1. Nso ke Jehovah esikụt ke idem mme asan̄autom esie?

PSALM 149:4 ọdọhọ ke ‘Jehovah enem esịt aban̄a ikọt esie.’ Nnyịn ndidiọn̄ọ oro anam esịt enen̄ede enem nnyịn. Jehovah okụt nti edu emi nnyịn inyenede, enye ọdiọn̄ọ utọ owo emi nnyịn ikemede ndidi, enye esinyụn̄ an̄wam nnyịn idi ufan esie. Edieke ikade iso ikop uyo esie, enye ayaka iso edi ufan nnyịn ke nsinsi!—John 6:44.

2. Nso inam ọsọn̄ ndusụk owo ndinịm ke Jehovah ama mmimọ?

² Ndusụk owo ẹkeme ndidọhọ, ‘Mmọdiọn̄ọ ke Jehovah ama ikọt esie, edi nnam didie ndiọn̄ọ m̀mê enye ama mi?’ Nso ikeme ndinam owo obụp utọ mbụme oro? Se ẹkenamde Sista Oksana * ama anam enye ọbọ ufen etieti ini enye ekedide eyenọwọn̄. Enye ọdọhọ ete: “Esịt ama enem mi etieti ini n̄kanade baptism nnyụn̄ ntọn̄ọ utom usiakusụn̄. Edi ke isua 15 ama ekebe, mma ntọn̄ọ nditi ndiọi n̄kpọ emi ẹketịbede ẹnọ mi ini ndide eyenọwọn̄. Mma n̄kere ke Jehovah imaha mi aba, ke nnyụn̄ ndotke-dot se enye amade.” Sista Yua edi asiakusụn̄ ofụri ini; ukem se ikọwọrọde Oksana ama ọwọrọ enye ini enye edide eyenọwọn̄. Enye ọdọhọ ete: “N̄kayak idemmi nnọ Jehovah sia n̄koyom ndinam esịt enem enye. Edi se ikenen̄erede isịne mi ke esịt ekedi ke enye ikemeke-keme ndima mi.”

3. Nso ke iyom ndineme ke ibuotikọ emi?

³ Ukem nte nti mme asan̄autom Jehovah oro itịn̄de iban̄a do, afo amama Jehovah. Edi ekeme ndisọn̄ fi ndinịm m̀mê enye ama fi. Ntak anade enịm ke enye enen̄ede ama fi? Nso idin̄wam fi ekpetie fi nte ke Jehovah imaha fi? Imọn̄ ibọrọ mme mbụme emi.

4. Nso inam enen̄ede ọdiọk ndikere ke Jehovah imaha nnyịn?

⁴ Ima edi ata akpan n̄kpọ kiet emi esin̄wamde nnyịn inam n̄kpọ Jehovah. Edieke inen̄erede inịm ke Jehovah ama nnyịn onyụn̄ eben̄e idem ndin̄wam nnyịn, iyosio esịt inam n̄kpọ esie inamke n̄kpọ m̀mê nso mfịna ke inyene. Edi, edieke esịt kiet ọdọhọde nnyịn ke Abasi ama nnyịn, esịt kiet ete imaha, nnyịn idinen̄ekede inyene odudu inam n̄kpọ esie. (N̄ke 24:10) Ndien idem ama emem nnyịn, nnyịn mînyụn̄ inịmke ke Abasi ama nnyịn, nnyịn idikemeke ndin̄wana mbiọn̄ọ Satan.—Eph. 6:16.

