POLLIA BERRY edi blu blu, ndien enye odu ke Africa. Idụhe mfri en̄wen ke ofụri ererimbot emi enyenede blu blu uduot emi odụkde enyịn nte mfri emi. Edi enye inyeneke mmọn̄ibọk emi esinamde mfri enyene uduot. Ntre, nso inam enye enyene utọ ediye blu blu uduot emi?

Kere ise: Mfri emi enyene n̄kpri n̄kpri n̄kpọ emi ẹtiede nte urụk ke esịt esie, edi owo ikemeke ndida ata enyịn n̄kụt mmọ. N̄kpọ emi obono ke adiana ke adiana ke esịt mfri emi nte ẹbon eto udaikan̄. Emi anam uduot mfri emi enen̄ede odụk enyịn onyụn̄ eye. Mme urụk oro idịghe blu blu, edi nte ẹbonde mmọ anam mfri emi etie blu blu. Edi enyene nte esede mfri emi ndien etie nte ke enye enyene uduot en̄wen, utọ nte, awawa ye utouto. Ndien edieke etịmde ese mfri emi, oyokụt ke enye enyene n̄ken̄e ntọi ke idem.

Sia mîdịghe mmọn̄ibọk emi esinamde mfri enyene uduot anam Pollia Berry enyene blu blu uduot, uduot esie isikpụhọkede idem ke ini mfri emi ebehede. Edieke okụtde Pollia Berry oro ẹketan̄de ẹbon ke se ibede isua 100, edikere ke ẹtet idahaoro sia mmọ ẹsụk ẹyeye! Kpa ye oro mfri emi mînyeneke idem emi ẹkemede ndidia, ntaifiọk ẹdọhọ ke inuen ẹsima ndika n̄kọsọrọ ke mfri emi sia enye eyede mmọ.

Ntaifiọk ẹdọhọ ke ndidụn̄ọde nte mfri emi etiede ekeme ndin̄wam ẹnam nsio nsio n̄kpọ, utọ nte dye emi mîdikpaha enyịn.

Afo ekere didie? Ndi Pollia Berry emi enyenede utọ uduot emi okofoforo? Mîdịghe ndi ẹkebobot enye?