Rome 10;1-21
10 Nditọete, se idọn̄de mi ye se mben̄ede Abasi nnọ mmọ edi nte mmọ ẹnyene edinyan̄a.+
2 Koro ndi ntiense nnọ mmọ nte ke mmọ ẹnyene ifịk+ ẹban̄a Abasi; edi emi isan̄ake ye nnennen ifiọk;+
3 koro, sia mmọ mîfiọkke edinen ido Abasi+ edi ẹyomde ndinam edinen ido idemmọ ọsọn̄ọ ada,+ mmọ isụkke idem inọ edinen ido Abasi.+
4 Koro Christ anam Ibet etre,+ man owo ekededi eke ọbuọtde idem ekpenyene edinen ido.+
5 Koro Moses ewet ete ke owo eke anamde edinen ido Ibet edida oro odu uwem.+
6 Edi edinen ido oro otode mbuọtidem etịn̄ ntem ete: “Kûdọhọ ke esịt+ fo ete, ‘Anie edidọk okodụk heaven?’+ oro edi, man ada Christ+ osụhọde edi;
7 mîdịghe, ‘Anie edisụhọde okodụk ke editụn̄ọ ukpe?’+ oro edi, man akada Christ oto ke n̄kpa ọwọrọ edi.”+
8 Edi nso ke enye ọdọhọ? “Ikọ emekpere fi, ke inua fo ye ke esịt fo”;+ oro edi, “ikọ”+ mbuọtidem, emi nnyịn ikwọrọde.+
9 Koro edieke afo atan̄ade ‘ikọ oro ke inua+ fo’ an̄wan̄wa, ete Jesus edi Ọbọn̄,+ onyụn̄ adade esịt fo ọbuọt idem ete, Abasi akanam enye eset ke n̄kpa,+ ẹyenyan̄a fi.+
10 Koro owo ada esịt+ ọbuọt idem enyene edinen ido, edi ada inua atan̄a an̄wan̄wa+ enyene edinyan̄a.
11 Koro N̄wed Abasi ọdọhọ ete: “Owo eke ọbuọtde idem+ ye enye idikwe edikpu.”+
12 Koro ubahade idụhe ke ufọt Jew ye Greek,+ koro Ọbọn̄ kiet akara mmọ kpukpru, onyụn̄ ọnọnọ kpukpru mmọ eke ẹsemede ẹkot enye n̄kpọ uwak uwak.+
13 Koro “ẹyenyan̄a kpukpru owo eke ẹsemede ẹkot enyịn̄ Jehovah.”+
14 Edi, mmọ ẹdinam didie ẹseme ẹkot enye emi mmọ mîbuọtke idem?+ Mmọ ẹdinyụn̄ ẹnam didie ẹbuọt idem ye enye emi mmọ mîkopke iban̄a? Mmọ ẹdinyụn̄ ẹnam didie ẹkop ke ọkwọrọikọ mîdụhe?+
15 Mmọ ẹdinam didie ẹkwọrọ ke mîbọhọke ẹdọdọn̄ mmọ?+ Kpa nte ẹwetde ẹte: “Ikpat mmọ oro ẹtan̄ade eti mbụk nti n̄kpọ ẹye didie ntem!”+
16 Edi, idịghe kpukpru mmọ ẹkesụk ibuot ẹnọ eti mbụk.+ Koro Isaiah ọdọhọ ete: “Jehovah, anie ọkọbuọt idem ke mme n̄kpọ oro ẹkekopde ẹto nnyịn?”+
17 Ntre mbuọtidem oto ke n̄kpọ oro ẹkopde.+ N̄ko n̄kpọ oro ẹkopde oto ikọ emi aban̄ade Christ.+
18 Edi mbụp nte, Ndi mmọ ikokopke? Ke akpanikọ, “uyom mmọ ọmọwọrọ+ ekesịm ofụri isọn̄, ikọ mmọ omonyụn̄ ẹsịm mme utịt isọn̄.”+
19 Edi mbụp nte, Ndi Israel ikọfiọkke?+ Moses ebem iso ọdọhọ ete: “Nyada se mîdịghe idụt nnam mbufo ẹfịbe ufụp; nyada idụt eke mînyeneke ibuot nnam esịt enen̄ede ayat mbufo.”+
20 Edi Isaiah enyene uko etieti onyụn̄ ọdọhọ ete: “Mbon oro mîkoyomke mi ẹma ẹkụt mi;+ mmayarade idem n̄wụt mbon oro mîkobụpke iban̄a mi.”+
21 Edi enye etịn̄ aban̄a Israel ete: “Mmanyan ubọk mi ofụri usen nnọ mbon oro ẹdide mbon ntụtutọn̄+ emi ẹnyụn̄ ẹbọrọde ikọ ke usọn̄enyịn.”+
