukpọn̄ mi amadiana ke ntan.+Nịm mi uwem nte ekemde ye ikọ fo.+
26 Mmobụk usụn̄ mi, man afo ọkpọbọrọ mi.+Kpep mi mme ewụhọ fo.+
27 Nam mi mfiọk usụn̄ emi mme ewụhọ fo ẹtemede,+Man n̄kpetie n̄kere mme utịbe utom fo.+
28 Mfụhọ iyakke ukpọn̄ mi ede idap.+Menede mi ke enyọn̄ nte ekemde ye ikọ fo.+
29 Sio mi usụn̄ nsu ke idem fep,+Nyụn̄ wụt mi mfọn ke ndinọ mi ibet fo.+
30 Ami mmemek usụn̄ akpanikọ.+Mmọfiọk ke mme ubiereikpe fo ẹfọn.+
31 Mmọsọn̄ọ mmụm se afo etide mi n̄kama.+O Jehovah, kûyak bụt anam mi.+
32 Ami nyọsọsọp nnịm mme ewụhọ fo,+Koro afo amanam esịt mi an̄wan̄a.+
ה [Heʼ]
33 O Jehovah, teme mi usụn̄ mme ewụhọ fo,+Man n̄kpenịm mmọ tutu esịm utịt.+
34 Nam mi mfiọk, man n̄kpeme ibet fo+Nnyụn̄ nnịm enye ke ofụri esịt mi.+
35 Nam mi nsan̄a ke usụn̄ oro mme ewụhọ fo ẹtemede,+Koro enye adatde mi esịt.+
36 Nam esịt mi ama se afo etide mi,+Kûyak ama udori.+
37 Nam enyịn mi ọwọn̄ọde ọkpọn̄ ndikụt obukpo n̄kpọ;+Nịm mi uwem ke usụn̄ fo.+
38 Nam se afo eketịn̄de nọ asan̄autom fo+Emi anamde enye abak fi.+
39 Nam esuene mi, emi mfehede, ebe efep,+Koro mme ubiereikpe fo ẹfọnde.+
40 Sese! mmoyom mme ewụhọ fo.+Nịm mi uwem ke edinen ido fo.+
ו [Waw]
41 O Jehovah, ima-mfọnido fo akpakam etiene mi,+Kpa edinyan̄a fo, nte ikọ fo edide,+
42 Man nda ikọ mbọrọ owo eke esuenede mi,+Koro mbuọtde idem ke ikọ fo.+
43 Kûsio ikọ akpanikọ ufep mi ke inua ofụri ofụri,+Koro ntiede mbet ubiereikpe fo.+
44 Ndien nyenịm ibet fo kpukpru ini,+Ke nsinsi nsinsi.+
45 Nyasan̄a n̄kanade ke ebiet emi atarade,+Koro mmodụn̄ọde nyom mme ewụhọ fo.+
46 Ami nyetịn̄ n̄ko mban̄a item* fo ke iso ndidem,+Bụt idinyụn̄ inamke mi.+
47 Nyenem esịt mban̄a mme ewụhọ fo+Emi ami mmade.+
48 Ndien nyemenede ekaubọk mi nnọ mme ibet fo emi ami mmade,+Nyonyụn̄ ntie n̄kere mme ewụhọ fo.+
ז [Zaʹyin]
49 Ti ikọ emi afo eketịn̄de ọnọ asan̄autom fo,+Emi afo anamde mi ntie mbet.+
50 Emi edi ndọn̄esịt ọnọ mi ke ukụt mi,+Koro ikọ fo enịmde mi uwem.+
51 Mbon iseri ẹsak mi ata akamba nsahi.+Edi ami n̄wọn̄ọkede n̄kpọn̄ ibet fo.+
52 O Jehovah, mmeti mme ubiereikpe fo toto ko,+Nnyụn̄ n̄kop ndọn̄esịt.+
53 Esịt enen̄ede ofụt mi aban̄a mme idiọkowo,+Emi ẹkpọn̄de ibet fo.+
54 Mme ewụhọ fo ẹkabade ndinem ikwọ ẹnọ mi+Ke ufọk eke ndan̄de nte esenowo.+
55 Mmeti enyịn̄ fo ke okoneyo, O Jehovah,+Man n̄kpenịm ibet fo.+
56 Emi etịbe ọnọ mi,Koro n̄kpemede mme ewụhọ fo.+
ח [Chehth]
