IBUOTIKỌ UKPEPN̄KPỌ 25
“Ami Nyoyom Mme Erọn̄ Mi”
“Ami nyoyom mme erọn̄ mi nnyụn̄ nse mban̄a mmọ.”—EZEK. 34:11.
ỌYỌHỌ IKWỌ 105 Abasi Edi Ima
SE IDIKPEPDE *
1. Didie ke Jehovah ebiet eka emi ọnọde eyen eba?
KE EYO prọfet Isaiah, Jehovah ama obụp mbụme kiet ete: “Nte n̄wan ekeme ndifre eyen esie emi awapde eba?” Abasi ama ọdọhọ ikọt esie n̄ko ete: “Iban emi ẹkam ẹkeme ndifre, edi ami ndifreke fi.” (Isa. 49:15) Jehovah isiwakke ndimen idem esie ndomo ye eka eyen. Edi enye ama anam ntre ini enye okobụpde mbụme oro. Jehovah akada nte eka ye eyen ẹsikperede owụt adan̄a nte imọ imade ikọt imọ. Se Sista Jasmin etịn̄de ayan̄wan̄a ediwak mme eka. Enye ọdọhọ ete: “Afo ye eyen emi ọnọde eba ẹyenen̄ede ẹkpere ke ofụri eyouwem mbufo.”
2. Esitie Jehovah didie ke idem eyen esie kiet ama ọfiọrọ ọkpọn̄ enye?
2 Ọkpọkọm kiet ke otu nditọ Jehovah etre ndidụk mbono esop nnyụn̄ n̄ka ukwọrọikọ, Jehovah esidiọn̄ọ. Kere ise ndien nte esibiakde enye kpukpru isua ndikụt nte ediwak tọsịn ikọt esie ẹtrede ndidụk mbono esop nnyụn̄ n̄wọrọ an̄wautom. *
3. Nso ke Jehovah oyom?
3 Ediwak ndima nditọete nnyịn emi ẹma ẹketre ndidụk mbono esop nnyụn̄ n̄wọrọ an̄wautom ẹsifiak ẹnyọn̄ ẹdi esop, esinyụn̄ enem nnyịn mmọ ẹma ẹnyọn̄ ẹdi! Jehovah oyom mmọ ẹnyọn̄ ẹdi, nnyịn n̄ko imoyom. (1 Pet. 2:25) Didie ke ikeme ndin̄wam mmọ ẹnyọn̄ ẹdi? Mbemiso ibọrọde mbụme oro, ọkpọfọn idiọn̄ọ se isinamde ndusụk owo ẹtre ndidụk mbono esop nnyụn̄ n̄wọrọ an̄wautom.
NSO ISINAM NDUSỤK OWO ẸTRE NDINAM N̄KPỌ JEHOVAH?
4. Nso ke utom anam ndusụk owo?
4 Ndusụk owo ẹda utom mmọ ke ata akpan n̄kpọ ẹkan n̄kpọ efen ekededi. Brọda Hung * emi odụn̄de ke Asia ọdọhọ ete: “Mma nsịn idem n̄kaha ke utom mi. Mma nsịme n̄kere ke edieke nnyenede ediwak okụk ke nyekeme ndinen̄ede nnam n̄kpọ Jehovah. Ntre mma nnam utom awak hour akan se n̄kesinamde. Mma ntọn̄ọ ndifiak mbono esop ediwak ini, tutu ke akpatre mma ntre ofụri ofụri. Satan ada ererimbot emi anam mme owo ẹtre ndinam n̄kpọ Abasi sụn̄sụn̄ sụn̄sụn̄.”
5. Sista kiet akanam n̄kpọ didie ini udịm udịm mfịna ẹsịmde enye?
5 Ediwak mfịna anam idem emem ndusụk nditọete nnyịn. Sista Anne emi otode Britain, onyụn̄ enyenede nditọ ition ọdọhọ ete: “Eyen mi kiet akadada ndiọi udọn̄ọ amana. Aka ko, ẹma ẹsio eyen mi an̄wan kiet ẹfep ke esop, eyen mi erenowo kiet onyụn̄ ọdọn̄ọ udọn̄ọ ibuot. Mma mfụhọ tutu ntre ndidụk mbono esop nnyụn̄ n̄ka ukwọrọikọ. Nte ini akakade, mma n̄kabade asuanetop emi mîwọrọke an̄wautom aba.” Anne ye ubon esie ye mbon en̄wen emi ẹsobode utọ mfịna oro ẹnam nnyịn mbọm etieti!
