Numbers 31;1-54
31 Ekem Jehovah ọdọhọ Moses ete:
2 “Sio mbon Midian+ usiene+ nọ nditọ Israel. Ndien ke oro ebede, afo ayakpa etiene orụk fo.”+
3 Ntre Moses ọdọhọ kpukpru owo ete: “Ẹtịm mme owo ke otu mbufo idem ẹben̄e ekọn̄, man mmọ ẹken̄wana ye Midian ẹnyụn̄ ẹda usiene Jehovah ẹsio Midian.+
4 Mbufo ẹsio owo tọsịn kiet ke esien Israel kiet kiet ẹnọ ẹka ekọn̄.”
5 Ntre mmọ ẹsio owo tọsịn kiet ke esien kiet kiet ke otu ediwak tọsịn+ ke Israel, owo tọsịn duopeba emi ẹtịmde idem ẹben̄e ekọn̄.+
6 Ekem Moses osio mmọ, owo tọsịn kiet ke esien kiet kiet, ọdọn̄ ẹka ekọn̄, mmọ ye Phinehas+ eyen Eleazar oku, emi akamade ndisana n̄kpoduoho ye mme obukpon̄+ ndifri.
7 Ndien mmọ ẹka ẹken̄wana ekọn̄ ye Midian, kpa nte Jehovah eketemede Moses, mmọ ẹnyụn̄ ẹwot kpukpru irenowo.+
8 Ndien mmọ ẹwot ndidem Midian ọkọrọ ye mmọ eken emi ẹkewotde, oro edi, Evi ye Rekem ye Zur ye Hur ye Reba, kpa ndidem ition ke Midian;+ mmọ ẹnyụn̄ ẹwot Balaam+ eyen Beor ke akan̄kan̄.
9 Edi nditọ Israel ẹtan̄ iban Midian ye nditọwọn̄ mmọ ẹnyọn̄ọ;+ mmọ ẹnyụn̄ ẹbụme kpukpru ufene mmọ ye kpukpru enan̄ mmọ ye kpukpru se mmọ ẹdade ẹdu uwem.
10 Ndien mmọ ẹfọp kpukpru mme obio emi mmọ ẹkedụn̄de ye kpukpru itienna emi ẹbọpde ibibene ẹkanade.+
11 Ndien mmọ ẹtan̄ mbụme+ ye kpukpru se mmọ ẹkemụmde, ke owo ye ke ufene.
12 Ndien mmọ ẹda mbuotekọn̄ ye kpukpru se ẹkemụmde ye mme n̄kpọ mbụme ẹdi ke iso Moses ye Eleazar oku ye esop nditọ Israel, ke itienna, ke unaisọn̄ desat Moab,+ emi odude ke mben Jordan ke Jericho.
13 Ekem Moses ye Eleazar oku ye kpukpru mbọn̄ esop ẹwọn̄ọ ẹka ndisobo ye mmọ ke edem itienna.
14 Ndien Moses ayat esịt ye mbon oro ẹkemekde ke otu mbonekọn̄,+ mme etubom mme tọsịn ye mme etubom mme ikie emi ẹkenyọn̄de ekọn̄ ẹdi.
15 Ntre Moses obụp mmọ ete: “Ndi mbufo ẹnịm kpukpru iban uwem?+
16 Sese! Mmọ emi ẹketap nditọ Israel, ke uyo Balaam, ẹsịn ẹnam idiọkn̄kpọ+ ẹdue Jehovah ke ikọ Peor,+ tutu ufen esịm esop Jehovah.+
17 Mmọdo ẹwot kpukpru irenowo ke otu nditọwọn̄, ẹnyụn̄ ẹwot kpukpru iban emi ẹfiọkde erenowo ke ndidan̄ ye erenowo.+
18 Edi mbufo ẹnịm kpukpru nditọiban emi mîfiọkke erenowo uwem.+
19 Ndien mbufo ẹdu ke edem itienna ke usen itiaba. Kpukpru owo emi ẹkewotde ukpọn̄+ ye kpukpru owo emi ẹketụkde owo emi ẹkewotde,+ ẹnyene ndinam idem asana+ ke ọyọhọ usen ita ye ke ọyọhọ usen itiaba, mbufo ye mbon oro mbufo ẹkemụmde nte mbuotekọn̄.
20 Ndien mbufo ẹnyene ndinam kpukpru ọfọn̄ ye kpukpru n̄kpọ emi ẹdade ikpa ẹnam ye kpukpru n̄kpọ emi ẹdade idet ebot ẹnam ye kpukpru n̄kpọ emi ẹdade eto ẹnam ẹsana ẹbọhọ idiọkn̄kpọ.”+
21 Ekem Eleazar oku ọdọhọ mbonekọn̄ emi ẹkekade ekọn̄ ete: “Emi edi ewụhọ oro Jehovah eketemede Moses ete,
22 ‘Sụk gold ye silver ye okpoho ye ukwak ye tian ye n̄ket,
23 kpukpru se ikemede ndidụk ikan̄,+ ke mbufo ẹdisịn ke ikan̄, ndien mmọ ẹyesana. Mbufo ẹda mmọn̄ oro ẹdade ẹnam owo asana ẹnam mmọ ẹsana.+ Ndien amaedi kpukpru se mîkemeke ndidụk ikan̄, mbufo ẹnyene ndida mmọn̄ nnam mmọ ẹsana.+
24 Ndien mbufo ẹnyene ndiyet mme ọfọn̄ mbufo ke ọyọhọ usen itiaba, nnyụn̄ nsana, ndien ke oro ebede mbufo ẹmekeme ndidụk itienna.’”+
25 Ndien Jehovah ọdọhọ Moses ete:
26 “Afo ye Eleazar oku ye etubom mme ete ofụri esop ẹbat n̄kpọ mbụme, se ẹkemụmde ke owo ye ke ufene.