5. Nso iketịbe inọ ndusụk nditọete ke ntak emi mmọ mîkenịmke ke Abasi ama mmimọ?

⁵ Ndusụk nditọete ndikekere ke Jehovah imaha mmimọ ama anam mmọ ẹkûbuọt idem ye enye aba nte ẹkesibuọtde. Ebiowo kiet emi ekerede James ọdọhọ ete: “Ndu ke Bethel nnyụn̄ ndu ke esop emi ẹsemde usem idụt en̄wen, esinyụn̄ enem mi ndida usem oro n̄kwọrọ ikọ. Kpa ye oro, mma nsikere m̀mê Jehovah osụk enen̄ede ama se nnamde. Ama enyene ini emi n̄kekerede m̀mê Jehovah esikam okop akam mi.” Eva emi odude ke Bethel n̄ko ọdọhọ ete: “Mma ndikụt ke ọdiọk etieti ndikere ke Jehovah imaha nnyịn sia ndikere ntre ayafịna kpukpru se inamde inọ Abasi. Oro idiyakke ọdọn̄ nnyịn ndinam n̄kpọ Jehovah, idinyụn̄ iyakke inam n̄kpọ Jehovah ke idatesịt.” Michael emi edide ebiowo ye asiakusụn̄ ofụri ini ọdọhọ ete: “Mûnịmke ke Abasi ama fi, ọyọfiọrọ ọkpọn̄ enye.”

6. Nso ke ikpanam ama etie nnyịn nte ke Abasi imaha nnyịn?

⁶ Se nditọete oro ẹtịn̄de owụt nte ekemede ndisọn̄ owo ndibuọt idem ye Jehovah edieke enye mînịmke ke Jehovah ama imọ. Edi nso ke ikpanam ke ini itọn̄ọde ndikere ke Abasi imaha nnyịn? Ana isọsọp isio utọ ekikere oro ifep ke esịt nnyịn! Dọhọ Jehovah osio fi ekikere oro ke esịt efep onyụn̄ ọnọ fi emem esie man ‘ekpeme fi esịt ye ekikere.’ (Ps. 139:23; Phil. 4:6, 7) Ti n̄ko ke idịghe afo kpọt esikere ke Jehovah imaha imọ. Utọ ekikere oro ke afịna ediwak nti ikọt Abasi n̄ko, iren ye iban. Utọ n̄kpọ oro ama esikam afịna mme asan̄autom Jehovah ke  eyo Bible n̄ko. Ẹyak ise se ikemede ndikpep nto apostle Paul.

7. Siak mme mfịna emi Paul ekenyenede.

⁷ Ndi esitie fi nte ke mbiomo fo awak akaha, ke unyụn̄ ukemeke ndinam kpukpru se anade anam? Ekpedi ntre, se ikọwọrọde Paul ayan̄wan̄a fi. Esịt ama etịmede enye aban̄a nditọete, edi ikedịghe mbon esop kiet kpọt, esịt eketịmede enye aban̄a nditọete ke “kpukpru mme esop.” (2 Cor. 11:23-28) Ndi udọn̄ọ emi mîmaha ndikụre esinam esịt etịmede fi? Paul ama enyene mfịna kiet emi okotụhọrede enye nte ‘n̄kukịm esịne enye ke obụkidem.’ Etie nte udọn̄ọ ke ekedi, ndien ama ọdọn̄ enye nte n̄kpọ oro okpokụrede. (2 Cor. 12:7-10) Ndi ndudue emi afo esinamde ke ntak emi mûfọnke uma esinam esịt etịmede fi? Ama esinam apostle Paul ndusụk ini n̄ko. Enye okokot idemesie “owo nditaha” sia ndinam se inende ekesidi en̄wan.—Rome 7:21-24.

8. Nso ikan̄wam Paul ọyọ mme mfịna esie?

⁸ Kpa ye kpukpru mfịna emi Paul ekenyenede do, enye iketreke ndikpono Jehovah. Nso ikan̄wam enye? Kpa ye emi enye ekenen̄erede ọdiọn̄ọ mme ndudue esie, enye ama enen̄ede ọbuọt idem ke ufak. Enye ama ọdiọn̄ọ n̄ko ke Jesus ama ọn̄wọn̄ọ ete ke ‘owo ekededi emi ọbuọtde idem ye imọ eyenyene nsinsi uwem.’ (John 3:16; Rome 6:23) Enye Paul ama etiene esịne ke otu mbon emi ẹbuọtde idem ke ufak. Enye ama enen̄ede enịm ke ekpededi owo akanam akwa idiọkn̄kpọ, ke Jehovah eyefen, ama akam edi owo oro akabade esịt.—Ps. 86:5.