6. Didie ke owo nditre ndinam se idude ke Colossae 3:13 ekeme ndinam enye ọkpọn̄ esop Jehovah sụn̄sụn̄?
6 Kot Colossae 3:13. Ndusụk ikọt Jehovah ẹkeme ndiyat esịt ke ntak se eyenete ke esop anamde mmọ. Apostle Paul ama ọdọhọ ke ndusụk ini imekeme ndinyene eti “ntak nditọhọ” ye eyenete. Ekeme ndikam ndi ẹma ẹfịk nnyịn. Edieke nnyịn mîkpemeke, imekeme ndikabade mbon iyatesịt. Ọkpọsọn̄ iyatesịt ekeme ndinam owo ọkpọn̄ esop Jehovah sụn̄sụn̄. Se ikọwọrọde Brọda Pablo ke South America edi oro. Owo ama osu nsu odori Pablo ọdọhọ ke enye anam idiọkn̄kpọ. Mbiowo ẹma ẹnịm se ẹkedoride Pablo oro ẹnyụn̄ ẹbọ enye ifetutom. Pablo akanam n̄kpọ didie? Enye ọdọhọ ete: “Esịt ama ayat mi, mma nnyụn̄ n̄kpọn̄ esop sụn̄sụn̄ sụn̄sụn̄.”
7. Nso ikeme nditịbe edieke esịt akade iso afịna owo?
7 Esịt onyụn̄ ekeme ndika iso mfịna owo emi akabiatde ibet Abasi ke ini edem onyụn̄ anam enye ekere ke Abasi ikemeke ndima imọ. Idem ke enye ama akakabade esịt yak ẹtua enye mbọm, enye ekeme ndikere ke imọ idotke aba ndisịne ke otu ikọt Abasi. Eketie Brọda Francisco ntre. Enye ọdọhọ ete: “Ẹma ẹnọ mi nsuannọ ke ntak n̄kanamde use. Kpa ye emi n̄kosụk ndụkde mbono esop nsonso oro, mma mfụhọ etieti nnyụn̄ n̄kere ke ndotke ndisịne ke otu ikọt Jehovah. Esịt ama afịna mi, mma nnyụn̄ ndọhọ idemmi ke Jehovah ifenke inọ mi. Nte ini akade, mma ntre ndidụk mbono esop nnyụn̄ n̄wọrọ an̄wautom.” Afo ada didie nditọete emi utọ n̄kpọ oro ọwọrọde? Ndi mbọm mmọ esinam fi? Se ikam idide akpan n̄kpọ ikan edi m̀mê Jehovah esida mmọ didie.
JEHOVAH AMA ERỌN̄ ESIE
Mme ekpemerọn̄ ke Israel ẹma ẹsinen̄ede ẹkere ẹban̄a erọn̄ mmọ emi okosopde (Se ikpehe 8-9) *
8. Ndi Jehovah esifre mbon emi ẹkesinamde n̄kpọ esie akpa? Nam an̄wan̄a.
8 Jehovah isifreke mbon emi ẹkesinamde n̄kpọ esie akpa, emi ẹma ẹketre ke esisịt ini. Enye inyụn̄ ifreke se mmọ ẹkesinamde ẹnọ enye. (Heb. 6:10) Prọfet Isaiah ama ewet inem inem uwụtn̄kpọ kiet owụt nte Jehovah esikerede aban̄a ikọt esie. Enye ọkọdọhọ ete: “Enye eyekpeme erọn̄ esie nte ekpemerọn̄. Enye ayada ubọk esie atan̄ nditọerọn̄ obon ọtọkiet; oyonyụn̄ emen mmọ akama ke ikpanesịt esie.” (Isa. 40:11) Esitie Jehovah emi edide Akwa Ekpemerọn̄ didie ke idem ini erọn̄ esie kiet oyode ọkpọn̄ otuerọn̄? Jesus ama owụt nte esitiede Jehovah ke idem ini enye okobụpde mbet esie ete: “Mbufo ẹkere didie? Edieke owo kiet enyenede erọn̄ ikie ndien kiet ke otu mmọ osop usụn̄, nte enye idikpọn̄ke anan̄ ye efịtenan̄ ke enyọn̄ obot inyụn̄ idaha ikoyom kiet emi osopde usụn̄ do? Ndien edieke enye okụtde, ke akpanikọ ke ndọhọ mbufo nte, enye adara enye akan anan̄ ye efịtenan̄ emi mîkosopke usụn̄.”—Matt. 18:12, 13.
