1-2. Nso ke angel ọdọhọ iban emi ẹkade udi Jesus? Nso ke Jesus ke idemesie ọdọhọ mmọ ẹnam?

USIERE Nisan 16 isua 33 eyo Christ edi emi. Iban ifan̄ emi ẹbakde Abasi ẹnyụn̄ ẹfụhọde etieti ẹka udi emi ẹkebụkde Jesus Christ ke Nisan 14. Ini mmọ ẹsịmde do man ẹkeyet ufuọn̄n̄kpọ ye enem-utebe aran ke okpo Jesus, idem akpa mmọ ndikụt ke udi ana ukpọk! Angel kiet etịn̄ ọnọ mmọ ke Jesus ama eset, onyụn̄ ọdọhọ mmọ ete: “Enye ke ebem mbufo iso aka Galilee; mbufo ẹdikụt enye do.”—Matt. 28:1-7; Luke 23:56; 24:10.

² Ke iban oro ẹma ẹkekpọn̄ udi oro, Jesus ke idemesie osobo ye mmọ onyụn̄ ọdọhọ mmọ ete: “Ẹka, ẹketịn̄ ẹnọ nditọete mi, ẹte mmọ ẹka Galilee; ndien mmọ ẹdikụt mi do.” (Matt. 28:10) Anaedi enyene ata akpan etop emi Jesus oyomde nditobo mme mbet esie, sia akpa n̄kpọ emi enye anamde tọn̄ọ enye ekeset edi ndidọhọ mmọ ẹsobo imọ do!

3-4. Nso inam idọhọ ke idịghe mme apostle kpọt ke Jesus ọkọnọ ewụhọ oro ke Matthew 28:19, 20? (Se ndise ikpaedem Enyọn̄-Ukpeme emi.)

³ Kot Matthew 28:16-20. Ini mme mbet Jesus ẹsopde idem nte enye ọkọdọhọde, enye ama ọdọhọ mmọ akpan utom emi mmọ ẹdinamde ke eyo mmọ, kpa ukem utom emi nnyịn inamde idahaemi. Jesus ọkọdọhọ mmọ ete: “Mmọdo ẹka ẹkenam mme owo ke kpukpru idụt ẹdi mbet mi, . . . ẹkpep mmọ ẹnam kpukpru n̄kpọ eke n̄ketemede mbufo.”

⁴ Jesus oyom kpukpru mme mbet esie ẹkwọrọ ikọ. Idịghe mme apostle esie 11 kpọt emi ẹkesọn̄ọde ẹda ye enye ke enye  ọkọdọn̄ utom emi. Inam didie idiọn̄ọ? Kere ise, ndi mme apostle kpọt ẹkedu ke obot oro ke Galilee ini enye okowụkde ete ẹkenam mme owo ẹdi mbet imọ? Kûfre ke angel ọkọdọhọ iban oro ete: “Mbufo ẹdikụt enye [ke Galilee].” Ntre anaedi iban emi ẹkesọn̄ọde ẹda ye enye ẹma ẹtiene ẹdu ini enye okowụkde ewụhọ oro. Edi ikụreke ke oro. Apostle Paul ama anam idiọn̄ọ ke Jesus ama “owụt nditọete emi ẹwakde ẹbe owo ikie ition idem ini kiet.” (1 Cor. 15:6) M̀mọ̀n̄ ke enye okowụt mmọ idem?

5. Nso inam inịm ke 1 Corinth 15:6 etịn̄ aban̄a mbono a-Galilee emi odude ke Matthew ibuot 28?

⁵ Imenyene nti ntak emi ẹnamde inịm ke mbono a-Galilee emi odude ke Matthew ibuot 28 ke Paul eketịn̄ aban̄a ke 1 Corinth 15:6. Nti ntak ewe idi oro? Akpa, ediwak mbet Jesus ẹketo Galilee. Ntre obot ke Galilee ekpedi mfọnn̄kan itie utọ uwak owo oro ndisop idem, idịghe ke ufọk owo ke Jerusalem. Ọyọhọ iba, Jesus ama ososobo mme apostle esie 11 ke ufọk owo ke Jerusalem ke ẹma ẹkenam enye eset. Ekpedi Jesus okoyom ndidọhọ yak mme apostle kpọt ẹkwọrọ ikọ ẹnyụn̄ ẹnam mme owo ẹdi mbet imọ, enye ekpeketịn̄ ye mmọ do ke Jerusalem utu ke ndidọhọ mmọ ye iban ye mbon eken ẹdisobo ye imọ ke Galilee.—Luke 24:33, 36.