57 Jehovah edi udeme mi;+Mmọn̄wọn̄ọ ndinam ikọ fo.+
58 Mmekpe fi ubọk ke ofụri esịt mi.+Tua mi mbọm nte afo ọkọdọhọde.+
59 Mmekere usụn̄ mi,+Man n̄wọn̄ọde ukot mi ntiene se afo etide mi.+
60 Mmawara nnam, nnamke ubịghi+Ndinịm mme ewụhọ fo.+
61 Urụk mme idiọkowo ẹkan mi ẹkụk.+Mfreke ibet fo.+
62 Ndaha nda ke ufọt okoneyo n̄kọm fi+Kaban̄a ndinen ubiereikpe fo.+
63 Ami ndụk nsan̄a ye kpukpru mbon oro ẹbakde fi,+Ye mbon oro ẹnịmde mme ewụhọ fo.+
64 O Jehovah, ima-mfọnido fo ọmọyọhọ isọn̄.+Kpep mi mme ewụhọ fo.+
ט [Tehth]
65 O Jehovah, afo amanam n̄kpọ nte ọfọnde ye asan̄autom fo,+Nte ekemde ye ikọ fo.+
66 Kpep mi eti ido+ ye eti ibuot+ ye ifiọk,+Koro mbuọtde idem ke mme ewụhọ fo.+
67 Mma ndue nnam idiọkn̄kpọ mbemiso ukụt esịmde mi,+Edi, ke emi, ami mmanam ikọ fo.+
68 Afo ọmọfọn onyụn̄ anam se ifọnde.+Kpep mi mme ewụhọ fo.+
69 Mbon iseri ẹmesu nsu ẹdori mi.+Edi ami nyekpeme mme ewụhọ fo ke ofụri esịt mi.+
70 Esịt mmọ omodoro ufiọn nte ikpọn̄.+Edi ami mmama ibet fo.+
71 Ọfọn ye ami nte n̄kụtde ukụt,+Man n̄kpep mme ewụhọ fo.+
72 Ibet+ inua fo ọfọn ye ami,+Akan ediwak mbak tọsịn gold ye silver.+
י [Yohdh]
73 Ubọk fo akanam mi, onyụn̄ etịm obot mi.+Nam mi nnyene ikike, man n̄kpep mme ewụhọ fo.+
74 Mbon oro ẹbakde fi ẹkụt mi ẹnyụn̄ ẹdara,+Koro ntiede mbet ikọ fo.+
75 O Jehovah, mmetịm mfiọk ke mme ubiereikpe fo ẹdi ndinen+Ye nte ke afo amanam akpanikọ ke nditụnọ mi.+
76 Mbọk, yak ima-mfọnido fo ọdọn̄ mi esịt,+Nte ekemde ye ikọ emi afo eketịn̄de ọnọ asan̄autom fo.+
77 Yak mbọm fo etiene mi, man n̄kpodu uwem;+Koro mmama ibet fo.+
78 Yak bụt anam mbon iseri, koro mmọ ẹtụnde mi usụn̄ ke unana ntak.+Edi ami ntie n̄kere mme ewụhọ fo.+
79 Yak mbon oro ẹbakde fi ẹfiak ẹtiene mi,+Kpa mbon oro ẹfiọkde item* fo.+
80 Yak esịt mi enịm mme ewụhọ fo nte ọfọnde ama,+Mbak bụt edinam mi.+
כ [Kaph]
81 Koro ukpọn̄ mi akpa mba ke ndibet edinyan̄a fo;+Koro ntiede mbet ikọ fo.+
82 Enyịn ebre mi ke ediyom ikọ fo,+Ke adan̄aemi ndọhọde nte: “Ini ewe ke afo edidọn̄ mi esịt?”+
83 Koro mmakabade ntie nte ekpeme ikpa+ emi nsụn̄ikan̄ an̄wande.Ami mfreke mme ewụhọ fo.+
84 Mme usen asan̄autom fo ẹwak didie?+Ini ewe ke afo edikpe ikpe ye mmọ eke ẹkọbọde mi?+
85 Mbon iseri ẹmetịbi obube ẹnịm ẹnọ mi,+Kpa mbon oro mîdụhe uwem nte ekemde ye ibet fo.+
86 Kpukpru mme ewụhọ fo ẹdi akpanikọ.+Mmọ ẹkọbọ mi ke unana ntak. Mbọk n̄wam mi.+
