1. Ndamban̄a paradise edi nso? Nso ke ikpebiere ndinam?

 ENYENE paradise kiet emi odude ke isọn̄ mfịn. Mme owo ke esịt tep-tep, ke ẹnam nti n̄kpọ okoneyo ye uwemeyo. Mbon emi ẹdude do ẹdi ke miliọn ke miliọn, ẹnyụn̄ ẹdu ke ata emem. Mbon emi ẹma ẹkedodu do ẹbiere ke mmimọ idikpọn̄ke tutu amama. Mmọ ẹnyụn̄ ẹyom adan̄a ediwak owo emi ẹkemede ẹditiene mmimọ ẹkop inem utọ itie oro. Ewe paradise ke itetịn̄ iban̄a emi? Edi ndamban̄a paradise! a

2. Ntak emi ndamban̄a paradise oro edide n̄kpọ n̄kpaidem-e?

² N̄kpọ n̄kpaidem kiet emi Jehovah anamde edi enye ndinam ikọt esie ẹdu ke emem ẹnyụn̄ ẹdiana kiet ke ererimbot emi Satan ama akanam akabade itie ibak, n̄kpọndịk, ye usua mi. (1 John 5:19; Edi. 12:12) Edima Abasi nnyịn okụt kpukpru ndiọi n̄kpọ emi idiọk ererimbot emi anamde mme owo, edi enye anam ikọt esie ẹkụt ke imọ idiyakke n̄kpọ anam mmọ man mmọ ẹkeme ndika iso nnam n̄kpọ nnọ imọ ye idatesịt. Bible etịn̄ aban̄a ndamban̄a paradise emi nte “ebiet ubọhọ” emi edide okpodụk n̄kpọ inamke fi, ye “in̄wan̄ oro mmọn̄ odude.” (Isa. 4:6; 58:11) Edidiọn̄ Jehovah anam mbon emi ẹdude do ẹkop inemesịt, ifeheke ndịk ke mme akpatre usen emi ẹsọn̄de ndiyọ mi.​—Isa. 54:14; 2 Tim. 3:1.

3. Didie ke Isaiah ibuot 65 okosu ke eset?

³ Ke Isaiah ibuot 65, Jehovah ama ada prọfet Isaiah etịn̄ nte n̄kpọ editiede ye mbon emi ẹdidude ke ndamban̄a paradise oro. Se enye eketịn̄de oro ekebem iso osu ke isua 537 mbemiso eyo Christ. Ini oro, mme Jew emi ẹkefiakde ẹtiene Jehovah ke ofụri esịt ẹma ẹwọrọ ke ufụn mbon Babylon ẹnyụn̄ ẹfiak ẹnyọn̄  obio emana mmọ. Jehovah ama ọdiọn̄ ikọt esie onyụn̄ an̄wam mmọ ẹnam Jerusalem emi ama okowụre ana ke isọn̄ afiak eye, ẹnyụn̄ ẹnam temple esie afiak edi akpan ebiet emi ẹsituakde ibuot ẹnọ ata Abasi ke Israel.​—Isa. 51:11; Zech. 8:3.

4. Didie ke Isaiah ibuot 65 osu ke eyo nnyịn?

⁴ Ọyọhọ ikaba emi prọfesi Isaiah oro okosude ọkọtọn̄ọ ke 1919 eyo nnyịn. Isua oro ke ikọt Jehovah eyomfịn ẹkewọrọ ke ufụn Akwa Babylon. Ini oro ke ndamban̄a paradise oro ọkọtọn̄ọ nditara nsịm ofụri ererimbot. Ikọt Abasi emi ẹkesịnde idem ẹkwọrọ ikọ ẹma ẹsiak ediwak esop ẹnyụn̄ ẹnyene nti edu emi spirit Abasi esin̄wamde owo enyene. Irenowo ye iban emi ẹkesidide mbon afai, ẹdu oburobụt uwem, ẹnyụn̄ ẹnyene uwem unam ikọt, ẹma “ẹmen obufa owo ẹsịne emi ẹkebotde ekekem ye uduak Abasi.” (Eph. 4:24) Imọdiọn̄ọ ke idikụt ediwak edidiọn̄ emi Isaiah eketịn̄de aban̄a ke ini iso, ke obufa ererimbot emi edide. Edi idem idahaemi, mme ufọn emi idiade ke ntak emi idude ke ndamban̄a paradise idịghe ekpri. Ẹyak ineme se ndamban̄a paradise oro anamde ọnọ nnyịn ye ntak emi nnyịn mîkpọkpọn̄ke enye tutu amama.