6. Didie ke Matthew 28:20 owụt ke ewụhọ emi Jesus ọkọdọhọde ẹnam mme owo ẹdi mbet imọ ebehe nnyịn? Didie ke ẹnam ewụhọ emi idahaemi?

⁶ Ọyọhọ akpan ntak ita edi ke ewụhọ emi Jesus ọkọnọde ete ẹnam mme owo ẹdi mbet imọ ikebeheke mme Christian eyo mme apostle kpọt. Isan̄a didie idiọn̄ọ? Akpatre ikọ emi Jesus eketịn̄de ini enye ọkọnọde mme mbet esie ewụhọ oro ekedi: “Ami ndodu ye mbufo kpukpru usen tutu esịm akpatre ini editịm n̄kpọ emi.” (Matt. 28:20) Se Jesus eketịn̄de emi osu sia idahaemi ediwak owo ke ẹnam mme owo ẹdi mbet esie. Kpukpru isua, n̄kpọ nte owo 300,000 ẹsikabade ẹdi mme mbet Jesus, ẹna baptism, ẹnyụn̄ ẹdi Mme Ntiense Jehovah. Ata utịben̄kpọ edi emi!

7. Nso ke iyom ndineme idahaemi? Ntak-a?

⁷ Ediwak mbon emi isikpepde Bible ẹsitọn̄ọ ndinam se Bible ekpepde ẹnyụn̄ ẹna baptism. Edi etie nte ndịk isiyakke ndusụk ẹkabade ẹdi mbet Christ. Se mmọ ẹkpepde esinem mmọ, edi mmọ inamke se Bible ekpepde inyụn̄ inaha baptism. Ekpedi ke ekpep owo Bible, imenịm ke omoyom ndin̄wam enye anam se enye ekpepde onyụn̄ edidi mbet Christ. Imọn̄ ineme ke ibuotikọ emi nte ikemede ndin̄wam owo emi isikpepde Bible ama Jehovah onyụn̄ anam se enye ekpepde. Ntak emi oyomde ineme n̄kpọ emi? Sia enyene ini emi ekemede ndiyom ibiere m̀mê edi se itrede ndikpep n̄kpọ ye owo oro.

8. Ntak emi ekemede ndisọn̄ nnyịn ndin̄wam mbon emi ikpepde Bible ẹma Jehovah?

⁸ Jehovah oyom mme owo ẹkpono imọ ke ntak emi mmọ ẹmade imọ. Ntre edi utom nnyịn ndinam an̄wan̄a mbon emi ikpepde Bible ke Jehovah enen̄ede ekere aban̄a mmọ kiet kiet onyụn̄ ama mmọ etieti. Iyom ndin̄wam mmọ ẹda ke Jehovah edi “ete nditọakpa ye ebiereikpe mme ebeakpa.” (Ps. 68:5) Ke ini mbon emi afo esikpepde Bible ẹdide ẹdifiọk ke Jehovah ama mmimọ, mmọ n̄ko ẹkeme nditọn̄ọ ndima enye. Ekeme ndisọn̄ ndusụk mbon emi ikpepde Bible ndida Jehovah nte edima Ete sia ete mmọ ikanamke n̄kpọ emi owụtde ke imama mmọ. (2 Tim. 3:1, 3) Nte afo osụk ekpepde mmọ n̄kpọ, nam mmọ ẹkụt nti edu Jehovah. N̄wam mmọ ẹfiọk ke edima Abasi nnyịn oyom mmọ ẹdu uwem  ke nsinsi, ke enye onyụn̄ eben̄e idem ndin̄wam mmọ ẹkeme ndidu uwem ke nsinsi. Nso efen ke ikeme ndinam?

9-10. Mme n̄wed ewe ke ikpesida ikpep owo Bible? Ntak-a?

⁹ Da n̄wed “Nso ke Bible Ekpep Nnyịn?” ye “Du Uwem Emi Edinamde Abasi Ama Fi” kpep mmọ n̄kpọ. Akpan ntak emi ẹwetde mme n̄wed emi edi man ẹn̄wam nnyịn inam mbon emi ikpepde Bible ẹma Jehovah. Ke uwụtn̄kpọ, ẹbọrọ mme mbụme emi ke akpa ibuot n̄wed Bible Ekpep Nnyịn: Ndi Abasi ama nnyịn?, Esitie Abasi didie ke idem ndikụt nte mme owo ẹbọde ufen?, ye Ndi emekeme ndidi ufan Jehovah? N̄wed Abasi Ama Fi ayan̄wam owo emi ikpepde Bible okụt nte enye ndinam item Bible edifọnde ye enye onyụn̄ an̄wam enye etetịm ekpere Jehovah. Ekpededi emesikpep mbon en̄wen mme n̄wed emi, sụk tịm idem ọfọn ini ekededi emi oyomde ndida mmọ n̄kpep owo n̄kpọ, man anam ukpepn̄kpọ oro ekekem ye owo kiet kiet emi ekpepde n̄kpọ.