87 Ayak esisịt mmọ ẹkpesọhi mi ẹfep ke isọn̄;+Edi ami n̄kọkpọn̄ke mme ewụhọ fo.+
88 Nịm mi uwem nte ima-mfọnido fo edide,+Man n̄kpenịm item* emi otode inua fo.+
ל [Lamedh]
89 O Jehovah, ikọ fo omowụhọKe mme heaven ke nsinsi.+
90 Akpanikọ fo ebịghi ke ofụri emana.+Afo ọmọsọn̄ọ owụk isọn̄, man enye ọsọn̄ọ ada.+
91 Mmọ ẹmesọn̄ọ ẹda tutu esịm mfịn nte ekemde ye mme ubiereikpe fo,+Koro kpukpru mmọ ẹdide mme asan̄autom fo.+
92 Mîkpedịghe nte mmade ibet fo,+Ami n̄kpatak ke ukụt mi.+
93 Ndifreke mme ewụhọ fo ke nsinsi,+Koro afo adade mmọ enịm mi uwem.+
94 Ami ndi okwo. Mbọk nyan̄a mi,+Koro ndụn̄ọrede nyom mme ewụhọ fo.+
95 Koro idiọkowo edịbede ebet mi, man osobo mi.+Edi mmetịn̄ enyịn nnam se afo etide mi.+
96 Mmokụt utịt kpukpru se ifọnde ima.+Ewụhọ fo atara etieti.
מ [Mem]
97 Mmama ibet fo didie ntem!+Enye ke ntie n̄kere ofụri usen.+
98 Ewụhọ fo anam mi nnyene ọniọn̄ n̄kan mme asua mi,+Koro enye edide okịm ke nsinsi.+
99 Mmenyene ikike n̄kan kpukpru mme andikpep mi,+Koro ntiede n̄kere se afo etide mi.+
100 Mmọfiọk n̄kpọ n̄kan mbiowo,+Koro n̄kpemede mme ewụhọ fo.+
101 Mmakpan ukot mi ke kpukpru idiọk usụn̄,+Man n̄kpanam ikọ fo.+
102 N̄wọn̄ọkede n̄kpọn̄ mme ubiereikpe fo,+Koro afo etemede mi.+
103 Ikọ fo enịn̄e mi didie ntem ke nsịn̄,Akan aranọkwọk ke inua mi!+
104 Mme ewụhọ fo ẹnam mi nnam n̄kpọ ye eti ibuot.+Ntak edi oro nsuade kpukpru usụn̄ nsu.+
נ [Nun]
105 Ikọ fo edi utuenikan̄ ukot mi,+Ye un̄wana usụn̄ mi.+
106 Ami mmọn̄wọn̄ọ ndinịm ndinen ubiereikpe fo,+Nyonyụn̄ nnam.+
107 Mmokụt ukụt etieti.+O Jehovah, nịm mi uwem nte ekemde ye ikọ fo.+
108 Mbọk yak mme enọ unyịmesịt n̄kpọkinua mi enem fi esịt, O Jehovah,+Nyụn̄ kpep mi mme ubiereikpe fo.+
109 Ukpọn̄ mi odu ke itiendịk kpukpru ini;+Edi ami mfreke ibet fo.+
110 Idiọkowo emesịn afia ọnọ mi,+Edi ami n̄wọn̄ọkede n̄kpọn̄ mme ewụhọ fo.+
111 Mmada se afo etide mi nte inyene ke nsinsi,+Koro mmọ ẹdatde mi esịt.+
112 Mmebiere ke esịt mi ndinịm mme ewụhọ fo+Ke nsinsi, tutu esịm utịt.+
ס [Samekh]
113 Ami nsasua mbon emi mînamke n̄kpọ ke ofụri esịt,+Edi mmama ibet fo.+
114 Afo edi ebiet udịbe mi ye otuekọn̄ mi.+Koro ntiede mbet ikọ fo.+
115 Ẹdian̄ade ẹkpọn̄ mi, mbufo mme anamidiọk,+Man n̄kpeme mme ewụhọ Abasi mi.+
116 Mụm mi kama nte ikọ fo edide, man n̄kpodu uwem,+Kûnyụn̄ uyak bụt anam mi kaban̄a idotenyịn mi.+