27 Ndien afo enyene ndibahade n̄kpọ mbụme ke itie iba nnọ mbon oro ẹkekade ekọn̄ ye mbon esop eken.+
28 Ndien afo enyene ndibọ mbon emi ẹkekade ekọn̄ ukpọn̄ kiet ke otu ukpọn̄ ikie ition, ke owo ye ke enan̄ ye ke ass ye ke erọn̄ nte tax+ nnọ Jehovah.
29 Mbufo ẹnyene ndisio utomo emi ke otu ubak emi edide udeme mmọ nnọ Eleazar oku nte etịbe Jehovah.+
30 Ndien ke otu ubak emi edide udeme nditọ Israel, afo enyene ndisio kiet ke otu ukpọn̄ aba ye duop, ke owo ye ke enan̄ ye ke ass ye ke erọn̄, ke otu kpukpru orụk ufene, onyụn̄ enyene ndida mmọ nnọ nditọ Levi,+ mme andinam utom tent utuakibuot Jehovah.”+
31 Ndien Moses ye Eleazar oku ẹnam kpa nte Jehovah eketemede Moses.
32 Ndien n̄kpọ mbụme, kpa se ikosụhọde ke otu se mbonekọn̄ ẹkedade ẹnyọn̄ ẹdi, ẹkedi erọn̄ tọsịn ikie itiokiet ye ata ye efịt,
33 ye enan̄ tọsịn ata ye duopeba,
34 ye ass tọsịn ata ye kiet.
35 Amaedi mme ukpọn̄+ ke otu iban emi mîkọfiọkke irenowo,+ kpukpru mmọ ẹkedi ukpọn̄ tọsịn edịp ye duopeba.
36 Ndien ubak emi ekedide udeme mbon oro ẹkekade ekọn̄ ekedi erọn̄ tọsịn ikie ita ye edịp ye efịteba ikie ition.
37 Ndien tax+ emi ẹkesiode ẹnọ Jehovah ke otu erọn̄ ekedi ikie itiokiet ye ata ye efịt.
38 Ndien enan̄ ẹkedi tọsịn edịp ye efịtekiet, tax emi ẹkesiode ke otu mmọ ẹnọ Jehovah okonyụn̄ edi ata ye duopeba.
39 Ndien ass ẹkedi tọsịn edịp ye duop ikie ition, tax emi ẹkesiode ke otu mmọ ẹnọ Jehovah okonyụn̄ edi ata ye kiet.
40 Ndien owo ẹkedi tọsịn efịtekiet, tax emi ẹkesiode ke otu mmọ ẹnọ Jehovah okonyụn̄ edi ukpọn̄ edịp ye duopeba.
41 Ekem Moses emen tax ọnọ Eleazar oku nte etịbe Jehovah,+ kpa nte Jehovah okowụkde Moses.+
42 Ndien emi edi ubak emi ekedide udeme nditọ Israel, emi Moses akabaharede osio ke otu se mbon emi ẹken̄wanade ekọn̄ ẹkedade ẹdi:
43 Ubak emi ekedide udeme ofụri esop ekedi erọn̄ tọsịn ikie ita ye edịp ye efịteba ikie ition,
44 ye enan̄ tọsịn edịp ye efịtekiet,
45 ye ass tọsịn edịp ye duop ikie ition,
46 ye owo* tọsịn efịtekiet.
47 Ndien ke ubak emi ekedide udeme nditọ Israel, Moses osio kiet ke otu aba ye duop, ke owo ye ke ufene, ada ọnọ nditọ Levi,+ mme anamutom+ tent utuakibuot Jehovah, kpa nte Jehovah okowụkde Moses.
48 Ndien mbon oro ẹkemekde ke otu ediwak tọsịn mbonekọn̄,+ mme etubom mme tọsịn ye mme etubom mme ikie,+ ẹdi ke ọtọ Moses,
49 ẹnyụn̄ ẹdidọhọ Moses ẹte: “Nnyịn mme asan̄autom fo imabat mbonekọn̄ emi nnyịn isede iban̄a ndien owo mmọ baba kiet itakke.+
50 Ntre yak nnyịn owo kiet kiet ida se nnyịn ikokụtde idi nte uwa Jehovah,+ mme n̄kpọ emi ẹnamde ke gold, n̄kpọmbana itọn̄ukot, ye n̄kpọubọk, n̄kpanuen ufịk idiọn̄ọ,+ n̄kpanuen utọn̄, ye n̄kpọmbana iban,+ man isio isop ukpọn̄ nnyịn ke iso Jehovah.”
51 Ntem Moses ye Eleazar oku ẹbọ mmọ+ gold oro ye kpukpru n̄kpọmbana oro.
52 Ndien kpukpru etịbe gold emi ẹkebọde mme etubom mme tọsịn ye mme etubom mme ikie ẹnọ Jehovah ẹkedi shekel tọsịn efịtekiet, ikie itiaba ye aba ye duop.
53 Mbonekọn̄ ẹma ẹbụme n̄kpọ ẹda ke idemmọ.+
54 Ntre Moses ye Eleazar oku ẹbọ mme etubom mme tọsịn ye mme etubom mme ikie mme gold emi ẹda ẹdụk tent usopidem nte n̄kpọ editi+ ọnọ nditọ Israel ke iso Jehovah.
Mme Ikọ Idakisọn̄
^ At. Ed., “ukpọn̄ owo.”
