Utom 24;1-27
24 Usen ition ke ukperedem, Ananias+ akwa oku osụhọde edi ye ndusụk mbiowo ye Tertullus emi edide etịn̄ikọ ke esopikpe, ndien mmọ ẹtịn̄ ikọ+ ẹdian Paul ẹnọ andikara.+
2 Ke ini ẹkotde enye edi, Tertullus ọtọn̄ọ ndidori enye ikọ, ete:
“Sia otode fi ke nnyịn inyene akwa emem,+ mme ukpụhọde ẹnyụn̄ ẹdade itie ke idụt emi oto ke eti ekikere fo,
3 nnyịn imadara mme n̄kpọ emi ye ọyọhọ esịtekọm kpukpru ini ye ke kpukpru ebiet, Ata Eti+ Felix.
4 Edi mbak ndika iso mfịna fi, mmekpe fi ubọk nte okop ekpri ikọ nnyịn ke mfọnido fo.
5 Koro nnyịn imokụt ke owo emi edi owo ntịme+ onyụn̄ edemede ndutịme+ ke otu kpukpru mme Jew ke ofụri isọn̄ onyụn̄ edi adaiso ke n̄ka mbon Nazareth,+
6 enye edi owo emi okodomode ndisabade temple+ ndien nnyịn imụm enye.
7 * ——
8 Afo emekeme ndibụp enye ke idemfo mfiọk kpukpru n̄kpọ eke nnyịn itịn̄de idian enye.”
9 Edi mme Jew n̄ko ẹtiene ẹdian uyo ke edori ikọ emi, ẹsọn̄ọ ẹtịn̄ ẹte mme n̄kpọ emi ẹdi ntre.
10 Ndien ke ini andikara otopde ibuot ete enye etịn̄ ikọ, Paul ọbọrọ ete:
“Sia mfiọkde nte ke idụt emi enyene fi nte ebiereikpe ke ediwak isua, enem mi esịt nditịn̄ ikọ n̄kan̄ idem+ ke mme n̄kpọ ẹban̄ade mi,
11 koro afo ekemede ndibụp mfiọk nte ke ibehe usen duopeba nte n̄kọdọk n̄ka Jerusalem ndituak ibuot;+
12 mmọ inyụn̄ ikwe mi nte mfan̄ade n̄kpọ ye owo ndomokiet ke temple+ m̀mê nte ndemerede otu mbon ntịme+ ẹsịn ntịme, edide ke synagogue m̀mê ke ofụri obio emi.
13 Mmọ inyụn̄ ikemeke ndisọn̄ọ+ mme n̄kpọ eke mmọ ẹdoride mi ke emi.
14 Edi mmenyịme ke iso fo, nte, amaedi usụn̄ emi mmọ ẹkotde ‘n̄ka,’ kpa ke usụn̄ emi ke ami nnam edisana utom nnọ Abasi mme ete ete+ mi, sia mmenịm kpukpru se ẹwetde ke Ibet+ ye uwetn̄kpọ mme Prọfet ke akpanikọ;
15 ndien mmenyene idotenyịn+ ke Abasi, kpa idotenyịn emi mme owo emi nde ẹnyenede, nte ke ndinen+ owo ye mme anam ukwan̄n̄kpọ+ ẹyeset ke n̄kpa.+
16 Ntem, ke n̄n̄wana kpukpru ini ndinyene eti ubieresịt+ eke mîduehe Abasi ye owo.
17 Ntre ke ata ediwak isua ẹma ẹkebe ami nto ndi ndida mme enọ mbọm nsọk idụt mi, nnyụn̄ nda enọ+ nsọk Abasi.
18 Ke adan̄aemi nsụk nnamde mme n̄kpọ emi, mmọ ẹkụt mi ke temple+ ke mma n̄kanam idem asana nte ekemde ye ibet, edi nsan̄ake ye otuowo nnyụn̄ nsịnke ntịme. Edi ndusụk mme Jew emi ẹtode Asia* ẹma ẹdu do,
19 emi ẹkpedude mi ke iso fo ndidori mi ikọ edieke mmọ ẹnyenede n̄kpọ ekededi nditịn̄ ndian mi.+
20 Mîdịghe, yak mbon emi ẹdude mi ẹtịn̄ ndudue eke mmọ ẹkekụtde ke ini n̄kadade ke iso Sanhedrin,
21 ke mîbọhọke ini kiet emi n̄kosiorode uyo ke adan̄aemi ndade ke otu mmọ nte, ‘Ẹkot mi ikpe ke iso mbufo mfịn emi ẹban̄a ediset mme akpan̄kpa!’”+
22 Nte ededi, Felix+ emi ọfiọkde mme n̄kpọ eke ẹban̄ade Usụn̄+ emi ata nnennen nnennen, anam mbon oro ẹbet onyụn̄ ọdọhọ ete: “Ini ekededi emi Lysias+ etubom ekọn̄ osụhọrede edi, nyebiere ikọ mbufo.”
23 Ndien enye owụk akwa owoekọn̄ ete ekpeme owo emi onyụn̄ ọnọ enye ndusụk ifụre ke ufọk-n̄kpọkọbi, okûnyụn̄ akpan baba owo kiet ke otu ikọt esie ndidi ndinam n̄kpọ nnọ enye.+
24 Ke ndusụk usen ẹma ẹkebe Felix+ asan̄a ye n̄wan esie Drusilla, emi edide eyen Jew,+ edisịm, onyụn̄ ọdọn̄ ẹkekot Paul ẹdi onyụn̄ akpan̄ utọn̄ okop se enye etịn̄de aban̄a mbuọtidem ke Christ Jesus.+
25 Edi nte enye etịn̄de aban̄a edinen ido+ ye mfara ke idem+ ye ubiereikpe+ eke edidide, Felix okop ndịk onyụn̄ ọbọrọ ete: “Ka okwo kan̄a, mma nnyene ifet nyọtọn̄ọ ntak ndọn̄ ẹdikot fi.”
26 Edi, enye okodori enyịn ete Paul ọyọnọ imọ okụk.+ Ke ntak oro enye esidọn̄ ẹkekot enye ndien ndien onyụn̄ enyene nneme ye enye.+
27 Edi, ke isua iba ẹma ẹkebe, Porcius Festus ada itie Felix; ndien sia Felix okoyomde ndikụt mfọn+ ke iso mme Jew, enye ọkpọn̄ Paul ke n̄kpọkọbi.