117 Mụm mi kama, man nnyene edinyan̄a,+Ndien nyowụk enyịn nse mme ewụhọ fo kpukpru ini.+
118 Afo omotop kpukpru mbon oro ẹyode ẹkpọn̄ mme ewụhọ fo ọduọk;+Ke ntak abian̄a ye nsu mmọ.+
119 Afo omosion̄o kpukpru mme idiọkowo efep ke isọn̄ nte mbukpen̄.+Ntre ami mmama se afo etide mi.+
120 Ndịk fo anam mbọribọ odoro mi ke idem;+Mmokop ndịk ke ntak mme ubiereikpe fo.+
ע [ʽAyin]
121 Ami mmekpe edinen ikpe nnyụn̄ nnam se inende.+Mbọk kûyak mi unọ mmọ eke ẹtụkde mi!+
122 Tie ubiọn̄ nọ asan̄autom fo ke se ifọnde.+Kûyak mbon iseri ẹtụk mi.+
123 Enyịn ebre mi ke ndiyom edinyan̄a fo+Ye edinen ikọ fo.+
124 Nam ye asan̄autom fo nte ima-mfọnido fo edide,+Nyụn̄ kpep mi mme ewụhọ fo.+
125 Ami ndi asan̄autom fo.+ Nam mi nnyene ikike,+Man n̄kpọfiọk se afo etide mi.+
126 Ekem ini Jehovah ndinam n̄kpọ.+Mmọ ẹmebiat ibet fo.+
127 Ntem mmama mme ewụhọ fo+N̄kan gold, kpa gold emi ẹdụhọrede.+
128 Mmọdo mbatde ofụri ewụhọ fo kaban̄a kpukpru n̄kpọ ke edinen;+
Nsasua kpukpru usụn̄ nsu.+
פ [Peʼ]
129 Mme n̄kpọ oro afo etide mi ẹdi utịbe.+Mmọdo ukpọn̄ mi ekpemede mmọ.+
130 Edisiak ikọ fo ọnọ un̄wana,+Anam mme ọkọi ẹfiọk n̄kpọ.+
131 Mman̄wan̄ade inua mi, man n̄n̄wek,+Koro mme ewụhọ fo ẹdọn̄de mi.+
132 Wọn̄ọde se mi nyụn̄ tua mi mbọm,+Nte ido fo edide kaban̄a mmọ eke ẹmade enyịn̄ fo.+
133 Da ikọ fo nam ikpat mi ọsọn̄ọ ada,+Ndien kûyak orụk idiọkn̄kpọ ekededi akara mi.+
134 Fak mi sio ke ubọk owo utụk ekededi,+Ndien ami nyenịm mme ewụhọ fo.+
135 Nam iso fo ayama ọnọ asan̄autom fo,+Nyụn̄ kpep mi mme ewụhọ fo.+
136 Idịm mmọn̄ emewet osụhọde mi ke enyịn+Koro mmọ mînịmke ibet fo.+
צ [Tsadheh]
137 Afo edi edinen, O Jehovah,+Mme ubiereikpe fo ẹnyụn̄ ẹnen.+
138 Afo amada edinen ido ye ata akpanikọ owụk nnyịn+Ete inam mme n̄kpọ oro afo etide nnyịn.+
139 Ifiopesịt mi adia mi idem,+Koro mme asua mi ẹfrede ikọ fo.+
140 Ikọ fo asana etieti,+Asan̄autom fo onyụn̄ ama enye.+
141 Ẹmese mi ke usụhọde ẹnyụn̄ ẹsịn mi ke ndek.+Edi ami mfreke mme ewụhọ fo.+
142 Edinen ido fo edi nsinsi edinen ido,+Ibet fo onyụn̄ edi akpanikọ.+
143 Nnanenyịn ye mbaba ẹmesịm mi.+Edi mmama mme ewụhọ fo.+
144 Mme n̄kpọ oro afo etide mi ẹdi ndinen ke nsinsi.+Nam mi mfiọk, man n̄kpodu uwem.+
ק [Qohph]
145 Mmokot fi ke ofụri esịt mi.+ Yere mi, O Jehovah.+Nyenịm mme ewụhọ fo.+
146 Mmeseme n̄kot fi. Mbọk nyan̄a mi!+Ndien nyanam se afo etide mi.+
147 Mmabak ndemede ke tụhi-tụhi usenubọk,+ man nseme nyom un̄wam.+Koro ntiede mbet ikọ fo.+
