Mary ye John a ebe esie ẹdụn̄ ke idụt emi mmọ ẹkemede ndikwọrọ eti mbụk nnọ ediwak mbon emi ẹtode Philippines ẹdi n̄kan̄ oro ndinam utom. Ke ini udọn̄ọ COVID-19, Mary ama ekeme ndikpep ediwak owo Bible ke idụt mmọ ye ke mme idụt en̄wen ke ererimbot. Didie ke enye akanam oro?

Mary ama esibụp mbon emi enye ekpepde Bible ete, “Ndi ọmọdiọn̄ọ owo en̄wen emi akpamade ndikpep Bible?” Edieke mmọ ẹbọrọde ih, enye ọyọdọhọ yak mmọ ẹnam imọ isobo ye mmọ. Ndibụp ekpri mbụme ntem esinam ediwak ufọn. Ntak-a? Sia mbon emi ẹmade se ẹkpepde mmọ ke Bible ẹsiwak ndimen se ẹkpepde mmọ oro n̄keneme ye mbonubon mmọ ye mme ufan mmọ. Nso idi ufọn mbụme emi Mary ekesibụpde do?

Jasmin emi Mary ekekpepde Bible ama anam Mary osobo ye owo inan̄ en̄wen emi ẹkeyomde ndikpep Bible n̄ko. Kiet ke otu mmọ ekekere Kristine. Kristine ama enen̄ede ama se ẹkekpepde enye tutu enye ọdọhọ Mary esikpep imọ n̄kpọ ikaba ke urua. Ini Mary obụpde Kristine m̀mê enye ọdiọn̄ọ owo en̄wen emi akpamade ndikpep Bible, Kristine ama ọbọrọ, “Ih, mmọn̄ nnam osobo ye mme ufan mi.” Ke urua ifan̄ kpọt, Kristine ama anam Mary osobo ye ufan esie inan̄ emi ẹkeyomde ndikpep Bible. Nte ini akade, Kristine ama anam Mary osobo ye mme ufan esie en̄wen. Ndusụk ke otu mme ufan esie oro, emi ẹkesobode ye Mary ẹma ẹnyụn̄ ẹnam mme ufan mmọ en̄wen emi ẹkeyomde ndikpep Bible ẹsobo ye Mary.

Kristine ama oyom mbonubon esie ke Philippines ẹkpep Bible n̄ko. Ntre enye ama eneme n̄kpọ oro ye Andrea adiaha esie. Nsonso oro, Andrea ama ekere, ‘Mme Ntiense ẹdi ndedịbe n̄ka, mmọ inịmke ke Jesus do, mmọ ẹsinyụn̄ ẹkama Akani Testament kpọt.’ Edi ke enye ama ekekpep n̄kpọ ini kiet kpọt, enye ama edikụt ke se enye ekekerede aban̄a Mme Ntiense Jehovah ikenenke. Ke mme ini emi enye ekpepde n̄kpọ enye ama esidọhọ, “Ama akam edi se Bible etịn̄de edi oro, akpanikọ ke edidi!”

Nte ini akade, Andrea ama anam Mary osobo ye ufan esie iba ye owo itie-utom mmọ kiet. Mmọ ẹma ẹnyụn̄ ẹtọn̄ọ ndikpep Bible. Se n̄kpọ en̄wen mi. Ini Mary ekesikpepde n̄kpọ ye Andrea, enye ikọdiọn̄ọke ke Angela emi edide eyeneka ete Andrea ke ekesikpan̄ utọn̄ okop se mmọ ẹkpepde. Angela edi nnan. Ekem usen kiet Angela ama ọdọhọ Andrea yak anam imọ isobo ye Mary onyụn̄ ọdọhọ Mary ke imọ ikpama ndikpep Bible. Angela ama ama se enye ekekpepde. Ke ufan̄ ọfiọn̄ kiet, enye ama omụm ediwak itien̄wed Bible ọdọn̄ ke ibuot onyụn̄ oyom ẹsikpep imọ n̄kpọ ikanan̄ ke urua! Andrea ama esin̄wam enye ada Intanet odụk mbono esop kpukpru ini.

 Ke ini Mary ekedidiọn̄ọde ke Joshua ebe Kristine ama esiwak ndidi ndidiana n̄kpan̄ utọn̄ n̄kop se imọ ye Kristine ikpepde, enye ama obụp enye m̀mê enye akpama nditiene nsịn uyo ke nneme mmimọ. Joshua ama ọdọhọ, “Ndinyụn̄ n̄kpakpan̄ utọn̄ n̄kop se etịn̄de. Edi kûbụp mi mbụme; akpanam ntre, nyọkpọn̄ mbufo.” Ke akpa minit ition emi mmọ ẹkesụk ẹkpepde n̄kpọ, mbụme emi enye okobụpde ama awak akan eke Kristine ndien enye ama oyom ndika iso n̄kpep Bible.

Ekpri mbụme Mary okobụpde do ama anam enye enyene ediwak mbon emi enye ekpepde Bible. Enye ama ayak ediwak mmọ ọnọ Mme Ntiense en̄wen ẹkpep n̄kpọ. Kpukpru mbon emi Mary ekekpepde Bible ẹkedi 28, ndien mmọ ẹkedu ke nsio nsio idụt inan̄.

Jasmin emi edide akpa owo emi Mary ekekpepde Bible, emi inemede ke mbụk emi akana baptism ke April 2021. Kristine akana baptism ke May 2022, ndien enye ama ọnyọn̄ aka Philippines ndikodu ye ubon esie. Owo iba emi Mary ekekpepde Bible, emi Kristine akanamde ẹsobo ye Mary, ẹma ẹna baptism n̄ko. Ke ọfiọn̄ ifan̄ ama ekebe tọn̄ọ Kristine akana baptism, Angela n̄ko ama ana baptism. Idaha-emi Angela edi asiakusụn̄ ofụri ini. Joshua ebe Kristine ye adiaha mmọ Andrea, ye ediwak nditọ ukpepn̄kpọ Bible en̄wen ke ẹkaka iso ndikpep Bible, ke ẹnyụn̄ ẹtetịm ẹkpere Jehovah.

Ke eyo Jesus ye ke eyo mme apostle, ediwak owo ẹma ẹdọhọ mbonubon mmọ ye mme ufan mmọ se mmọ ẹkekpepde ẹban̄a Jesus. (John 1:41, 42a; Utom 10:24, 27, 48; 16:25-33) Ntak emi mûbụpke nditọ ukpepn̄kpọ Bible fo ye mbon en̄wen emi ẹyomde ndikpep Bible ete, “Ndi ọmọdiọn̄ọ owo en̄wen emi akpamade ndikpep Bible?” Edieke obụpde ekpri mbụme emi, afo n̄ko emekeme ndikụt ediwak owo emi ẹyomde ndikpep Bible.