Ibịghike Obio Ubọn̄ Abasi, oro edi, ukara Abasi oro edikarade ofụri ererimbot, ayanam kpukpru owo ẹdu ke emem ẹnyụn̄ ẹdiana kiet. “Ediwak emem oyodu,” nte Psalm 72:7 ọdọhọde. Edi ini ewe ke Obio Ubọn̄ Abasi editọn̄ọ ndikara ofụri isọn̄? Didie ke enye edikara? Ndien nso ke akpanam man etiene odu ini oro?

Bible etịn̄ ediwak n̄kpọ emi ẹditịbede mbemiso Obio Ubọn̄ Abasi edide. Ndusụk ke otu mmọ ẹdi ekọn̄ ke nsio nsio idụt, akan̄, ndiọi udọn̄ọ, ediwak unyekisọn̄, ye ubiatibet nditọt. Kpukpru emi ẹdi “idiọn̄ọ” oro owụtde ke Obio Ubọn̄ Abasi ọmọn̄ ededi.—Matthew 24:3, 7, 12; Luke 21:11; Ediyarade 6:2-8.

Prọfesi en̄wen ọdọhọ ete: “Ndiọkeyo emi ọsọn̄de ndiyọ oyodu ke mme akpatre usen. Koro mme owo ẹyedi mme ama idem, mme ama okụk, . . . ẹsọn̄ ibuot ye ete ye eka, ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, . . . ẹkohode idem, ẹma unọ idem inemesịt utu ke ndima Abasi.” (2 Timothy 3:1-4) Mme owo ẹma ẹsidọdiọk toto ke eset. Edi idahaemi ke mmọ ẹdiọk ẹkan.

Mme prọfesi oro ẹketọn̄ọ ndisu ke 1914. Mme ewetmbụk eset, ikpọ mbon ukara, ye mme ewetn̄wed ẹtịn̄ nte ererimbot okokpụhọrede ke 1914 ama ekebe. Ke uwụtn̄kpọ, Peter Munch, ewetmbụk eset emi otode Denmark, ekewet ete: ‘Ekọn̄ oro eketịbede ke 1914 ama okpụhọde kpukpru n̄kpọ ke mbụk ubonowo. Mbemiso isua oro, mme owo ẹkekere ke n̄kpọ ọmọn̄ ọtọn̄ọ ndifọn, edi ẹtise ẹdikụt afanikọn̄, afai, usua, ye ntịme ke kpukpru ebiet.’

Edi kpukpru emi etie nte ikọ emi ẹsidọhọde ke ọdiọkde-diọk aka ndifọfọn. Mme n̄kpọ oro ẹtịbede ke ererimbot ẹwụt ke ini emi Obio Ubọn̄ Abasi edikarade ofụri isọn̄ emi ekpere. Eti mbụk edi emi. Jesus ọkọdọhọ ke “[ẹyekwọrọ] eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”—Matthew 24:14.

Eti mbụk oro edi akpan etop emi Mme Ntiense Jehovah ẹkwọrọde. Akpan n̄wed mmọ ekere Enyọn̄-Ukpeme Ọnọ Ntọt Obio Ubọn̄ Jehovah. Ẹsiwak ndiwet mban̄a nti n̄kpọ oro Abasi edidade Obio Ubọn̄ esie inam inọ mme owo ke isọn̄ emi.

N̄kpọ inan̄ emi owụt nte Obio Ubọn̄ Abasi edikarade:

1. Abasi ididaha mbon ukara ererimbot emi ikara.

2. Mbon ukara ererimbot emi idimaha ndisana ukara nyak, ntre mmọ ẹyeyom ndibiọn̄ọ ukara Abasi.—Psalm 2:2-9.

3. Ana Obio Ubọn̄ Abasi osobo mme ukara ererimbot emi ẹyomde ndika iso n̄kara. (Daniel 2:44; Ediyarade 19:17-21) Akpatre en̄wan emi ẹdin̄wanade mi ke ofụri ererimbot ke ẹkot Armageddon.—Ediyarade 16:14, 16.

4. Kpukpru mbon oro ẹdade ẹnọ ukara Abasi ẹyebọhọ Armageddon ẹdụk obufa ererimbot emi emem edidude. Mmọ ke Bible okot “akwa otuowo,” ndien etie nte mmọ ẹyesịm ediwak miliọn.—Ediyarade 7:9, 10, 13, 14.

Akpa n̄kpọ oro anade owo anam man etiene odụk Obio Ubọn̄ Abasi edi ndikpep Bible. Jesus ọkọdọhọ ke akam oro enye ọkọbọn̄de ọnọ Abasi ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.

Mme owo ẹsinen̄ede ẹdia ufọn ke ini mmọ ẹdide ẹdifiọk Jehovah Abasi. Yak ise ufọn iba oro mmọ ẹsidiade: Akpa, mmọ ẹsinen̄ede ẹbuọt idem ye Abasi. Ndien mbuọtidem emi esinam mmọ ẹnịm ke Obio Ubọn̄ Abasi edi ata ukara, ke enye ọmọn̄ ọtọtọn̄ọ ndikara isọn̄ emi. (Mme Hebrew 11:1) Ọyọhọ iba, mmọ ẹsidọdiọn̄ ẹma Abasi ye mme owo. Ima emi mmọ ẹmade Abasi esinam mmọ ẹkop uyo esie ke ofụri esịt. Ima emi mmọ ẹmade mme owo esinam mmọ ẹnam item Jesus emi: “Nte mbufo ẹyomde mme owo ẹnam n̄kpọ ye mbufo, ẹnam kpasụk ntre ye mmọ.”—Luke 6:31.

Abasi emi okobotde nnyịn oyom n̄kpọ ọfọn ye nnyịn nte edima ete esiyomde n̄kpọ ọfọn nditọ esie. Enye oyom nnyịn inyene se Bible okotde “ata uwem.” (1 Timothy 6:19) Uwem oro idude idahaemi idịghe “ata uwem.” N̄kpọ ọsọn̄ ye ediwak owo tutu mmọ idiọn̄ọke m̀mê iyodu uwem isiere n̄kpọn̄. Man ọfiọk nte “ata uwem” editiede, yak ise ndusụk ke otu ediwak nti n̄kpọ oro Abasi edinamde inọ mme owo ke Obio Ubọn̄ esie.