Ndi ama etịn̄ enyịn okot mme Enyọn̄-Ukpeme isua emi? Ọfọn, se m̀mê emekeme ndibọrọ mme mbụme emi:

Ikpanam n̄kpọ didie ye mme Christian emi ẹyetde aran?

Imama nte mmọ ẹsọn̄ọde ẹda ẹnam n̄kpọ Abasi; edi nnyịn isinamke etie nte mmọ ẹdi n̄kpọ ẹkan se mmọ ẹdide. Nnyịn idịghe mbon emi “[ẹmade] mme ọwọrọiso owo.” (Jude 16) Nnyịn idibụpke mmọ nte mmọ ẹkesan̄ade ẹdiọn̄ọ ke ẹyet mmimọ aran, sia mbubehe enyene-idem edi oro.—w20.01, p. 28-29.

Nso inam fi enịm ke Jehovah ọdiọn̄ọ fi?

Bible owụt ke Jehovah ama ọdiọn̄ọ fi toto ke ini emi ekesịnede ke idịbi eka fo. Enye esikop akam fo. Enye ọfiọk se afo ekerede ye nte etiede fi ke idem; se anamde ekeme ndinam esịt enem enye mîdịghe anam esịt ayat enye. (1 Chron. 28:9; N̄ke 27:11) Enye okokot fi adian idem.—w20.02, p. 12.

Ini ewe ke ikpetịn̄ ikọ, ini ewe ke nnyịn mîkpetịn̄ke?

Esinenem nnyịn ndidọhọ mbon en̄wen n̄kpọ mban̄a Jehovah. Ke ini ikụtde ke owo anam n̄kpọ emi ekemede ndinam enye akanam akwa idiọkn̄kpọ, nnyịn isidopke uyo. Ke ini oyomde ẹnọ owo item, mbiowo ẹsinam oro. Nnyịn isitịn̄ke nte ẹnamde utom nnyịn ke mme idụt emi ẹkpande utom nnyịn inọ mbon en̄wen, isinyụn̄ idọhọke ẹtịn̄ ẹnọ nnyịn. Nnyịn isitịn̄ke n̄kpọ esop emi idiọn̄ọde ke edi ikọ idịbi inọ mbon en̄wen.—w20.03, p. 20-21.

Didie ke n̄kukun̄kpọyọriyọ emi ẹtịn̄de ẹban̄a ke Joel ibuot 2 okpụhọde ye eke Ediyarade ibuot 9?

Joel 2:20-29 ọdọhọ ke Abasi ebịn mme n̄kukun̄kpọyọriyọ efep onyụn̄ ọn̄wọn̄ọ ke imọ iyọnọ usiene ke se mme n̄kukun̄kpọyọriyọ ẹketade ẹbiat. Ekem Abasi an̄wan̄a spirit esie ọduọk. Emi eketịbe ini mbon Babylon ẹkesobode Jerusalem ye ke ediwak isua ama ekebe. Ediyarade 9:1-11 owụt se ikọt Jehovah emi ẹyetde aran ẹsinamde ke eyo nnyịn; se mmọ ẹnamde ebiet se n̄kukun̄kpọyọriyọ ẹsinamde. Mmọ ẹsitịn̄ se Abasi aduakde ndinam idiọk ererimbot emi, se mmọ ẹtịn̄de onyụn̄ afafịna mbon emi ẹdade ye ererimbot emi.—w20.04, p. 3-6.

Anie edi “edidem edere” mfịn?

Russia ye mme idụt emi ẹdianade ye enye. Mmọ ẹkpan utom ukwọrọikọ ẹnyụn̄ ẹsua Mme Ntiense Jehovah. Edidem edere ke odomo idem ye edidem usụk.—w20.05, p. 13.

Ndi “mbun̄wụm spirit” okụre ke edu usụkkiet emi ẹsiakde ke Galatia 5:22, 23?

Ihih. Edisana spirit esin̄wam nnyịn inyene nti edu efen, utọ nte edinen ido. (Eph. 5:8, 9)—w20.06, p. 17.

Mme owo ẹkeme ndida fi didie edieke esiwakde ndidọn̄ n̄kpọ mban̄a idemfo ke Intanet?

Afo ndidọn̄ n̄kpọ ke Intanet mban̄a idemfo ekeme ndinam mme owo ẹda ke afo edi owo n̄wụtidem, ke usụhọkede idem.—w20.07, p. 6-7.

Nso ke mme ọkwọrọikọ ẹkeme ndikpep nto nta mme ọkọiyak?

Mmọ ẹsika ọkọ ke ebiet ye ini emi mmọ ẹkemede ndikụt iyak mmụm. Mmọ ẹfiọk ndikama nnennen n̄kpọutom n̄kọ iyak. Mmọ ẹnyene uko ẹka iso ẹkọ iyak idem ke ini enyọn̄ ọdiọkde. Imekeme ndinam mme n̄kpọ emi ini ikwọrọde ikọ.—w20.09, p. 5.

Didie ke ikpan̄wam nditọ ukpepn̄kpọ Bible nnyịn ẹnen̄ede ẹma Jehovah?

Imekeme ndidọhọ mmọ ẹsikot Bible kpukpru usen ẹnyụn̄ ẹtie ẹkere se mmọ ẹkotde. Imekeme ndikpep mmọ n̄ko nte ẹkpebọn̄de akam.—w20.11, p. 4.

Mmanie ke ẹketịn̄ ẹban̄a n̄ko ini ẹdọhọde: “Ke Christ ẹyenam kpukpru owo ẹdu uwem”?—1 Cor. 15:22.

Ikọ apostle Paul ikọwọrọke ke ẹdinam kpukpru owo ẹset. “Kpukpru owo” emi enye eketịn̄de aban̄a ẹsịne mme Christian oro ẹyetde aran, emi “Abasi adian̄arede enịm nte mme anditiene Christ Jesus.” (1 Cor. 1:2; 15:18)—w20.12, p. 5-6.

Nso ke mbon emi ẹyetde aran ẹdinam ‘ẹma ẹkpụhọde mmọ ke ediyịp enyịn, ke ini ẹfride akpatre obukpon̄’?—1 Cor. 15:51-53.

Mmọ ẹyetiene Christ ẹda esan̄ ukwak ẹkpeme mme owo nte ekpemerọn̄. (Edi. 2:26, 27)—w20.12, p. 12-13.