EDIWAK unam emi ẹdụn̄de ke mmọn̄ ẹnyene ata akamba ikpọn̄ ke idem, ndien ikpọn̄ emi isiyakke tuep ọsọp anam mmọ. Edi enyene n̄kpọ en̄wen emi esin̄wamde iyụn̄​—⁠idet ọyọyọhọ enye idem.

Kere ise: Idụhe unam en̄wen emi enyenede idet nte iyụn̄. Edieke ẹbatde idet emi odude enye ke idem, ẹyekụt n̄kpọ nte idet miliọn iba ke ekpri itie emi mîkponke nte efọk udaikan̄. Ke ini enye ọwọkde ewọk, idet esie esitap ofụm emi odude akanade enye ada, ndien ofụm emi isiyakke mbịtmbịt mmọn̄ ebe okotụk enye ikpọkidem.

Ntaifiọk ẹdọhọ ke enyene se mmimọ ikemede ndikpep nto idet iyụn̄. Mmọ ẹnam nsio nsio ọfọn̄ emi ẹnyenede idet; ndusụk ọfọn̄ emi ẹnyene nnyan idet, ndusụk ẹnyene mbio mbio. Ndusụk idet emi ababan̄, ndusụk iban̄ke. Ntaifiọk ẹdikụt ke edieke idet ọniọn̄de onyụn̄ aban̄de, ke mmọn̄ idisọpke idụk esịt ọfọn̄ oro. Ọwọrọ mmọ ẹkpep ata akamba n̄kpọ ẹto nte idet iyụn̄ etiede.

Ntaifiọk ẹnịm ke ndidụn̄ọde nte idet iyụn̄ etiede ayanam mmimọ ikeme ndinam ọfọn̄ emi mmọn̄ mîkemeke ndidụk. Emi anam ndusụk owo ẹkere ke ọkpọfọn mbon emi ẹsiwọkde ewọk ke mmọn̄ emi enen̄erede ebịt ẹsịne ọfọn̄ emi enyenede idet nte idet iyụn̄!

Afo ekere didie? Ndi iyụn̄ emi enyenede idet oro mîsiyakke tuep ọsọp anam enye okofoforo? Mîdịghe ndi ẹkebobot enye?