148 Enyịn mi ebem mme ini ukpeme okoneyo iso,+Man n̄kere ikọ fo.+
149 Mbọk kop uyo mi nte ima-mfọnido fo edide.+O Jehovah, nịm mi uwem nte ekemde ye ubiereikpe fo.+
150 Mmọ eke ẹbịnede obukpo ido+ ẹmesan̄a ẹkpere;Mmọ ẹmekpọn̄ mbet fo anyan usụn̄.+
151 Afo emekpere, O Jehovah,+Kpukpru mme ewụhọ fo ẹnyụn̄ ẹdi akpanikọ.+
152 Mma mfiọk ndusụk n̄kpọ editi fo toto ko,+Koro afo owụkde mmọ ke nsinsi.+
ר [Rehsh]
153 Mbọk se ukụt mi, nyụn̄ nyan̄a mi;+Koro mmemfreke ibet fo.+
154 Mbọk kpe ikpe mi nyụn̄ nyan̄a mi;+Nịm mi uwem nte ekemde ye ikọ fo.+
155 Edinyan̄a odu nsannsan ọkpọn̄ mme idiọkowo;+Koro mmọ mîdụn̄ọkede iyom mme ewụhọ fo.+
156 Mbọm fo ẹmewak, O Jehovah.+Mbọk, nịm mi uwem nte ekemde ye mme ubiereikpe fo.+
157 Mme andikọbọ mi ye mme asua mi ẹmewak.+Edi ami n̄wọn̄ọkede n̄kpọn̄ se afo eketide mi.+
158 Mmokụt mbon emi ẹbian̄ade abian̄a ke edinam mmọ,+Ndien mmọ ẹfek mi, koro mmọ mînịmke ikọ fo.+
159 O sese nte mmade mme ewụhọ fo.+O Jehovah, nịm mi uwem nte ima-mfọnido fo edide.+
160 Ofụri ikọ fo edi akpanikọ,+Ndien kpukpru ndinen ubiereikpe fo ẹdu ke nsinsi.+
ש [Sin] m̀mê [Shin]
161 Mbọn̄ ẹmekọbọ mi ke unana ntak,+Edi ikọ fo esịn esịt mi edịghe.+
162 Ami mmadara mban̄a ikọ fo+Kpa nte owo adarade ke ini okụtde ediwak mbụme.+
163 Nsasua nsu,+ nnyụn̄ nse enye ke mbubiam.+Mmama ibet fo.+
164 Mmotoro fi utịm ikatiaba ke usen+Ke ntak ndinen ubiereikpe fo.+
165 Mmọ eke ẹmade ibet fo ẹnyene ediwak emem,+Mmọ inyụn̄ ikwe n̄kpọ iduọ baba kiet.+
166 Mmodori enyịn ke edinyan̄a fo, O Jehovah,+Mmonyụn̄ nnịm mme ewụhọ fo.+
167 Ukpọn̄ mi anam se afo etide mi,+Mmonyụn̄ mma mmọ etieti.+
168 Mmenịm mme ewụhọ fo nnyụn̄ nnam se afo etide mi,+Koro ofụri usụn̄ mi anade fi ke iso.+
ת [Taw]
169 Yak eseme mi edi ke iso fo, O Jehovah.+Mbọk nam mi nnyene ikike, nte ekemde ye ikọ fo.+
170 Yak eben̄e emi mben̄ede nyom mfọn edi ke iso fo.+Mbọk nyan̄a mi nte ekemde ye ikọ fo.+
171 Yak n̄kpọkinua mi an̄wan̄a itoro,+Koro afo ekpepde mi mme ewụhọ fo.+
172 Yak edeme mi atan̄a ikọ fo,+Koro kpukpru mme ewụhọ fo ẹdide edinen.+
173 Yak ubọk fo an̄wam mi,+Koro mmekde mme ewụhọ fo.+
174 Edinyan̄a fo ọdọn̄ mi, O Jehovah,+Mmonyụn̄ mma ibet fo.+
175 Ukpọn̄ mi akpakam odu uwem onyụn̄ otoro fi,+Mme ubiereikpe fo ẹnyụn̄ ẹn̄wam mi.+
176 Mmoyo nte erọn̄ eke osopde.+ Mbọk yom asan̄autom fo,+Koro mmemfreke mme ewụhọ fo.+