 ¹⁰ Nso ke akpanam edieke enyenede ibuotikọ kiet emi owo oro afo esikpepde Bible oyomde ndifiọk n̄kpọ mban̄a, edi n̄wed emi ẹnemede ibuotikọ oro isịneke ke otu Mme Akpan N̄kpọ Isidade Ikpep Owo Bible? Emekeme ndidọhọ enye okokot n̄wed oro ke idemesie, man afo ekeme ndika iso n̄kpep enye n̄wed Bible Ekpep Nnyịn m̀mê n̄wed Abasi Ama Fi.

11. Ini ewe ke ikpọtọn̄ọ ndisibọn̄ akam ke ntọn̄ọ ye utịt ukpepn̄kpọ Bible? Ikpanam didie in̄wam owo emi ikpepde Bible okụt ntak emi ndibọn̄ akam edide akpan n̄kpọ?

¹¹ Sibọn̄ akam tọn̄ọ ukpepn̄kpọ. Mfọnn̄kan n̄kpọ edi nditọn̄ọ ndisibọn̄ akam ke ntọn̄ọ ye utịt ukpepn̄kpọ ufan̄ urua ifan̄ ke ima ikọtọn̄ọ ndikpep owo Bible. Ana in̄wam owo emi isikpepde Bible ọfiọk ke edisana spirit Jehovah kpọt edinam Ikọ Abasi an̄wan̄a nnyịn. Didie ke ndusụk nditọete ẹsinam owo emi mmọ ẹkpepde Bible okụt ntak emi ọfọnde ẹbọn̄ akam? Mmọ ẹsikot James 1:5 emi ọdọhọde ete: “Edieke owo mbufo ekededi ananade ọniọn̄, yak enye aka iso eben̄e Abasi.” Ekem mmọ ẹyebụp owo oro ẹte: “Idinam didie iben̄e Abasi ọniọn̄?” Owo oro ekeme ndinyịme ke edidi ndibọn̄ akam nnọ Abasi.

12. Didie ke akpada Psalm 139:2-4 an̄wam owo emi esikpepde Bible ọbọn̄ akam ke ofụri esịt ọnọ Jehovah?

¹² Kpep owo emi afo esikpepde Bible nte enye ọkpọbọn̄de akam. Nam enye ọdiọn̄ọ ke Jehovah oyom ndikop akam emi enye ọbọn̄de ke ofụri esịt. Nam an̄wan̄a enye ke imekeme ndidọhọ Jehovah nte etiede nnyịn ke idem ke ini ibọn̄de akam ke idem nnyịn, inyụn̄ idọhọ enye n̄kpọ emi nnyịn mîkpamaha ndidọhọ owo ekededi. Ti ke Jehovah ọfọfiọk se ikerede ke ọwọn̄esịt nnyịn. (Kot Psalm 139:2-4.) Imonyụn̄ ikeme ndidọhọ enye ọdọhọ Abasi an̄wam enye etre ndikere ndiọi n̄kpọ onyụn̄ etre ndinam ndiọi n̄kpọ. Yak idọhọ ke owo emi isikpepde Bible ama usọrọ emi mîkpanaha mme Christian ẹnam. Enye ọfiọk ke usọrọ oro ifọnke, edi ndusụk se ẹsinamde ke usọrọ oro osụk enenem enye. Dọhọ enye etịn̄ nnennen nnennen nte etiede enye ke idem ọnọ Jehovah onyụn̄ eben̄e enye an̄wam imọ ima se Enye amade kpọt.—Ps. 97:10.

13. (a) Ntak emi ikpọsọpde-sọp ikot owo emi isikpepde Bible mbono esop? (b) Nso ke ikpanam mbak okûnen̄ede utie owo emi isikpepde Bible esen esen ke Ufọkmbono Obio Ubọn̄?

¹³ Sọsọp kot enye mbono esop. Se owo emi afo esikpepde Bible okopde onyụn̄ okụtde ke mbono esop ekeme ndinam enye ama Jehovah onyụn̄ anam se enye ekpepde. Bre vidio Nso ke Ẹsinam ke Ufọkmbono Obio Ubọn̄? nọ enye nyụn̄ dọhọ enye etiene fi edi mbono esop. Edieke ekemede, dọhọ enye ke imekeme ndimen enye n̄ka Ufọkmbono Obio Ubọn̄. Enen̄ede ọfọn afo esisan̄a ye nsio nsio nditọete ekekpep enye n̄kpọ. Oro ayanam enye emehe ye mbon en̄wen ke esop, onyụn̄ ekeme ndinam okûnen̄ede utie enye esen esen ini enye odụkde mbono esop nnyịn.

