Utom 20;1-38
20 Edi ke ndutịme oro ama okodobo, Paul ọdọn̄ ẹkekot mme mbet ẹdi, ndien ke enye ama ekesịn udọn̄ ọnọ mmọ onyụn̄ ọkọm mmọ unyọn̄,+ enye adaha aka Macedonia.+
2 Ke ama akasan̄a ke mme ikpehe oro onyụn̄ ada ediwak ikọ+ esịn udọn̄ ọnọ mbon oro ẹdude do, enye ebe edi Greece.
3 Ndien ke enye ama okodu do ọfiọn̄ ita, enye ebiere ndisan̄a Macedonia nnyọn̄ koro mme Jew ẹdụkde odu+ ẹban̄a enye nte enye oyomde ndisio n̄ka Syria.
4 Mbon oro ẹkesan̄ade ye enye ẹkedi Sopater+ eyen Pyrrhus owo Beroea, Aristarchus+ ye Secundus mbon Thessalonica, ye Gaius owo Derbe, ye Timothy,+ ye Tychicus+ ye Trophimus+ emi ẹtode Asia.*
5 Mmọ emi ẹbe ẹka iso ẹnyụn̄ ẹkebet nnyịn ke Troas;+
6 edi nnyịn isio ikpọn̄ Philippi ke mme usen usọrọ uyo eke leaven mîdụhe+ ẹma ẹkebe, inyụn̄ idisịm mmọ ke Troas+ ke usen ition; ndien nnyịn idu do usen itiaba.
7 Ke akpa usen+ urua, ke ini nnyịn isopde idem ọtọkiet ndidia udia, Paul ọtọn̄ọ nditịn̄ ikọ nnọ mmọ emi ẹsọpde idem, sia enye akaduakde ndikpọn̄ do ke ndan̄nsiere; ndien enye etịn̄ ikọ ebịghi tutu esịm ufọt okoneyo.
8 Ntre ediwak utuenikan̄ ẹma ẹdu ke ubet enyọn̄+ emi nnyịn ikosopde idem.
9 Akparawa kiet emi ekerede Eutychus etie ke window ede ọkpọsọn̄ idap ke adan̄aemi Paul osụk etịn̄de ikọ ndien idap akan enye, enye onyụn̄ oto ke ọyọhọ enyọn̄ iba adian̄ade ọduọ ke isọn̄ ndien ke ini ẹmende enye, enye ama akpa.
10 Edi Paul osụhọde isọn̄, ọkọduọ ofụk enye+ onyụn̄ afat enye onyụn̄ ọdọhọ ete: “Ẹtre ndisịn editịm, koro ukpọn̄* esie odu enye ke idem.”+
11 Ekem enye ọdọk enyọn̄ ọkọtọn̄ọ ndidia udia, ndien ke ama ekeneme nneme ebịghi, tutu esịm usiere, enye adaha ọnyọn̄.
12 Ntre mmọ ẹmen eyen oro ẹdaha ye uwem ẹnyụn̄ ẹnen̄ede ẹkop ndọn̄esịt.
13 Edi nnyịn ibem iso idiere ke ubom isio ika Assos, emi nnyịn ikaduakde ndikemen Paul ke ubom, koro enye eketemede nnyịn ete inam ntre, sia enye ke idemesie akaduakde ndisasan̄a.
14 Ntre ke ini enye osobode ye nnyịn ke Assos, nnyịn imen enye ke ubom isio ika Mitylene;
15 ndien, ke ini isiode ikpọn̄ do ke usen efen, nnyịn idisịm nsakiso Chios, edi ke ndan̄nsiere nnyịn idian ke Samos, ndien ke edem usen oro nnyịn idisịm Miletus.
16 Koro Paul ekebierede ndiwat mbe Ephesus,+ mbak enye edibiat ini ndomokiet ke Asia;* koro enye okoyomde ndiwara nsịm Jerusalem+ ke usen usọrọ Pentecost edieke enye ekemede.
17 Nte ededi, enye etie ke Miletus ọdọn̄ ẹka Ephesus ẹkekot mbiowo+ esop ẹdi.
18 Ke ini mmọ ẹdide ẹdisịm, enye ọdọhọ mmọ ete: “Mbufo ẹmetịm ẹfiọk ẹte ọtọn̄ọde ke akpa usen emi n̄kodụkde Asia*+ n̄kodu ye mbufo ke ofụri ini oro,+
19 ndụk ufụn+ nnọ Ọbọn̄ ke ata nsụhọdeidem+ ye mmọn̄eyet ye idomo eke ẹtode ke odu+ mme Jew esịm mi;
20 ke adan̄aemi mmen̄ketreke ndisian mbufo n̄kpọ ekededi eke odorode mbufo udori n̄konyụn̄ ntreke ndikpep+ mbufo n̄kpọ an̄wan̄wa ye ke ufọk+ ke ufọk.
