Numbers 11;1-35
11 Ekem mbio emi ẹtọn̄ọ ndikụni nsịn Jehovah+ ke utọn̄ nte mbon oro n̄kpọ ọdiọkde akaha. Ke ini Jehovah okopde, enye ayat esịt etieti, ikan̄ onyụn̄ oto Jehovah edita ndusụk mmọ ke utịt utịt itienna.+
2 Ke ini mbio emi ẹsemede ẹnọ Moses, enye ekpe Jehovah ubọk,+ ndien ikan̄ oro enịme.
3 Ndien ẹsio ebiet oro enyịn̄ Taberah,+ koro ikan̄ Jehovah akasakde ke otu mmọ.
4 Ndien mbuaha otuowo+ emi ẹkedude ke otu mmọ ẹdiọk itọn̄,+ nditọ Israel n̄ko ẹtọn̄ọ ntak ẹtuan̄a ẹnyụn̄ ẹdọhọ ẹte: “Anie edinọ nnyịn unam ita?+
5 Nnyịn imeti iyak emi ikesitade ke Egypt ke ikpîkpu,+ mme cucumber ye watermelon ye leek ye eyịm ye garlic!
6 Edi ke emi nnyịn imasat ima. Nnyịn ikwe n̄kpọ ndomokiet ke mîbọhọke manna emi.”+
7 Manna+ eketie nte n̄kpasịp coriander,+ onyụn̄ ebiet itai bdellium.+
8 Mme owo ẹsuana ẹkewobi+ enye ẹnyụn̄ ẹkọk ke itiat ukọkn̄kpọ mîdịghe ẹtịm ke udụn̄, mmọ ẹnyụn̄ ẹtem enye ke eso utemudia,+ mîdịghe ẹda enye ẹnam ekara uyo, ndien enye ekenịn̄e nte inịn̄e-inịn̄e uyo emi ẹbuakde aran.+
9 Ndien ke ini mbara ọduọde ke itienna ke okoneyo, manna ọyọduọ n̄ko.+
10 Ndien Moses okop nte mme owo ẹtuan̄ade ke ufọk mmọ, owo kiet kiet ke enyịnusụn̄ tent esie. Ndien Jehovah ayat esịt etieti,+ n̄kpọ emi onyụn̄ ọdiọk Moses ke enyịn.+
11 Ekem Moses ọdọhọ Jehovah ete: “Ntak emi afo anamde n̄kpọ ọdiọk ye asan̄autom fo, ntak mûnyụn̄ uyakke n̄kụt mfọn ke iso fo, onyụn̄ emende mbiomo ofụri mbio emi odori mi ke idem?+
12 Ndi ami n̄koyomo ofụri mbio emi? Ndi ami n̄kaman mmọ, emi esịnde fi ọdọhọ mi ete, ‘Kama mmọ ke ikpanesịt fo,+ kpa nte edepeyen akamade eyen eke awapde eba,’+ ka ke isọn̄ emi afo ọkọn̄wọn̄ọde ọnọ mme ete ete mmọ?+
13 Ndida unam ke m̀mọ̀n̄ nnọ ofụri mbio emi? Koro mmọ ẹsụk ẹtuade ẹbịne mi, ẹdidọhọ ẹte, ‘Nọ nnyịn unam ita!’
14 Ami n̄kemeke ndibiom ofụri mbio emi ikpọn̄, koro mmọ ẹmedobi ẹkan mi.+
15 Ntre edieke anamde mi ntem, mbọk kam wowot mi,+ edieke n̄kụtde mfọn ke iso fo, kûyak mi ntie n̄kụt afanikọn̄ mi.”
16 Edi Jehovah ọdọhọ Moses ete: “Mek owo ata ye duop ke otu mbiowo Israel nọ mi,+ emi afo ọfiọkde ete ẹdi mbiowo mbon emi ye ikpọ owo mmọ,+ nyụn̄ da mmọ ka tent usopidem, ndien mmọ ẹnyene ndida do ye afo.