9. Didie ke nti ekpemerọn̄ ke eyo Bible ẹkesinam n̄kpọ ye erọn̄ mmọ? (Se ndise ikpædem Enyọn̄-Ukpeme emi.)
9 Ntak emi mîdiọkke ndimen Jehovah ndomo ye ekpemerọn̄? Sia ke eyo Bible eti ekpemerọn̄ ama esinen̄ede ekere aban̄a erọn̄ esie. Ke uwụtn̄kpọ, David ama an̄wana ye ekpe ye bear mbak n̄kpọ idinam otuerọn̄ esie. (1 Sam. 17:34, 35) Ọkpọkọm erọn̄ kiet osop, eti ekpemerọn̄ esidiọn̄ọ. (John 10:3, 14) Utọ ekpemerọn̄ oro ọyọkpọn̄ erọn̄ 99 ke ufọkerọn̄ mîdịghe ọkpọn̄ ọnọ ekpemerọn̄ en̄wen ese enyịn, adaha aka okoyom kiet emi okosopde. Jesus akada uwụtn̄kpọ oro ekpep nnyịn ata akpan n̄kpọ kiet ete: “Kpasụk ntre Ete mi emi odude ke heaven iyomke kiet ke otu n̄kpri owo emi atak.”—Matt. 18:14.
Ekpemerọn̄ ke Israel eset ke ese aban̄a erọn̄ emi okosopde(Se ikpehe 9)
JEHOVAH OYOM ERỌN̄ ESIE
10. Ezekiel 34:11-16 owụt ke Jehovah ọkọn̄wọn̄ọ ndinam nso nnọ mme erọn̄ esie emi ẹsopde?
10 Jehovah ama nnyịn owo kiet kiet, esịnede mbon emi ẹma ẹkeyo ẹkpọn̄ otuerọn̄ esie. Abasi ama ada prọfet Ezekiel ọn̄wọn̄ọ ke imọ iyoyom mme erọn̄ imọ emi ẹkesopde inyụn̄ in̄wam mmọ ẹfiak ẹkpere imọ. Enye ama etịn̄ n̄ko mme n̄kpọ emi imọ idinamde man in̄wam mmọ. Kpa mme n̄kpọ emi ke ekpemerọn̄ ke Israel ekesinam edieke erọn̄ esie osopde. (Kot Ezekiel 34:11-16.) Akpa, ekpemerọn̄ ayada ini, esịn idem oyom erọn̄ oro. Ndondo emi enye okụtde erọn̄ oro, enye eyemen enye afiak edisịn ke otuerọn̄. Ekpedi erọn̄ oro ama ada unan mîdịghe biọn̄ ọdọn̄, ekpemerọn̄ ayan̄wam erọn̄ emi idem ememde do, ọbọp unan esie, emen enye akama, onyụn̄ ọnọ enye udia. Akpana mbiowo emi ẹkpemede “otuerọn̄ Abasi” ẹnam ukem n̄kpọ oro man ẹn̄wam owo ekededi emi okoyode ọkpọn̄ esop. (1 Pet. 5:2, 3) Mbiowo ẹyeyom mmọ, ẹn̄wam mmọ ẹfiak ẹnyọn̄ ẹdi esop, ẹnyụn̄ ẹnam se ededi emi edinamde mmọ ẹfiak ẹdi ufan Jehovah man ẹwụt ke imama mmọ. *
11. Nso ke eti ekpemerọn̄ ekesidiọn̄ọ?
11 Eti ekpemerọn̄ ama ọdiọn̄ọ ke erọn̄ ekeme ndisop. Erọn̄ okponyụn̄ oyo ọkpọn̄ otuerọn̄, ekpemerọn̄ ikesinọhọ erọn̄ oro ufen. Yak ise se Abasi akanamde ini enye akan̄wamde ndusụk ikọt esie emi ẹketrede ndinam n̄kpọ esie ke esisịt ini.