21 Edi mma nnọ mme Jew ye mme Greek* ọyọhọ ikọ ntiense+ mban̄a edikabade esịt+ ntiene Abasi ye edinyene mbuọtidem ke Ọbọn̄ nnyịn Jesus.
22 Ndien ke emi, sese! spirit+ enyịk mi ete ndaha n̄ka Jerusalem, okposụkedi mmemfiọkke mme n̄kpọ eke ẹdiwọrọde mi do,
23 ke mîbọhọke emi edisana spirit+ etiede ntiense ndien ndien ọnọ mi ke kpukpru obio ete n̄kpọkọbi ye ukụt ke ẹna ẹbet mi.+
24 Edi, mbatke ukpọn̄ mi ke n̄kpọ,+ man n̄kpekeme ndifehe mbuba+ mi mma nnyụn̄ nnam utom+ emi n̄kọbọde+ nto Ọbọn̄ Jesus, ndinọ ọyọhọ ikọ ntiense mban̄a eti mbụk mfọnido Abasi oro owo mîdotke.+
25 “Ndien ke emi, sese! mmọfiọk nte ke kpukpru mbufo emi n̄kasan̄ade ke otu mbufo n̄kwọrọ obio ubọn̄ idikwe mi iso aba.
26 Ntem ke n̄kot mbufo ẹdidi ntiense mfịn emi nte ke mmasana ke iyịp+ kpukpru owo,
27 koro mmen̄ketreke ndisian mbufo ofụri uduak+ Abasi.
28 Ẹkpeme+ idem mbufo+ ye ofụri otuerọn̄,+ emi edisana spirit ekemekde mbufo ke otu mmọ nte mme esenyịn,+ ete ẹkpeme esop Abasi,+ emi enye ekedepde ke iyịp+ Eyen esie.
29 Mmọfiọk nte ke mma nnyọn̄ ndiọi wolf+ ẹyedụk ke otu mbufo idinyụn̄ inamke n̄kpọ ke mbọm ye otuerọn̄,
30 ndien mme owo ẹyedaha ẹda ke otu mbufo ẹtịn̄ ukwan̄ ikọ+ man ẹdụri mme mbet ẹnọ idemmọ.+
31 “Ke ntre ẹdu ke edidemede, ẹnyụn̄ ẹti ẹte ke isua ita,+ okoneyo ye uwemeyo, n̄ketreke nditeme+ mbufo owo kiet kiet n̄kpọ ye mmọn̄eyet.
32 Ndien ke emi mmayak mbufo nnọ Abasi+ ye ikọ mfọnido esie oro owo mîdotke, kpa ikọ emi ekemede ndibọp mbufo ẹkọri+ nnyụn̄ nnọ mbufo udeme ke otu kpukpru mbon emi ẹnamde ẹsana.*+
33 N̄kesịnke esịt ke silver m̀mê ke gold m̀mê ke edisịnen̄kpọ owo baba kiet.+
34 Mbufo ẹmefiọk ẹte n̄kada ubọk mi emi n̄n̄wana idem nyom se inanade mi+ ye se inanade mmọ emi ẹdude ye ami.
35 N̄kenịm uwụtn̄kpọ nnọ mbufo ke kpukpru n̄kpọ nte, ebede ke ndinam utom+ ntem mbufo ẹnyene ndin̄wam mbon mmemidem,+ ẹnyụn̄ ẹti ikọ Ọbọn̄ Jesus, ke ini enye ọkọdọhọde ete, ‘Inemesịt odu ke ndinọnọ+ akan ke ndibọbọ.’”
36 Ndien ke enye ama eketịn̄ mme n̄kpọ emi ama, enye ọtọn̄ọ edọn̄+ ọbọn̄ akam ye kpukpru mmọ.
37 Ke akpanikọ, ọkpọsọn̄ ntuan̄a odu ke otu mmọ kpukpru, mmọ ẹnyụn̄ ẹwan̄a Paul ke itọn̄+ ẹtịm enye inua+ ima ima,
38 koro mmọ ẹfụhọde etieti ẹban̄a ikọ oro enye eketịn̄de ete mmọ idikwe imọ iso+ aba. Ntre mmọ ẹda enye ẹkeyak+ ke ubom.
Mme Ikọ Idakisọn̄
^ M̀mê, “uwem.”
^ Eyedi emi aban̄a mbon oro ẹkesemde usem Greek, kpa mbon emi mîkedịghe mme Jew.
^ M̀mê, “ẹdian̄arede ẹnịm ẹnọ Abasi.”