NTE MBON EMI ẸDUDE KE NDAMBAN̄A PARADISE ẸTIEDE

5. Nso ke ẹken̄wọn̄ọ ke Isaiah 65:13 emi ikụtde ke ndamban̄a paradise?

⁵ Mmọ ẹkop nsọn̄idem ẹnyụn̄ ẹnyene nduọkodudu. Prọfesi Isaiah anam inen̄ede ikụt nte uwem mbon emi ẹdude ke ndamban̄a paradise enen̄erede okpụhọde ye eke mbon emi mîdụhe do. (Kot Isaiah 65:13.) Jehovah enen̄ede atat ubọk ọnọ ikọt esie kpukpru se idin̄wamde mmọ ẹnen̄ede ẹkpere enye. Imenyene edisana spirit esie, inyene Ikọ esie, ye mme vidio ye n̄wed Ikọ Abasi. Ntre imekeme ndidia, n̄n̄wọn̄, nnyụn̄ ndara. (Men Ediyarade 22:17 domo.) Edi mbon emi mîdụhe ke ndamban̄a paradise oro ẹnyene mbọm etieti. Mmọ ke ẹkpa biọn̄, itọn̄ ke asat mmọ, bụt ke onyụn̄ anam mmọ. Mmọ idiọn̄ọke Abasi.​—Amos 8:11.

6. Didie ke Joel 2:21-24 etịn̄ aban̄a ndusụk enọ emi Jehovah ọnọde nnyịn? Didie ke mme n̄kpọ oro ẹkeme ndinam ufọn nnọ nnyịn?

⁶ Ke prọfesi Joel, enye akada mme akpan n̄kpọ nte wheat, wine, ye aran olive owụt ke Jehovah esitat ubọk ọnọ ikọt esie se mmọ ẹdade ẹdu uwem. Oro esịne mme n̄kpọ emi ẹdin̄wamde mmọ ẹka iso ẹbuọt idem ye Enye. (Joel 2:21-24) Enye esida Bible, mme n̄wed esop Abasi, ikpehe Intanet nnyịn, mme mbono esop, ye n̄kpri ye ikpọ mbono anam oro. Imekeme ndibọ ufọn nto mme n̄kpọ emi kpukpru usen. Ima inam ntre, idem eyenen̄ede ọsọn̄ nnyịn, iyonyụn̄ inen̄ede inyene nduọkodudu.

7. Nso isinam ikop “idatesịt”? (Isaiah 65:14)

⁷ Mmọ ẹkop inemesịt ẹnyụn̄ ẹyụhọ ye se ẹnyenede. Ikọt Abasi ẹkeme “[ndisio] n̄kpo idara” sia esịt enem mmọ etieti ke se Jehovah anamde ọnọ mmọ. (Kot Isaiah 65:14.) Mme akpanikọ emi ikụtde ke Bible emi ẹsọn̄ọde nnyịn idem, mme n̄kpọ emi Bible ọn̄wọn̄ọde emi ẹdọn̄de nnyịn esịt, ye idotenyịn emi inyenede ke ntak emi Christ ekedikpade afak nnyịn ẹnam ikop “idatesịt.” Ndineme mme n̄kpọ emi ye nditọete nnyịn esinam esịt enen̄ede enem nnyịn!​—Ps. 34:8; 133:1-3.

