Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Nso ke ikụt ke Bible emi anamde inịm ke mbọm nnyịn esinam Abasi?

Abasi ama okụt ufen oro nditọ Israel ẹkebọde ke Egypt, ufen mmọ ama onyụn̄ abiak enye. (Ex. 3:7; Isa. 63:9) Mbọm mme owo ekeme ndinam nnyịn n̄ko sia Abasi okobot nnyịn ke mbiet esie. Abasi esitua nnyịn mbọm ọkpọkọm ikere ke enye ikemeke nditua utọ owo nte nnyịn mbọm.—wp18.3, p. 8-9.

Didie ke se Jesus ekekpepde akan̄wam mme owo ẹtre asari?

Ediwak mme Jew ke eyo Jesus ẹma ẹsisari owo. Christ ama owụt ke oyom isụhọde idem onyụn̄ ekpep ke ifọnke owo ada obio esie atan̄ idem. Enye ọkọdọhọ ke kpukpru nnyịn idi nditọete.—w18.06, p. 9-10.

Abasi ndiketre ndiyak Moses odụk Isọn̄ Un̄wọn̄ọ ekpep nnyịn nso?

Moses ama ekpere Jehovah. (Deut. 34:10) Ke n̄kpọ nte isua 40 ama ekebe, nditọ Israel ẹnyụn̄ ẹkpere ndisịm Isọn̄ Un̄wọn̄ọ, mmọ ẹma ẹfiak ẹseme ẹte mmimọ ikwe mmọn̄ in̄wọn̄. Abasi ama ọdọhọ Moses etịn̄ ikọ ọnọ itiat. Edi Moses ama amia itiat oro. Etie nte Jehovah akayat esịt ye Moses sia enye mîkamaha ndinam se Jehovah ọkọdọhọde mîdịghe edi ke Moses ikọnọhọ Jehovah ubọn̄ ke utịben̄kpọ oro. (Num. 20:6-12) Akpana emi ekpep nnyịn ntak emi ọfọnde ndikop uyo Jehovah nnyụn̄ nnọ enye ubọn̄.—w18.07, p. 13-14.

Didie ke ikeme ndinam ndudue edieke idade se ikụtde ke enyịn ibiere n̄kpọ?

N̄kpọ ita emi ke ediwak owo ẹsida ẹbiere nte ẹkpedade owo: ebiet emi owo otode, inyene, ye isua emana. Ọfọn ikpep ndida mme owo nte Jehovah adade! (Utom 10:34, 35)—w18.08, p. 8-12.

Didie ke mbiowo emi ẹma ẹkesọn̄ ẹn̄wam esop Abasi?

Jehovah ke amama ebiowo emi ama ọkọsọn̄, emi ẹma ẹkenyụn̄ ẹkpụhọ utom esie. Enye osụk ekeme ndin̄wam mbon en̄wen. Enye ekeme ndin̄wam mme ebe oro mîtieneke iban mmọ ikpono Jehovah, an̄wam mbon oro mîwọrọke an̄wautom aba, ekpep mme owo Bible, onyụn̄ esịn idem ọkwọrọ ikọ.—w18.09, p. 8-11.

Nso ye nso isịne ke otu mme akpan n̄kpọutom nnyịn?

Kad jw.org, n̄wedikot, tract itiaita, ye Enyọn̄-Ukpeme ye Ẹdemede! Ndiye n̄kpri n̄wed ifan̄, n̄wed iba oro isidade ikpep owo Bible, ye vidio inan̄ ẹsịne n̄ko. Kiet ke otu vidio oro edi Ntak Emi Ekpekpepde Bible?—w18.10, p. 16.

Didie ke Christian ekeme ‘ndidep akpanikọ’ nte Mme N̄ke 23:23 ọdọhọde?

Idịghe okụk ke idida idep akpanikọ. Edi ana iyak ini atak nnyịn, inyụn̄ inam n̄kpọ man inyene enye.—w18.11, p. 4.

Nte Hosea akanamde n̄kpọ ye Gomer an̄wan esie ekpep nnyịn nso?

Gomer ama esisịn efịbe ediwak ini, edi Hosea ama efen enye, ikonyụn̄ isioho enye ndọ. Edieke ebe m̀mê n̄wan eyenete esịnde efịbe, enye emi mîsịnke efịbe ekeme ndibiere ndifen nnọ enye. Edieke enye emi mîsịnke efịbe afiakde ọtọn̄ọ ndinyene ebuana idan̄ ye enye emi ekesịnde efịbe, ọwọrọ enye idinyeneke aba isọn̄ ndidian̄ade ndọ.—w18.12, p. 13.