Ndi ekondo ye ofụri se idude ke esịt ẹketọn̄ọ ke idemmọ mîdịghe ndi Abasi okobot mmọ? Nte ntaifiọk iba oro ẹsiakde ke enyọn̄ emi ẹbọrọde mbụme emi enen̄ede okpụhọde ye nte Bible ọbọrọde. Ndusụk owo ẹdọhọ ke se ntaifiọk ẹtịn̄de enen, ndusụk ẹdọhọ ke Bible akam enen. Edi ediwak owo idiọn̄ọke m̀mê ewe edi akpanikọ. Mme owo ẹsifan̄a n̄kpọ emi ke TV ẹnyụn̄ ẹwet se mmọ ẹkerede ke nsio nsio n̄wed.

Ekeme ndidi mme titia mbufo ẹsidọhọ ke ekondo ye ofụri se idude ke esịt ẹketọn̄ọ ntre ke idemmọ, ke idịghe Abasi okobot n̄kpọ. Edi ndi mme titia mbufo ẹma ẹtịn̄ se iwụtde ke Abasi idụhe? Onyụn̄ ekeme ndidi emesikop ikpọ owo ufọkabasi ẹdọhọde ke Abasi odu, ke enye okobot kpukpru n̄kpọ. Edi ndi akanam mmọ ẹwụt fi se inamde mmọ ẹdọhọ ntre? Mîdịghe ndi ẹsidọhọ enịm ke Abasi odu, okûda ubụp ntak?

Anaedi emesikere aban̄a n̄kpọ emi. Ekeme ndidi ekere ke idụhe owo ndomokiet emi enen̄erede ọdiọn̄ọ m̀mê Abasi odu m̀mê idụhe. Onyụn̄ ekeme ndidi emesikere m̀mê ufọn akam odu ndidiọn̄ọ m̀mê Abasi odu.

Ẹdemede! emi eneme ndusụk se inamde ediwak owo ẹnịm ke Abasi okobot kpukpru n̄kpọ. Enye eneme n̄ko ufọn emi ididiade edieke idiọn̄ọde nte uwem ọkọtọn̄ọde.