IBUOTIKỌ MAGAZINE EMI | NAM NTI N̄KPỌ EMEHE FI
2 Nam Emem Fi Utom
-
Emebiere ndisidia udia emi edinọde fi n̄kpọ ke idem, edi etie fi nte ke edieke mûdiaha ice cream ke ọmọn̄ akpa.
-
Emebiere ke imọ idin̄wọn̄ke sika aba, edi ufan fo emi ọdiọn̄ọde ke oyoyom usụn̄ nditre sika, ọnọ fi sika.
-
Amaduak ndika n̄kesịn̄ede idem mfịn, edi ọsọn̄ fi ndiyom ebiet emi ikpaukot fo anade.
Ndi uwụtn̄kpọ ita oro inọde mi anam okụt se ikemede ndinam ọsọn̄ owo ndinam se enye ekebierede? Ebiet oro owo odude ye utọ ufan emi enye enyenede ekeme ndinam ọsọn̄ enye nditre ndiọi n̄kpọ emi enye esinamde nnyụn̄ nnam nti n̄kpọ emehe enye.
SE BIBLE ETỊN̄DE: “Owo mbufiọk ada okụt afanikọn̄ ndien edịbe, edi ọkọi ebe aka ọkọbọ ufen.”—Mme N̄ke 22:3.
Bible ọdọhọ ikere se ikpanamde mbemiso mfịna esịmde nnyịn. Edieke inamde oro, iyọfiọk ebiet ye mme owo oro ẹdinamde ọsọn̄ nnyịn ndinam se ikebierede, inyụn̄ ifep mmọ. (2 Timothy 2:22) Ntre, ọfọn ifiọk se ikpanamde man emem nnyịn utom ndinam se ikebierede.
Nam ọsọn̄ fi ndinam mme n̄kpọ emi oyomde nditre onyụn̄ emem fi ndinam mme n̄kpọ emi ọfọnde ye afo
SE AKPANAMDE
-
Nam ọsọn̄ fi ndinam n̄kpọ emi oyomde nditre. Ke uwụtn̄kpọ, edieke oyomde nditre ndidia udia emi mîsinọhọ owo n̄kpọ ke idem, kûyak utọ udia oro odu ke ufọk fo. Edieke anamde oro, udûkwe udia oro udia ini ekededi emi enye ọdọn̄de fi.
-
Nam emem fi utom ndinam n̄kpọ emi ọfọnde ye afo. Ke uwụtn̄kpọ, edieke aduakde ndika n̄kesịn̄ede idem usenubọk, nịm ikpaukot ye ọfọn̄ emi edisịnede kpere bed fo mbemiso odụkde idap. Ama edemede okụt mme n̄kpọ emi, ifu idinamke fi ndiwọrọ n̄ka n̄kesịn̄ede idem.
-
Fiọk mbon emi odụkde nsan̄a. Imesima ndikpebe mbon emi isiwakde ndidu kiet. (1 Corinth 15:33) Ntre, kûdụk ndụk ye mbon emi ẹmade mme n̄kpọ emi afo odomode nditre, edi dụk ndụk ye mbon oro ẹkemede ndin̄wam fi anam nti n̄kpọ.
