Ebe ye n̄wan emi mîdaha ndọ mmọ nte n̄kpọ isua ifan̄ kpọt isikereke iban̄a ndikpọn̄ kiet eken ọkpọkọm mmọ ẹnyenyene mfịna. Oro esinam esịt ana mmọ sụn̄ sia mmọ ẹdiọn̄ọ ke n̄kpa kpọt edidian̄ade mmimọ.

Se isinamde ndusụk ebe ye n̄wan ẹka iso ẹdụn̄ kiet edi ke mmọ ẹsikere ke edieke mmimọ idian̄arede, ke mme ufan mmimọ idinemke esịt. Edi, utu ke ebe ye n̄wan ndidụn̄ kiet ke ntak mbon en̄wen, akpakam ọfọn mmọ ẹdụn̄ kiet ke ntak emi mmọ ẹmade ẹnyụn̄ ẹkponode kiet eken.

SE BIBLE ETỊN̄DE: ‘Yak ebe okûdian̄ade ọkpọn̄ n̄wan esie.’​—1 Corinth 7:11.

“Edieke oyomde ndọ fo ebịghi, uduyakke n̄kpri n̄kpọ esisọp ayat fi. Eyesisọp ndifen nnọ ebe m̀mê n̄wan fo onyụn̄ ekpe ubọk ke ini eduede enye. Uduyakke mfịna emi mbufo ẹnyenede okpon tutu edi se ẹdian̄arede.”​—Micah.

Ke ini mfịna odude, ndusụk ebe ye n̄wan ẹsikere ke ikanam ndudue ndidọ kiet eken. Mmọ ẹsiyom n̄kpọ ẹnam man ẹdian̄ade sia mmọ ẹdade ndọ nte n̄kpọ isua ifan̄ kpọt.

“Ediwak mbon oro ẹdọde ndọ ẹsidọhọ ke mmimọ iyadian̄ade edieke mfịna odude. Edieke owo ọtọn̄ọde ke usen ndọ esie ekere aban̄a ndidian̄ade ndọ, ọwọrọ enye iyomke ndọ oro ebịghi.”​—Jean.

FIAK SE NTE ESINAMDE N̄KPỌ

Ke ini enyenede mfịna ye ebe m̀mê n̄wan fo, . . .

• Ndi emesitua n̄kpọfiọk nte ọkọdọde enye?

• Ndi emesitie ekere nte ọkpọdọde owo en̄wen?

• Ndi emesidọhọ ke imọn̄ ikpọn̄ enye, mîdịghe ke imọn̄ ikoyom owo en̄wen emi edimade fi?

Edieke ọbọrọde ih ke ekededi ke otu mbụme emi, ọwọrọ ini edi emi ndinen̄ede mbiere ke udukpọn̄ke owo emi ọkọdọde.

NEME N̄KPỌ EMI YE EBE M̀MÊ N̄WAN FO

• Ẹneme m̀mê mbufo idianake aba nte ẹkesidianade. Edieke ẹkụtde ke mbufo idianake aba, ẹneme ntak emi edide ntre.

• Ẹtịn̄ se mbufo ẹkpenamde idahaemi man ẹtetịm ẹdiana kiet.

NAM EMI ISE

• Wet etop ima nọ ebe m̀mê n̄wan fo ke ini ke ini

• Nịm ndise ebe m̀mê n̄wan fo ke okpokoro fo ke itieutom man owụt ke udaha ndọ fo ubre mbre

• Sikot ebe m̀mê n̄wan fo ke ini odude ke itieutom m̀mê ke ini mbufo mîdụhe kiet

SE BIBLE ETỊN̄DE: “Se Abasi ama akadian yak baba owo kiet okûdian̄ade.”​—Matthew 19:6.