12. Jehovah akanam n̄kpọ didie ye Jonah?
12 Prọfet Jonah ama efehe ọkpọn̄ utom emi Jehovah ọkọdọn̄de enye. Kpa ye oro, Jehovah ikesịnke Jonah. Sia Jehovah edide eti ekpemerọn̄, enye ama anyan̄a Jonah onyụn̄ an̄wam enye afiak enyene odudu akanam utom emi ẹkedọn̄de enye. (Jonah 2:7; 3:1, 2) Nte ini akade, Abasi ama ada ekikop an̄wam Jonah okụt adan̄a nte uwem owo kiet kiet ọsọn̄de urua. (Jonah 4:10, 11) Nso ke ikpep? Inaha mbiowo ẹsọsọp ẹsion̄o idem ẹkpọn̄ mbon emi ẹtrede ndidụk mbono esop nnyụn̄ n̄wọrọ an̄wautom. Utu ke oro, mbiowo ẹsidomo ndidiọn̄ọ se ikanamde erọn̄ oyo ọkpọn̄ otuerọn̄. Erọn̄ oro ama onyụn̄ afiak ebịne Jehovah, mbiowo ẹsika iso ẹma ẹnyụn̄ ẹn̄wam enye.
13. Nso ke ikeme ndikpep nto nte Jehovah akanamde n̄kpọ ye andikewet Psalm 73?
13 Idem ama emem andiwet Psalm 73 ndikụt ke etie nte ndiọi owo ke ẹforo. Enye ama ekere m̀mê ufọn ndomokiet odu ndinam se Abasi oyomde. (Ps. 73:12, 13, 16) Jehovah akanam n̄kpọ didie ye enye? Jehovah ikayatke esịt ye enye. Jehovah ama akam anam ẹwet se enye eketịn̄de oro ẹsịn ke Bible. Ekem ko, andiwet psalm oro ama edikụt ke idụhe se ifọnde ke uwem emi nte owo ndidi ufan Jehovah. (Ps. 73:23, 24, 26, 28) Nso ke ikpep? Ikpanaha mbiowo ẹsọsọp ẹda mbon emi ẹtọn̄ọde ndikere m̀mê ufọn ndomokiet odu owo ndinam se Jehovah oyomde nte ndiọi owo. Utu ke ndida mmọ ntre, ana mbiowo ẹdomo ndidiọn̄ọ se inamde mmọ ẹtịn̄ utọ ikọ oro, m̀mê ẹnam se mmọ ẹnamde. Ini oro ndien ke mbiowo ẹdidiọn̄ọ nnennen itie Bible ndida nsọn̄ọ mmọ idem.
14. Nso ikanam Elijah oyom un̄wam? Didie ke Jehovah akan̄wam enye?
14 Prọfet Elijah ama efehe mbak Jezebel Ọbọn̄ An̄wan idiwot enye. (1 Ndi. 19:1-3) Enye ekekere ke imọ idi n̄kukụre prọfet Jehovah emi ọyọhọde osụhọ, ke se imọ inamde inyụn̄ inyeneke ufọn ndomokiet. Elijah ama ofụhọ tutu oyom n̄kpa. (1 Ndi. 19:4, 10) Utu ke Jehovah ndiyat esịt ye Elijah, Jehovah ama ọdọhọ enye ke imọ do ye enye, anam enye enịm ke iyada odudu imọ in̄wam enye, onyụn̄ ọdọhọ enye ke imọ imenyene ediwak utom se inọde enye anam. Jehovah ama enen̄ede akpan̄ utọn̄ ini Elijah etịn̄de se ifịnade enye onyụn̄ ọnọ enye mbufa utom anam. (1 Ndi. 19:11-16, 18) Nso ke ikpep? Akpana kpukpru nnyịn, akpan akpan mbiowo, ifọn uwem ye mme erọn̄ Jehovah. Edide owo etịn̄ se iyatde enye m̀mê ọdọhọ ke imọ idotke se Jehovah atuade mbọm, mbiowo ẹyekpan̄ utọn̄ ini enye etịn̄de nte etiede enye ke idem. Ekem mmọ ẹyedomo ndin̄wam erọn̄ Jehovah emi osopde usụn̄ do okụt ke Jehovah ada imọ ke ọsọn̄urua.
IKPADA DIDIE ERỌN̄ ABASI EMI OSOPDE USỤN̄?