14. Nso ikeme ndin̄wam owo emi isikpepde Bible anam se enye ekpepde?

¹⁴ Iyom ndin̄wam owo emi isikpepde Bible anam se enye esikpepde. (Eph. 4:13) Ke ini owo enyịmede ikpep enye Bible, ata akpan n̄kpọ emi ebehede enye ekeme ndidi nte ukpepn̄kpọ oro edin̄wamde enye. Edi nte enye amade Jehovah aka, enye ekeme nditọn̄ọ ndikere nte imọ ikpan̄wamde mbon en̄wen, esịnede mbon emi ẹma ẹkedodu ke esop. (Matt. 22:37-39) Kûmen̄e nditịn̄ mban̄a ifet oro owo  kiet kiet enyenede nditiene nda okụk esie n̄n̄wam ẹnam n̄kpọ Obio Ubọn̄ Abasi ini emi okụtde ke odot etịn̄.

15. Didie ke ikeme ndin̄wam owo emi isikpepde Bible anam nnennen n̄kpọ ke ini mfịna etịbede?

¹⁵ Kpep enye se enye akpanamde ke ini mfịna etịbede. Nso ke akpanam edieke asuanetop oro mînaha baptism, emi afo esikpepde n̄kpọ, ọdọhọde fi ke eyenete anam se iyatde imọ? Utu ke ndidọhọ ke owo enye emi edue, enye oko iduehe, kam nam enye ọdiọn̄ọ se Bible ọdọhọde enye anam. Enye ekeme ndifen eyenete oro, mîdịghe edieke enye mîkemeke ndisio n̄kpọ oro ke esịt, enye ekeme ndikeneme ye eyenete oro ke usụn̄ emi owụtde ke enye ama eyenete oro, inyụn̄ inamke ikọ ikọ man afiak odu ke emem ye eyenete oro. (Men Matthew 18:15 domo.) N̄wam enye ọdiọn̄ọ se enye ediketịn̄. Wụt enye nte enye ekemede ndida JW Library^®, N̄wed Ndụn̄ọde Mme Ntiense Jehovah, ye jw.org^® n̄kpep se enye akpanamde aban̄a mfịna oro. Edieke enye ekpepde nte enye ekpesinamde n̄kpọ ke ini enye enyenede mfịna ye mme owo ini enye mînaha baptism mi, emi ekeme ndinam enye enen̄ede odu ke emem ye nditọete enye ama ana baptism.

16. Ntak emi ọfọnde idọhọ mbon en̄wen ẹsan̄a ye nnyịn ini ikpepde owo n̄kpọ?

¹⁶ Dọhọ nditọete en̄wen ẹsan̄a ye afo ekekpep enye n̄kpọ; dọhọ esenyịn circuit n̄ko ini enye edide edise esop mbufo. Ntak-a? Ima itetịn̄ ndusụk ntak; efen edi ke nditọete en̄wen ẹkeme ndin̄wam enye ke usụn̄ emi afo mûkemeke. Ke uwụtn̄kpọ, yak idọhọ ke enye etịme nditre sika ediwak ini, edi ikemeke. Dọhọ eyenete emi ekesin̄wọn̄de sika akpa, edi emi ama eketre ke ama eketịme ediwak ini, asan̄a ye afo ekekpep enye n̄kpọ. Eyenete oro ekeme ndidọhọ enye ata akpan n̄kpọ emi edin̄wamde enye. Ekpetie fi ntre ntre ndinịm ukpepn̄kpọ oro ke ini eyenete emi enen̄erede enyene mbufiọk odude, dọhọ eyenete oro ekpep usen oro. Owo emi afo esikpepde Bible ekeme ndidia ufọn ini ekededi emi okotde eyenete en̄wen etiene fi ekekpep enye n̄kpọ. Ti ke iyom owo emi isikpepde Bible ananam se enye ekpepde.

17-18. Nso ke afo ekpekere aban̄a ke ini oyomde ndibiere m̀mê edi se etrede ndikpep owo n̄kpọ?

