Mbon emi ẹsisịnde idem ẹnam utom isifeheke utom, ọkpọkọm edi utom emi ediwak owo mîmaha. Utu ke oro, esinenem mmọ ndinam utom man ẹnyene se ẹdiade ẹnyụn̄ ẹn̄wam mbon en̄wen.

Idụhe nte owo ekemede nditie ke ererimbot emi inamke utom. Kpa ye oro ediwak owo mîsimaha ndisịn idem nnam utom, ndisịn idem nnam utom edidi ke ufọn nnyịn.​—Ecclesiastes 3:13.

“Mmedikụt ke edieke owo esịnde idem anam utom, ke esịt eyenen̄ede enem enye. Emi esinam enenem mi ndinam utom. Mme owo ẹyenen̄ede ẹkpono fi edieke esisịnde idem anam utom.”​—Reyon.

SE BIBLE ETỊN̄DE: “Kpukpru orụk utom ẹnyene ufọn.”​—Mme N̄ke 14:23.

Ndinam mme n̄kpọ emi ẹtienede mi ayan̄wam fi ama utom.

Kpep ndinam n̄kpọ ọfọn. Ọkpọkọm anam utom esịtufọk, utom ufọkn̄wed, m̀mê utom emi ẹsikpede fi okụk, sịn idem nam ọfọn. Ke ini ọfiọkde ndinam n̄kpọ, kpep ndinam nsọp ubọk m̀mê ndinam ọfọn akan nte ekesinamde. Edieke enen̄erede ọdiọn̄ọ utom, utom oro edisinenem fi.

SE BIBLE ETỊN̄DE: “Nte afo omokụt owo emi enyenede usọ ke utom esie? Enye edida ke iso ndidem; ididaha ke iso mme usụhọde owo.”​—Mme N̄ke 22:29.

Kûkere uban̄a idemfo kpọt. Edieke anamde utom fo ọfọn, inamke n̄kpọ m̀mê nso utọ utom ke edi, mbon en̄wen ẹyetiene ẹdia ufọn. Ke uwụtn̄kpọ, edieke esịnde idem anam n̄kpọ ke ufọk, ayanam utom mbon en̄wen ke ubon mbufo efere.

SE BIBLE ETỊN̄DE: “Inemesịt odu ke ndinọnọ akan ke ndibọbọ.”​—Utom 20:35.

Kûnam sụk se ẹdọhọde anam. Utu ke ndinam sụk se ẹdọhọde anam, yom usụn̄ nam kan oro. Edieke anamde emi, iditiehe nte ke ẹnyenyịk fi anam. Utu ke oro, edinam ke imaesịt.​—Matthew 5:41.

SE BIBLE ETỊN̄DE: “Mbak eti utom fo editie nte n̄kpọ eke ẹnyịkde-nyịk fi, edi oto ke edinyịme esịt fo.”​—Philemon 14.

Kûyak utom adia fi idem. Mbon emi ẹsisịnde idem ẹnam utom idịghe ifu, isinyụn̄ inamke utom iwot idem. Edi mmọ ẹsiyom ini ẹduọk odudu kpa ye oro esinemde-nem mmọ ndinam utom.

SE BIBLE ETỊN̄DE: “Esisịt nduọkodudu ọfọn akan ekese ọkpọsọn̄ utom ye edifehe mbịne ofụm.”​—Ecclesiastes 4:6.