15. John 6:39 owụt ke Jesus akada didie mme erọn̄ Ete esie?
15 Jehovah oyom ida didie erọn̄ esie emi osopde usụn̄? Jesus ama owụt nnyịn se ikpanamde. Jesus ama ọdiọn̄ọ ke Jehovah ada kpukpru erọn̄ esie ke ọsọn̄urua, ntre enye ama anam se enye ekekeme man an̄wam “mme erọn̄ ufọk Israel emi ẹkesopde usụn̄” ẹfiak ẹbịne Jehovah. (Matt. 15:24; Luke 19:9, 10) Sia Jesus edide eti ekpemerọn̄, enye ama onyụn̄ odomo nte enye ekekeme ndikụt ete ke erọn̄ Jehovah ndomokiet ibọhọke enye isop.—Kot John 6:39.
16-17. Mbiowo ẹkpeda didie mmọ ndin̄wam mbon emi ẹma ẹkeyo ẹkpọn̄ Jehovah? (Se ekebe emi “ Nte Ekemede Nditie Erọn̄ Emi Oyode Ọkpọn̄ Usụn̄ ke Idem.”)
16 Apostle Paul ama ọdọhọ mbiowo esop ke Ephesus ete ẹkpebe uwụtn̄kpọ Jesus. Enye ọkọdọhọ mmọ ete: “Mbufo ẹnyene ndin̄wam mbon mmemidem, ẹnyụn̄ ẹti ikọ Ọbọn̄ Jesus, ke ini enye ọkọdọhọde ete, ‘Inemesịt odu ke ndinọnọ akan ke ndibọbọ.’ ” (Utom 20:17, 35) Itie Bible oro owụt ke akpan utom mbiowo edi ndise mban̄a ikọt Jehovah. Brọda Salvador emi edide ebiowo ke Spain ọdọhọ ete: “Mma n̄kere adan̄a nte Jehovah ekerede aban̄a mme erọn̄ esie emi ẹsopde usụn̄, esidọn̄ mi ndinam kpukpru se n̄kekeme man n̄n̄wam mmọ. Mmenịm ke Jehovah oyom mi nse mban̄a mmọ.”
17 Ẹma ẹn̄wam kpukpru mbon emi itịn̄de ke ibuotikọ emi nte ẹkekpọn̄de Jehovah ke esisịt ini ẹfiak ẹbịne enye. Itetịn̄ mi, ke ọdọn̄ ediwak mbon en̄wen emi ẹkekpọn̄de Jehovah ndifiak mbịne enye. Ke ibuotikọ emi etienede, iyenen̄ede ineme se ikemede ndinam n̄n̄wam mmọ ẹfiak ẹbịne Jehovah.
ỌYỌHỌ IKWỌ 139 Kụt Idemfo ke Obufa Ererimbot
^ ikp. 5 Nso isinam ndusụk mbon emi ẹma ẹkesọn̄ọ ẹda ẹnam n̄kpọ Jehovah ke ediwak isua ẹfiọrọ ẹkpọn̄ esop? Abasi ada mmọ didie? Ẹbọrọ mme mbụme emi ke ibuotikọ emi. Ẹnyụn̄ ẹneme n̄ko se ikemede ndikpep nto usụn̄ emi Jehovah akan̄wamde ndusụk owo ke eyo Bible ini mmọ ẹketrede ndinam n̄kpọ esie ke ekpri ini.
^ ikp. 2 SE ẸNAMDE AN̄WAN̄A: Ẹma ẹdọhọ ke owo edi asuanetop emi mîwọrọke an̄wautom aba, ọwọrọ enye inọhọ ibatutom ke ọfiọn̄ itiokiet m̀mê akande oro. Kpa ye oro, mme asuanetop emi mîwọrọke an̄wautom aba ẹsụk ẹdedi nditọete nnyịn, isụk imama mmọ.
^ ikp. 4 Ẹkpụhọ ndusụk enyịn̄.
^ ikp. 10 Iyeneme nte mbiowo ẹkemede ndinam mme n̄kpọ emi ke ibuotikọ emi etienede.
^ ikp. 60 NDISE: Ekpemerọn̄ ke Israel emi ekekerede aban̄a erọn̄ emi okosopde usụn̄ ama esiyom erọn̄ oro onyụn̄ an̄wam enye afiak edidụk otuerọn̄. Mme andikpeme erọn̄ Abasi ẹnam ukem oro mfịn.
^ ikp. 64 NDISE: Ini sista kiet emi mîdụkke mbono esop mînyụn̄ iwọrọke an̄wautom aba osụk ebetde bọs mmọ adaha, enye okụt nte esịt enemde Ntiense Jehovah iba emi ẹkwọrọde ikọ ke ebiet emi mme owo ẹsiwakde.