17 Ndien ami nyosụhọde ndi+ ndinyene nneme ye afo do;+ nyonyụn̄ mbọ fi ubak spirit+ emi afo enyenede nnọ mmọ, ndien mmọ ẹyen̄wam fi ẹbiom mbiomo mbio emi, mbak udubiom enye ikpọn̄.+
18 Nyụn̄ dọhọ mbio emi ete, ‘Ẹnam idem mbufo asana ẹben̄e n̄kpọn̄,+ koro mbufo ẹyeta unam, sia mbufo ẹketuade ẹsịn Jehovah ke utọn̄,+ ẹte: “Anie edinọ nnyịn unam ita, koro n̄kpọ ọkọfọnde ye nnyịn ke Egypt?”+ Ndien Jehovah ọyọnọ mbufo unam, mbufo ẹyenyụn̄ ẹta.+
19 Idịghe usen kiet m̀mê usen iba m̀mê usen ition m̀mê usen duop m̀mê usen edịp ke mbufo ẹdita,
20 edi ẹdita ke ofụri ọfiọn̄ kiet tutu enye ọwọrọ mbufo ke ibuo onyụn̄ efek mbufo,+ sia mbufo ẹkpọn̄de Jehovah emi odude ke ufọt mbufo, ẹnyụn̄ ẹtuade ke iso esie ẹte: “Ntak emi nnyịn ikọwọrọde ke Egypt?”’”+
21 Ndien Moses ọdọhọ ete: “Mbio emi ami ndude ke ufọt mmọ ẹdi irenowo tọsịn ikie itiokiet+ emi ẹsan̄ade ke ukot, ndien afo ọdọhọ ete, ‘Nyọnọ mmọ unam, ndien mmọ ẹyeta ke ofụri ọfiọn̄ kiet’!
22 Nte ẹdiwot ofụri otuerọn̄ ye ofụri otu enan̄ ẹnọ mmọ man ekem mmọ?+ Mîdịghe nte ẹdimụm ofụri iyak ke inyan̄ man ekem mmọ?”
23 Ntem Jehovah ọdọhọ Moses ete: “Nte ubọk Jehovah amakabade omụhọ?+ Ke emi ke afo edikụt m̀mê se ntịn̄de ọyọwọrọ ọnọ fi m̀mê idiwọrọke.”+
24 Ekem Moses ọwọrọ onyụn̄ emen uyo Jehovah eketịn̄ ọnọ mbio emi. Ndien enye anam owo ata ye duop ke otu mbiowo obio ẹsop idem onyụn̄ anam mmọ ẹda ẹkanade tent.+
25 Ndien Jehovah osụhọde edi ke obubịt enyọn̄+ edineme nneme ye enye+ onyụn̄ ọbọ enye ubak spirit+ emi okodorode enye ke idem ọnọ mbiowo ata ye duop oro. Ndien ke ndondo oro spirit emi odorode mmọ ke idem, mmọ ẹtọn̄ọ ndinam n̄kpọ nte mme prọfet; edi mmọ ikọtọn̄ọke ntak inam ntre aba.+
26 Edi owo iba ke otu mmọ ẹkesụk ẹdu ke itienna. Kiet ekekere Eldad, enye eken ekere Medad. Ndien spirit odoro mmọ ke idem sia mmọ ẹkedude ke otu mbon oro ẹkewetde enyịn̄, edi mîkọwọrọke ika tent. Ntre mmọ ẹtọn̄ọ ndinam n̄kpọ nte mme prọfet ke itienna.
27 Ndien akparawa kiet efehe akasian Moses ete: “Eldad ye Medad ke ẹnam n̄kpọ nte mme prọfet ke itienna!”
28 Ekem Joshua, eyen Nun, emi edide asan̄autom+ Moses toto ke uyen, ọdọhọ ete: “Ọbọn̄ mi Moses, kpan mmọ!”+
29 Edi Moses ọdọhọ enye ete: “Nte afo efịbe ufụp ọnọ mi? Kûfịbe, n̄kpakam mma kpukpru ikọt Jehovah ẹdi mme prọfet, koro Jehovah ọkpọnọ mmọ spirit esie!”+
30 Ekem Moses ye mbiowo Israel ẹnyọn̄ọ ẹka itienna.
31 Ndien ofụm+ oto Jehovah ọwọrọ onyụn̄ emen orụk inuen nte nsan̄kot ke inyan̄+ ọdọk edisuan ke itienna ke udomo oro oyomde usụn̄ ke isan̄ usen kiet ke n̄kan̄ emi ye isan̄ usen kiet ke n̄kan̄ oko, ẹkan itienna ẹkụk, ẹnyụn̄ ẹkon̄ ẹkpọn̄ isọn̄ ke cubit iba.
32 Edikem mbio oro ẹdaha ẹkemụm inuen oro ke ofụri uwemeyo ye ofụri okoneyo ye ke ndan̄nsiere. Idụhe owo eke omụmde se isụhọrede ikan homer+ duop, mmọ ẹnyụn̄ ẹsuan mmọ ẹyọhọ itienna.
33 Ke adan̄aemi unam oro osụk odude mmọ ke inua,+ ke mmọ mîkam itaha kan̄a, Jehovah ayat esịt etieti+ ye mmọ, Jehovah onyụn̄ owot ata ediwak mmọ.+
34 Ndien ẹsio ebiet oro enyịn̄ Kibroth-hattaavah,+ koro do ke mmọ ẹkebụk mbon idiọkitọn̄.+
35 Mme owo oro ẹdaha ke Kibroth-hattaavah ẹka Hazeroth, ẹnyụn̄ ẹdụn̄ ke Hazeroth.+