8. Nso idi akpan n̄kpọ iba emi ikụtde ke ndamban̄a paradise?

⁸ Nte ikọt Jehovah ẹmade idemmọ ẹnyụn̄ ẹdianade kiet ẹdi akpan n̄kpọ iba emi ikụtde ke ndamban̄a paradise. Nte itiede idahaemi an̄wam nnyịn ikụt nte uwem editiede ke obufa ererimbot emi edide ikọt Jehovah ẹyema idemmọ ẹnyụn̄ ẹdiana kiet ẹkan nte edide mfịn. (Col. 3:14) Sista nnyịn kiet etịn̄ se enye okokụtde ke otu ikọt Jehovah akpa  ini emi enye osobode ye mmọ. Enye ọdọhọ ete: ‘Idem ke ubon nnyịn, n̄kọfiọkke nte n̄kpasan̄ade n̄kop inemesịt. Akpa ini oro n̄kokụtde mme owo ẹmade kiet eken ata ima ekedi ke otu Mme Ntiense Jehovah.’ Owo ekededi emi oyomde ndikop ata inemesịt nnyụn̄ nyụhọ ye se enye enyenede ana edi edidu ke ndamban̄a paradise. Inamke n̄kpọ m̀mê ererimbot ẹda didie ikọt Jehovah, ke enyịn Jehovah ye ke enyịn kpukpru ikọt esie ke ofụri ererimbot, mmọ ẹnyene eti enyịn̄.​—Isa. 65:15.

9. Nso ke Isaiah 65:16, 17 etịn̄ aban̄a mme n̄kpọ emi ẹbiakde nnyịn idahaemi ẹnyụn̄ ẹkamade nnyịn ẹmia ufen?

⁹ Mmọ ẹnyene ifụre, ekikere onyụn̄ ana mmọ sụn̄. Isaiah 65:14 ọdọhọ ke mbon emi mîmaha ndidu ke ndamban̄a paradise oro “ẹyetuan̄a ke ntak ubiak esịt ẹyenyụn̄ ẹfiori n̄kpo ke ntak emi ẹfụhọde ke spirit.” Edi nso kaban̄a kpukpru mme n̄kpọ emi ẹsụk ẹdide n̄kpọ ubiak ẹnọ ikọt Abasi, ẹnyụn̄ ẹkamade mmọ ẹmia ufen? Utịt utịt, “ẹyefre” mme n̄kpọ oro, “mmọ ẹyenyụn̄ ẹdịbe [Abasi] ke enyịn.” (Kot Isaiah 65:16, 17.) Jehovah ayanam kpukpru mfịna nnyịn ẹtre. Ndien nte ini akade, nnyịn iditịghi ubiak ekededi emi mme n̄kpọ oro ẹkenọde nnyịn.

10. Nso inam enem fi nte enyenede ifet ndisidu ye nditọete fo? (Se ndise n̄ko.)

¹⁰ Idem idahaemi, ima idu ke mbono esop, esitie nte ẹduọk nnyịn mbịtmbịt mmọn̄. Esịt esina nnyịn sụn̄, nnyịn inyụn̄ ikpọnọde editịmede esịt ye ukụt idiọk ererimbot emi inịm kan̄a. Ima inyene ima, idatesịt, emem, mfọnido, ye ifụre ifụre ido emi spirit Abasi esin̄wamde owo enyene, iyetiene inam esịt ana nditọete nnyịn sụn̄. (Gal. 5:22, 23) Enen̄ede enem nnyịn nte idude ke esop Abasi! Abasi ama ọn̄wọn̄ọ ke imọ iyanam “mbufa enyọn̄ ye obufa isọn̄” ẹdu. Mbon emi ẹsọn̄ọde ẹsịne ke ndamban̄a paradise ẹyekụt ini emi Abasi edinamde se enye ọkọn̄wọn̄ọde oro osu, n̄kpọ isụhọke.

