Owo ndibiere se enye edinamde idịghe ukem ye enye nditie n̄kere se imọ ikpoyomde etịbe. Ana enye etie ekere nte enye edinamde n̄kpọ oro, ekere se enye edinamde edieke n̄kpọ mîsan̄ake nte enye ekekerede, onyụn̄ esịn idem anam se enye ekebierede.

Emekeme ndibiere se edinamde ke usen ke usen, ke urua ke urua, ke ọfiọn̄ ke ọfiọn̄, m̀mê ke ufan̄ isua kiet m̀mê akande oro. Ekeme ndimem fi utom ndinam se ekebierede ndinam ke ufan̄ isua kiet m̀mê iba edieke ọtọn̄ọde nsịtnsịt.

Ke ini anamde se akaduakde, eyenyene uko, enyene nti ufan, onyụn̄ enen̄ede okop inemesịt.

Uko: Edieke ekemede ndinam se akaduakde ndinam ke usen ke usen m̀mê ke urua ke urua, oro ayanam enyene uko ndibiere se edinamde ke ufan̄ isua kiet m̀mê akande oro. Idem idinyụn̄ inyekke fi ke ini osobode mfịna ke usen ke usen. Ke uwụtn̄kpọ, eyekeme ndisọn̄ọ nda edieke ubọkn̄ka fo ẹdomode ndinyịk fi anam se mîfọnke.

Nti ufan: Mme owo ẹsima ndinam ufan ye mbon emi ẹnyenede n̄kpọ emi mmọ ẹduakde ndinam ẹnyụn̄ ẹsịnde idem ẹnam n̄kpọ oro. Edieke ufan iba ẹdianade kiet ẹnam se mmọ ẹkeduakde, oro ayanam mmọ ẹnen̄ede ẹkpere kiet eken.

Inemesịt: Edieke ekemede ndinam se akaduakde, esịt eyenem fi.

“Mmesima ndibiere se nyomde ndinam. Emi esinam nsịn idem nnam n̄kpọ. Ke ini owo anamde se enye ekebierede, idem esikpa enye ndikụt se enye ekemede ndinam! Emi esinam esịt enem owo oro.”​—Christopher.

SE BIBLE ETỊN̄DE: “Owo eke esede ofụm idisuanke n̄kpasịp; owo eke onyụn̄ esede ikpaenyọn̄ idikpen̄eke ukpen̄e.”​—Ecclesiastes 11:4.

Ndinam mme n̄kpọ emi ayan̄wam fi.

Biere se edinamde. Wet mme n̄kpọ emi aduakde ndinam, nyụn̄ sịn idiọn̄ọ ke enye emi edinamde akpa, ọyọhọ iba, ọyọhọ ita, ye ntre ntre eken.

Tie kere nte edinamde. Ke ini ebierede se edinamde, wet:

• Usenọfiọn̄ emi edinamde.

• Nte edisan̄ade inam.

• Nsio nsio mfịna emi afo ekemede ndinyene ye nte edisan̄ade ikan mfịna oro.

Nam se ekebierede. Kûbet tutu afo ọfiọk nte kpukpru n̄kpọ ẹdisan̄ade mbemiso ọtọn̄ọde. Tọn̄ọ ye se anade ebem iso anam. Wet n̄kpọ kiet kiet oro anamde man ọdiọn̄ọ se isụhọde.

SE BIBLE ETỊN̄DE: “N̄kọkibuot owo nsịnifịk itreke ndinyene ufọn.”​—Mme N̄ke 21:5.