9. Se Paul ekewetde ke Galatia 2:20 ekpep nnyịn nso?

⁹ Paul ama enịm ke Abasi ama imọ ata etieti, ke oro akanam enye ọnọ Jesus edikpa ọnọ imọ. (Kot Galatia 2:20.) Se Paul eketịn̄de ke utịt utịt ufan̄ikọ oro owụt nte eketiede enye ke idem. Enye ọkọdọhọ: ‘Eyen Abasi ama ama mi onyụn̄ ayak idemesie ọnọ kaban̄a mi.’ Paul ikekereke ke imọ imọdiọk ikan se Abasi akpamade. Enye ikọdọhọke, ‘Mmokụt ntak emi Jehovah amade nditọete mi, edi n̄kwe se ikpanamde enye ama mi.’ Paul ama eti nditọete ke Rome ete: “Christ [akakpa] ke ibuot nnyịn ke adan̄aemi nnyịn isụk idide mme anamidiọk.” (Rome 5:8) N̄kpọ ndomokiet ikemeke ndikpan Abasi ndima nnyịn!

10. Nso ke ikpep ke Rome 8:38, 39?

¹⁰ Kot Rome 8:38, 39. Paul ama ọdiọn̄ọ  nte ima emi Abasi amade nnyịn ọsọn̄de odudu eketre. Enye ekewet ete ke n̄kpọ ndomokiet “idikemeke ndidian̄ade nnyịn ke ima Abasi.” Paul ama ọdiọn̄ọ nte Jehovah ekenyenede ime ye nditọ Israel. Enye ama ọdiọn̄ọ n̄ko nte Jehovah akatuade enye mbọm. Ikọ esie oro eketie nte ndikpọdọhọ, ‘Edieke Jehovah ọkọnọde eyen esie edikpa ọnọ mi, nso ikpanam n̄kere ke enye imaha mi?’—Rome 8:32.

11. Nso ikanam Paul enịm ke Abasi ama imọ kpa ye emi enye akanamde utọ ndiọi n̄kpọ emi enye abatde ke 1 Timothy 1:12-15?

¹¹ Kot 1 Timothy 1:12-15. Anaedi ama esinen̄ede afịna Paul ke ini enye etide ndiọi n̄kpọ emi enye ekesinamde mbemiso enye edide Christian. Imosụk ise enye ọkọdọhọde ke imọ idi “akakan” ke otu ndiọi owo! Mbemiso enye akakabarede edi Christian, enye ama ọkọbọ mme Christian ke obio ke obio, omụm ndusụk ọkọkọbi; ke ini ẹyomde ndiwot ndusụk mmọ, enye ama enyịme ete ẹwot. (Utom 26:10, 11) Ndi emekeme ndikere nte ekpeketiede Paul ke idem enye okpokụt akparawa m̀mê n̄kaiferi ke esop emi mînyeneke ete ye eka, onyụn̄ eti ke imọ ima inyịme yak ẹwot mmọ? Paul ama enen̄ede atua n̄kpọfiọk aban̄a se enye ekesinamde oro. Edi se ima iketịbe ama etịbe, inyeneke se enye ekekemede ndinam mban̄a oro. Enye ama enịm ke Christ akakpa ọnọ imọ, onyụn̄ etịn̄ uko uko ete: “Ke mfọnido Abasi oro owo mîdotke ke ami ndi se ndide emi.” (1 Cor. 15:3, 10) Nso ke emi ekpep nnyịn? Nịm ke Christ akakpa ọnọ fi onyụn̄ anam fi ekeme ndidi ufan Jehovah. (Utom 3:19) Se inamde idahaemi ye se idinamde ke ini iso ebehe Jehovah, idịghe mme ndudue emi ikanamde ke edem, ekpededi ima idi Ntiense Jehovah ini oro m̀mê nnyịn ikedịghe.—Isa. 1:18.