11. Isaiah 65:18, 19 owụt ke ndamban̄a paradise emi Jehovah anamde ọnọ nnyịn akpanam inam nso?

¹¹ Mmọ ẹkọm Abasi ẹnyụn̄ ẹtie idara idara. N̄kpọ efen emi Isaiah eketịn̄de okowụt ntak emi ‘ikpadatde esịt inyụn̄ idara’ ke ndamban̄a paradise. Jehovah anam ndamban̄a paradise oro odu. (Kot Isaiah 65:18, 19.) Imosụk ise enye adade nnyịn an̄wam mbon emi ẹdọn̄ọde ke nsio nsio n̄ka ererimbot ẹnyụn̄ ẹkpade nsatitọn̄ Ikọ Abasi ẹwọn̄ọ ẹdi ediye ndamban̄a paradise nnyịn emi! Nsio nsio edidiọn̄ emi inyenede ke ntak emi idiọn̄ọde akpanikọ ẹnenem nnyịn, onyụn̄ ọdọn̄ nnyịn ndinam mbon en̄wen ẹdiọn̄ọ mme akpanikọ oro.​—Jer. 31:12.

12. Mme n̄kpọ emi ẹn̄wọn̄ọde ke Isaiah 65:20-24 ẹtie fi didie ke idem? Ntak etiede fi ntre?

 ¹² N̄kpọ en̄wen emi enen̄erede enem nnyịn edi idotenyịn emi inyenede ke ntak emi idude ke ndamban̄a paradise. Idatesịt emi n̄kpọ oro ọnọde nnyịn idịghe ekpri. Tuak da kere kpukpru se idikụtde inyụn̄ inamde ke obufa ererimbot emi Abasi edimende idi! Bible ọn̄wọn̄ọ ke “eyen usen ifan̄ eke awapde eba . . . oro mîyọhọke usen esie” m̀mê “akani owo oro mîyọhọke usen esie” ididụhe aba do. ‘Iyọbọp ufọk inyụn̄ idụn̄ ke esịt; iyọtọ in̄wan̄ vine inyụn̄ idia mbun̄wụm mmọ.’ Nnyịn “idikpaha utom ke ikpîkpu” koro ididi mbon emi “Jehovah ọdiọn̄de.” Uwem emi Jehovah ọn̄wọn̄ọde ọnọ nnyịn edi enye emi n̄kpọ mîdinamke nnyịn, eyenem nnyịn, oyonyụn̄ enyene ibuot. Mbemiso owo ekededi okụbọrede inua eben̄e Abasi se enye oyomde, Abasi ama ọdọdiọn̄ọ oyonyụn̄ ọnọ “kpukpru mme odu-uwem n̄kpọ” se mmọ ẹyomde yak oyụhọ mmọ.​—Isa. 65:20-24; Ps. 145:16.

13. Didie ke Isaiah 65:25 etịn̄ aban̄a mme n̄kpọ emi mme owo ẹsikpụhọrede ke uwem mmọ, mmọ ẹma ẹtọn̄ọ ndinam n̄kpọ nnọ Jehovah?

¹³ Mmọ ẹtie emem emem ẹnyụn̄ ẹdu ke ifụre. Spirit Abasi an̄wam ediwak mbon emi ẹkedide mbon afai ye mbon n̄kari, ẹnyụn̄ ẹnyenede uwem unam ikọt ẹkpụhọde. (Kot Isaiah 65:25.) Abasi osụk mmọ ide, mmọ ẹnyụn̄ ẹduọn̄ọ n̄karafan̄ n̄karafan̄ edu emi mîkọfọnke do. (Rome 12:2; Eph. 4:22-24) Imọdiọn̄ọ ke ikọt Abasi ifọnke ima, ntre idisụk ikaka iso inam ndudue. Edi Jehovah anam “kpukpru orụk owo” emi ẹmade enye ẹnyụn̄ ẹmade idemmọ ẹdiana kiet ẹnyụn̄ ẹdu ke emem. (Titus 2:11) Ata ọkpọsọn̄ Abasi kpọt ekeme ndinam utọ utịben̄kpọ oro!