¹⁷ Edieke owo emi afo esikpepde Bible mîkaha iso ndinam se enye ekpepde, eyenyene ini emi ediyomde obụp idemfo, ‘Ndi akpana ntre ndikpep enye n̄kpọ?’ Mbemiso ebierede se edinamde, fiak se ukeme esie kan̄a. Ndusụk owo ẹsisọp ẹnam se mmọ ẹkpepde ẹkan ndusụk. Bụp idemfo: ‘Ndi enye ke anam se enye ekpepde etiene ukeme esie?’ ‘Ndi enye ọtọn̄ọ ndinam se enye ekpepde?’ (Matt. 28:20) Ekeme ndida anyan ini mbemiso owo emi isikpepde Bible edidi mbet Christ; kpa ye oro, ana enye aka iso okpụhọde uwem esie sụn̄sụn̄.

¹⁸ Edi nso ke ikpanam ekpedi owo emi isikpepde Bible inamke n̄kpọ ndomokiet ndiwụt  ke imada ukpepn̄kpọ oro ke akpan n̄kpọ? Yak idọhọ ke emekpep n̄wed Bible Ekpep Nnyịn ye enye okụre, akam ekeme ndidi omodụk n̄wed Abasi Ama Fi edi enye isụk idụkke mbono esop ndomo usen kiet, ikam idụkke Editi! Enye esinyụn̄ awak ndisio ukpepn̄kpọ esie nnịm ini en̄wen ke ini eti ntak mîdụhe. Owo emi afo esikpepde Bible ekpetie ntre, ekeme ndiyom okot enye eneme nneme ata in̄wan̄-in̄wan̄. *

19. Nso ke ekeme ndibụp owo emi etiede nte ukpepn̄kpọ Bible idịghe akpan n̄kpọ inọ enye? Didie ke se enye ọbọrọde ekeme ndin̄wam fi?

¹⁹ Emekeme ndida mbụme emi ntọn̄ọ nneme ye enye, ‘Afo ekere ke nso idinen̄ede inam ọsọn̄ fi ndidi Ntiense Jehovah?’ Enye ekeme ndidọhọ, ‘Mmama ndikpep Bible, edi ndidịghe Ntiense Jehovah tutu amama!’ Ekpedi se isịnede enye ke esịt edi oro ke enye ama ekekpep Bible esịm udomo ini emi, ndi ufọn osụk odu ndika iso n̄kpep enye n̄kpọ? Edi, mbụme oro onyụn̄ ekeme ndinam enye ọdọhọ fi se ikpande enye, emi enye mîtịn̄ke inọ fi akpa. Ke uwụtn̄kpọ, ekeme ndidi enye ekere ke imọ idikemeke ndisan̄a ke ufọk ke ufọk n̄kwọrọ ikọ tutu amama. Idahaemi afo ama ọkọfiọk se enye ekerede mi, eyekeme ndinen̄ede n̄n̄wam enye.

20. Didie ke Utom 13:48 edin̄wam nnyịn ibiere m̀mê edi se ikade iso ikpep owo n̄kpọ?

²⁰ Inemke nnyịn ndidọhọ ke ndusụk mbon emi isikpepde Bible ẹbiet nditọ Israel eyo Ezekiel. Jehovah ọkọdọhọ Ezekiel ntem aban̄a mmọ: “Sese! afo etie mmọ nte ikwọ ima, nte owo eke enyenede edinem uyo, onyụn̄ etịmde ebre ndido urụk. Ndien mmọ ẹyekop mme ikọ fo, edi baba owo kiet idinamke mmọ.” (Ezek. 33:32) Ekeme ndisọn̄ nnyịn ndidọhọ owo ke nnyịn idikpepke enye Bible aba. Edi “ini emi osụhọde iniọn̄ke aba.” (1 Cor. 7:29) Ntre utu ke ndika iso mbiat ini n̄kpep n̄kpọ ye owo emi mîmaha ndinam se enye ekpepde, ikpakam ika ikoyom owo emi owụtde ke ‘imenyene eti esịt oro edinamde imọ inyene nsinsi uwem.’—Kot Utom 13:48.

21. Nso idi ibuotikọ isua 2020? Nso ke ibuotikọ oro edin̄wam nnyịn inam?

²¹ Ke ofụri isua 2020, ibuotikọ isua nnyịn ayan̄wam nnyịn ikere nte ikpan̄wamde mme owo ẹdi mbet Christ ikan nte inamde idahaemi. Ibuotikọ oro esịne ndusụk se Jesus eketịn̄de ini enye ekenyenede akpan mbono oro ke obot kiet ke Galilee ete: “Mmọdo ẹka ẹkenam mme owo . . . ẹdi mbet mi, ẹnịm mmọ baptism.”—Matt. 28:19.