12. Didie ke 1 John 3:19, 20 ekeme ndin̄wam nnyịn edieke ikerede ke nnyịn iwọrọke n̄kpọ m̀mê ke imọdiọk ikan se Jehovah amade?

 ¹² Ama ekere nte Jesus akakpade man ẹfen idiọkn̄kpọ fo, emekeme ndidọhọ, ‘N̄kereke nte mmodot se ẹnamde utọ n̄kpọ oro ẹnọ sia n̄wọrọke n̄kpọ ndomokiet.’ Nso ikeme ndinam fi ekere ntre? Sia nnyịn mîfọnke ima, esịt nnyịn ekeme ndibian̄a nnyịn anam ikere ke nnyịn iwọrọke n̄kpọ m̀mê ke imọdiọk ikan se Jehovah amade. (Kot 1 John 3:19, 20.) Ama etie ntre, ọfọn iti ke ‘Abasi okpon akan esịt nnyịn.’ Ekpededi esịt nnyịn ọdọhọ ke Jehovah imaha nnyịn, ke enye idinyụn̄ ifenke inọ nnyịn, oro ikpanke Ete nnyịn eke heaven ndima nnyịn nnyụn̄ mfen nnọ nnyịn. Ana iyom usụn̄ inịm ke Jehovah ama nnyịn. Se idin̄wamde nnyịn inam oro edi ndikot Ikọ Abasi kpukpru ini, n̄kọbọ ke akam, nnyụn̄ ndian idem ye ikọt esie. Ntak enen̄erede ọfọn inam mme n̄kpọ emi-e?

13. Didie ke ndikpep Ikọ Abasi edin̄wam nnyịn? (Se n̄ko ekebe emi “ Nte Ikọ Abasi An̄wamde Mmọ.”)

¹³ Kpep Ikọ Abasi kpukpru usen, oro ayanam fi enen̄ede ọdiọn̄ọ nti edu Jehovah. Oyonyụn̄ okụt nte enye amade fi eketre. Afo nditie n̄kere se okotde ke Bible kpukpru usen ayan̄wam fi ekere n̄kpọ ọfọn, onyụn̄ enen̄ede ekikere esịt fo emi mîfọnke. (2 Tim. 3:16) Ama esisọn̄ ebiowo kiet emi ekerede Kevin ndinịm ke Abasi ada imọ ke n̄kpọ. Enye ọdọhọ ete: “Ami ndikot Psalm 103 ntie n̄kere an̄wam mi n̄kûsukere se n̄kesikerede oro aba, onyụn̄ anam enen̄ede an̄wan̄a mi nte Jehovah adade mi.” Eva emi iketịn̄de iban̄a ke ikpehe ition ọdọhọ ete: “Mbemiso ndụkde idap kpukpru usen, mmesitie n̄kere nsio nsio n̄kpọ emi Jehovah amade. Oro esinam esịt ana mi sụn̄, onyụn̄ anam nnen̄ede mbuọt idem ye Jehovah.”