14. Didie ke Isaiah 65:25 okosu brọda kiet ke idem?

¹⁴ Ndi mme owo ẹkeme ndinen̄ede n̄kpụhọde ata ofụri ofụri ntem? Kop uwụtn̄kpọ kiet mi. Enyene akparawa kiet emi ufọk-n̄kpọkọbi eketiede nte ufọk ọnọ enye; ekesidi ododụk, ọwọwọrọ. Etisịm ini emi enye edide isua 20, enye ekedi etubom oburobụt ido ye afai. Ẹma ẹmomụm enye ẹkekọbi ke ntak emi enye eyịpde moto owo, obụn̄de ufọk owo odụk eyịp n̄kpọ, onyụn̄ anamde ikpọ ndiọi n̄kpọ eken. Enye ama esiben̄e idem ndin̄wana ye owo ekededi. Akpa ini emi ẹdade Bible ẹkwọrọ ikọ ẹnọ enye yak enye okop akpanikọ onyụn̄ ọtọn̄ọ ndidụk mbono esop Mme Ntiense Jehovah, enye ama enịm ke imokụt ebiet emi imọ ikemede ndidu, uwem imọ enyene ibuot. Ebiet oro ekedi ndamban̄a paradise. Ke enye ama akana baptism, enye ama esiwak nditie n̄kere nte Isaiah 65:25 okosude enye ke idem. Akparawa emi ekedide owo afai onyụn̄ enyenede uwem ekpe ikọt ama akabade edi owo emem, etie sụn̄sụn̄ nte eyenerọn̄.

15. Nso inam iyom ndidọhọ mbon en̄wen ẹditiene nnyịn ẹdu ke ndamban̄a paradise? Didie ke ikeme ndinam oro?

¹⁵ Isaiah 65:13 ọtọn̄ọ ntem: “Jehovah Akakan Ọbọn̄ Andikara ọdọhọ ete.” Utịt ufan̄ikọ 25 ọdọhọ “Jehovah ọdọhọ.” Inyeneke se Jehovah ọn̄wọn̄ọde emi mîsitịbeke. (Isa. 55:10, 11) Ndamban̄a paradise ododu idahaemi. Nditọete emi Jehovah ọnọde nnyịn ẹdi anana-mbiet. Ima idu ke otu ikọt Abasi, imenyene emem, esịt onyụn̄ ana nnyịn sụn̄ kpa ye emi idude ke ererimbot afai. (Ps. 72:7) Nti ntak emi ẹnam iyom ndin̄wam adan̄a ediwak owo nte ikekeme ẹditiene ẹdi nditọete nnyịn. Ima isịn ekikere ke ndinam mme owo ẹdi mbet Christ, iyekeme ndinam oro.​—Matt. 28:19, 20.

NTE IKPANAMDE NDAMBAN̄A PARADISE EMI ỌDỌN̄ MBON EN̄WEN NDIDI

16. Nso ikeme ndinam ọdọn̄ mme owo ndiyom ndididu ke ndamban̄a paradise?

¹⁶ Enyene se nnyịn owo kiet kiet ikpanamde yak ndamban̄a paradise ọdọn̄ mbon en̄wen ndidi. Se idin̄wamde nnyịn inam oro edi  ndikpebe Jehovah. Jehovah isifọrike mme owo ikpọ ke isịn idụri idisịn ke esop esie; mmọ ẹmama, imaha-ma. Utu ke oro, enye ‘esidụri’ mme owo sụn̄sụn̄ adian idem. (John 6:44; Jer. 31:3) Mbon emi ẹnyenede eti esịt ẹma ẹkpep ẹban̄a ima Abasi ye nsio nsio edu esie, mmọ ẹsidian idem ye enye. Didie ke ikeme ndida nti edu nnyịn ye nti n̄kpọ emi inamde nnam ndamban̄a paradise emi ọdọdọn̄ mme owo ndidi?

