MME UYEN
9: Diọn̄ọ Owo Emi Edide
NSO KE EMI ỌWỌRỌ?
Idịghe enyịn̄ fo ye nte afo etiede kpọt ke ẹsida ẹdiọn̄ọ utọ owo emi afo edide. Ẹsinyụn̄ ẹda nte afo odude uwem, se enịmde ke akpanikọ, ye mme n̄kpọ emi afo esinamde ẹdiọn̄ọ utọ owo emi afo edide.
NTAK EMI EDIDE AKPAN N̄KPỌ
Edieke afo enen̄erede ọdiọn̄ọ utọ owo emi afo edide, ayanam mme ufan fo ẹdiọn̄ọ se afo enịmde ke akpanikọ, udûnyụn̄ uyakke mmọ ẹbiere se akpanamde ye se mûkpanamke.
“Ediwak owo ẹtie nte owo-ọkpọ oro ẹsikụtde ke itie unyam-ọfọn̄. Idịghe ọkpọ oro esimek ọfọn̄ emi enye esịnede, owo esimek ọnọ enye.”—Adrian.
“Mmekpep ndisisọn̄ọ nda nnam se ndiọn̄ọde ke enen ọkpọkọm imemke ndinam ntre. Se nsidade ndiọn̄ọ mbon emi ẹdide ata ufan mi edi edieke enemde mi ndidu ye mmọ sia ndiọn̄ọde ke mmọ idinyịkke mi nnam se mmen̄kpamaha ndinam.”—Courtney.
SE BIBLE ETỊN̄DE: “Ẹtre ndibiet editịm n̄kpọ emi, edi ẹkpụhọde oto ke edinam ekikere mbufo edi obufa.”—Rome 12:2.
SE AKPANAMDE
Tie kere mme n̄kpọ emi esinamde ọfọn, mme n̄kpọ emi mûsunamke ọfọn, ye se afo enịmde ke akpanikọ, sia oro ayanam ọdiọn̄ọ utọ owo emi afo edide idahaemi ye utọ owo emi oyomde ndidi ke ini iso. Mme mbụme emi ẹkeme ndin̄wam fi.
Mme n̄kpọ emi nsinamde ọfọn: Mme enọ ewe ke nnyene? Nso ye nso ke nnen̄ede ndiọn̄ọ ndinam? (Ke uwụtn̄kpọ: Ndi mmesika n̄kpọ ke ini, nsịn idem nnam utom, nsinyụn̄ mma ndinọ owo n̄kpọ?) Nso nti n̄kpọ ke nsinam?
NAM EMI ISE: Edieke mûkemeke nditi nti n̄kpọ emi afo esinamde, dọhọ ete fo, eka fo, m̀mê edima ufan fo etịn̄ nti n̄kpọ emi enye okụtde ke idemfo, onyụn̄ etịn̄ ntak emi enye amade mme n̄kpọ oro.
SE BIBLE ETỊN̄DE: “Yak owo kiet kiet owụt se utom esie edide, ndien adan̄aoro enye eyenyene ntak ndidat esịt mban̄a idemesie, idịghe ke ndimen idem ndomo ye owo en̄wen.”—Galatia 6:4.
Mme n̄kpọ emi mmensinamke ọfọn: Nso ke enen̄ede oyom n̄kpụhọde ke uwem mi? Ini ewe ke n̄keme ndisọp nduọ ndụk idomo? Ini ewe ke esiyom mmụm idem n̄kama?
SE BIBLE ETỊN̄DE: “Edieke nnyịn idọhọde ite: ‘Nnyịn inyeneke idiọkn̄kpọ,’ nnyịn ibabian̄a idem nnyịn.”—1 John 1:8.
Se nnịmde ke akpanikọ: Nso ye nso ke nda nte eti ye idiọk, ndien ntak-a? Ndi mmenịm ke Abasi odu? Nso inam nnịm ke enye odu? Nso ye nso ke nsida nte utụk ye ufịk, ndien ntak emi n̄kerede ntre? N̄kere ke n̄kpọ editie didie ke ini iso?
SE BIBLE ETỊN̄DE: “Ukeme ukere n̄kpọ eyekpeme fi, mbufiọk oyonyụn̄ ekpeme fi.”—Mme N̄ke 2:11.
Ekeme Ndidi Ayama Mmọ Emi N̄ko
IBỌRỌ MBỤME 10 EMI N̄KPARAWA YE N̄KAIFERI ẸSIBỤPDE
Nso Utọ Owo ke Ndi?
Ndifiọk se afo enịmde, se ekemede ndinam, se ebierede, ye se mûkemeke ndinam ayan̄wam fi ebiere ndinam se ifọnde ke ini osobode idomo.
