JESUS ama ọdọhọ ke mme mbet imọ ẹyenam akwa utom idọk ke utịt ini emi, oro edi, ke mmọ ẹyekwọrọ ikọ ẹnọ ata ediwak owo man mmọ ẹdidụk esop Abasi. (Matt. 9:37; 24:14) Yak ise nte se itịbede ke mbọhọ obio Transcarpathia ke Ukraine anamde ikụt nte ikọ Jesus emi osude. Esop 50 ẹdu ke obio ita kpọt ke mbọhọ oro, mme asuanetop ẹnyụn̄ ẹbe 5,400. * Ẹkpebat owo inan̄ ke mme obio emi, kiet edi Ntiense Jehovah!

Ukwọrọikọ etie didie ke mme obio emi? Brọda Vasile emi otode do ọdọhọ ete: “Mme owo mi ẹma Bible etieti, ẹma ubon mmọ, imaha ẹtụk owo, ẹsinyụn̄ ẹnam se mmọ ẹkekeme man ẹn̄wam kiet eken. Idịghe nte mmọ ẹsinyịme kpukpru se ikwọrọde inọ mmọ. Edi edieke owụtde mmọ n̄kpọ ke Bible, mmọ ẹyenen̄ede ẹkpan̄ utọn̄.”

Enyene mfịna emi nditọete oro ẹsikwọrọde ikọ ke efakutom emi Mme Ntiense Jehovah ẹwakde ntem ẹsinyenede. Ke uwụtn̄kpọ, enyene esop kiet emi mme asuanetop 134 ẹdude, edi ufọk owo 50 kpọt odu do! Nditọete ẹsinam didie ẹkwọrọ ikọ ke utọ efakutom emi?

Ediwak nditọete ẹsinam se mmọ ẹkekeme man ẹkekwọrọ ikọ ke ebiet emi ẹyomde-yom mme ọkwọrọikọ. Brọda Ionash emi edide isua 90 ọdọhọ ete: “Asuanetop kiet enyene ufọk iba kpọt ndikwọrọ ikọ. Nsikwọrọ ikọ ke obio nnyịn. Ini idem ọkọsọn̄de mi, mma nsika n̄kọkwọrọ ikọ ke usem Hungarian ke efakutom kiet oro owo mîbahakede inọ esop ndomokiet. To obio nnyịn sịm do edi n̄kpọ nte itiat 100 m̀mê kilomita 160. Ibịghike n̄ketre ndika do.” Ana nditọete ẹyak n̄kpọ atak mmọ man ẹkeme ndika ebiet en̄wen n̄kan̄wam n̄kwọrọ ikọ. Brọda Ionash afiak ọdọhọ ete: “N̄kesidemede ke n̄kanika inan̄ usiere mbak tren idibe ikpọn̄ mi. Mma nsikwọrọ ikọ tutu esịm n̄kanika itiokiet mbubreyo sia ini oro ke tren ekesifiak ọnyọn̄. Mma nsika do ikaba mîdịghe ikata ke urua.” Ndi enye ama enịm ke se imọ inamde oro enyene ufọn? Enye ọdọhọ ete: “Ama esinem mi etieti ndika do n̄kọkwọrọ ikọ. Mma n̄n̄wam ubon kiet do ẹdikpono Jehovah. Ama enem mi tutu.”

Imọfiọk ke idịghe kpukpru owo do ẹkeme ndika utọ anyan usụn̄ oro n̄kọkwọrọ ikọ. Edi kpukpru owo, esịnede mbon oro ẹma ẹkesọn̄, ẹsịn ifịk ẹkwọrọ ikọ ke efakutom mmọ edifọn edifọn. Oro akanam mbon oro ẹkedụkde Editi ke 2017 ke obio mbita emi ẹkpere ndiwak utịm ikaba n̄kan ibat mme asuanetop. Se idude edi ke kpukpru nnyịn imenyene “ekese ndinam ke utom Ọbọn̄” ke ebiet ekededi oro idụn̄de.​—1 Cor. 15:58.