14. Didie ke akam ekeme ndin̄wam nnyịn?

¹⁴ Kọbọ ke akam. (1 Thess. 5:17) Edieke iyomde ndidi ufan ye owo, ana isiwak ndineme nneme ye enye inyụn̄ itịn̄ nte etiede nnyịn ke idem inọ enye. Ntre ke onyụn̄ edi ye nnyịn ndidi ufan Jehovah. Ke ini ibọn̄de akam itịn̄ se ikerede, nte etiede nnyịn ke idem, ye se ifịnade nnyịn inọ Jehovah, iwụt ke imọbuọt idem ye enye, ke imonyụn̄ inịm ke enye ama nnyịn. (Ps. 94:17-19; 1 John 5:14, 15) Yua emi iketịn̄de iban̄a ke ikpehe iba ọdọhọ ete: “Ke ini mbọn̄de akam, idịghe se iketịbede inọ mi usen oro kpọt ke nsidọhọ Jehovah. Mmesidọhọ enye nnennen nnennen se n̄kerede ye nte etiede mi ke idem. Oro an̄wam mi sụn̄sụn̄ sụn̄sụn̄ yak n̄kụt ke Jehovah itiehe nte akwaowo itieutom, ke enye edi Ete emi amade nditọ esie.”—Se ekebe emi “ Ndi Omokot?”

15. Siak n̄kpọ kiet emi Jehovah anamde owụt ke imama nnyịn.

 ¹⁵ Dian idem ye nti ufan; mmọ ẹdi enọ Abasi. (Jas. 1:17) Ete nnyịn eke heaven ndinọ nnyịn nditọete emi ‘ẹmade nnyịn kpukpru ini’ owụt ke enye ama nnyịn etieti. (N̄ke 17:17) Ini Paul ekewetde leta ọnọ nditọete ke Colossae, enye ama asiak ndusụk nditọete emi ẹken̄wamde enye onyụn̄ ọdọhọ ke mmọ ẹdi “mme andin̄wam emi ẹsọn̄ọde [imọ] idem.” (Col. 4:10, 11) Christ Jesus ke idemesie ama oyom un̄wam oto mme ufan esie, ama onyụn̄ enem enye ini mme angel ye mme owo ẹken̄wamde enye.—Luke 22:28, 43.

16. Didie ke nti ufan ẹdin̄wam nnyịn inen̄ede ikpere Jehovah?

¹⁶ Ndi emesiyom un̄wam oto mme ufan emi Jehovah ọnọde fi ke esop esie? Mmọ ẹma ẹyom ndin̄wam fi, ndi emesinyịme? Nditịn̄ mfịna nnyịn nnọ ufan emi ọsọn̄de idem ke esop iwọrọke ke nnyịn inen̄ekede ibuọt idem ye Jehovah, akam ekeme ndikpeme nnyịn. James emi iketịn̄de iban̄a ke ikpehe ition ọdọhọ ete: “Ami ndidi ufan ye nditọete emi ẹsọn̄de idem ke esop an̄wam mi etieti. Ekpetie mi nte ke Jehovah imaha mi, mmọ ẹsinyene ime ẹkpan̄ utọn̄ ẹkop nte etiede mi ke idem, ẹnyụn̄ ẹdọhọ ke imama mi. Oro esinam n̄kụt ke Jehovah ama mi onyụn̄ ekere aban̄a mi.” Omokụt do ke ọfọn yak inen̄ede idian idem ye nditọete nnyịn!

17-18. Ikpokop uyo inọ anie? Ntak ikpokopde?

¹⁷ Satan iyomke nnyịn ika iso in̄wana ndinam se ifọnde. Enye oyom nnyịn inịm ke Jehovah imaha nnyịn, ke nnyịn idotke se enye anyan̄ade. Edi nte ikpepde ke ibuotikọ emi, ata anafai nsu edi oro.

¹⁸ Jehovah ama fi. Afo edi ọsọn̄urua n̄kpọuto ọnọ enye. Edieke okopde uyo esie, enye ayama fi ke nsinsi nte enye amade Jesus. (John 15:10) Ntre, kûkpan̄ utọn̄ unọ Satan, esịt fo ama onyụn̄ ọdọhọ ke ọmọdiọk akan se Jehovah amade, kûnịm. Utu ke oro, kpan̄ utọn̄ nọ Jehovah sia Jehovah okụt eti n̄kpọ ke idem nnyịn owo kiet kiet. Nen̄ede nịm ke ‘Jehovah enem esịt aban̄a ikọt esie,’ ndien afo esịne do!