17. Nso ke ikpanam man ndamban̄a paradise emi ọdọdọn̄ mbon en̄wen ndidi?

¹⁷ Usụn̄ kiet emi ikemede ndinam ndamban̄a paradise emi ọdọdọn̄ mbon en̄wen ndidi edi nnyịn ndima nditọete nnyịn nnyụn̄ mfọn ido ye mmọ. Mbufa owo ẹma ẹdụk mbono esop nnyịn, iyom etie mmọ ke idem nte ẹketiede mbon emi mîkedịghe Ntiense ke Corinth ke eset, edi emi etiede nte ẹma ẹsidụk mbono esop. Mmọ ẹkedọhọ ẹte: “Ke akpanikọ Abasi odu ke otu mbufo.” (1 Cor. 14:24, 25; Zech. 8:23) Ntre ana ika iso inam item emi ọdọhọde “[itie] emem emem ye kiet eken.”​—1 Thess. 5:13.

18. Nso ikeme ndinam esop Abasi ọdọn̄ mme owo ndidi?

¹⁸ Ana idomo kpukpru ini ndida nditọete nnyịn nte Jehovah adade. Nte idisan̄ade inam oro edi nnyịn ndisịn ekikere ke nti edu mmọ idịghe mme n̄kpọ emi mmọ mînamke ọfọn, sia usen kiet mmọ ẹyefọn ẹma idinyụn̄ inamke mme n̄kpọ oro aba. Ima ‘isifọn ido ye kiet eken, itua owo mbọm, inyụn̄ ifen kiet eken ke ofụri esịt,’ ima ayan̄wam nnyịn ibiere mfịna ekededi ye nditọete nnyịn. (Eph. 4:32) Mbon emi ẹyomde ẹnyene utọ uwem oro ye mmọ ẹma ẹkụt nte inamde n̄kpọ ntre ye nditọete nnyịn, ọyọdọn̄ mmọ nditiene ndidu ke ndamban̄a paradise oro. b

 SỌN̄Ọ SỊNE KE NDAMBAN̄A PARADISE

19. (a) Ke ekebe emi, “ Mmọ Ẹma Ẹkpọn̄ Ekem Ẹfiak Ẹdi,” nso ke ndusụk mbon emi ẹkekpọn̄de ndamban̄a paradise ẹketịn̄ ke mmọ ẹma ẹkefiak ẹnyọn̄ ẹdi? (b) Nso ke ikpebiere ndinam? (Se ndise n̄ko.)

¹⁹ Imenen̄ede ima ndamban̄a paradise nnyịn emi! Edi eyo esiere, enye eye akan nte ekesiyede; mbon emi ẹtorode Jehovah ẹnyụn̄ ẹdude ke esịt ke ẹwak ẹkan nte ẹkesidide. Ẹyak inem esịt ke nsinsi ke paradise emi Jehovah anamde ọnọ nnyịn do. Owo ekededi emi oyomde ndibọ nduọkodudu, ndiyụhọ se enye enyenede, ndinyene emem, mînyụn̄ iyomke n̄kpọ ndomokiet anam enye, ana edi edisịne ke ndamban̄a paradise emi, okûnyụn̄ ukpọn̄ enye tutu amama! Edi idịghe se isịnede ifre idem enyịn sia Satan ke odomo enyọn̄ ye isọn̄ nditap nnyịn nsio do. (1 Pet. 5:8; Edi. 12:9) Inaha iyak enye okụt ibuot. Ẹyak idomo nte ikekeme ndinam paradise emi akaka iso eye, oburobụt n̄kpọ okûdo do, emem okûnyụn̄ ukpọn̄ do.