MBỤK mbon emi ‘n̄kpọ ekesitụkde nte nnyịn’ ẹyọyọhọ Bible. (Jas. 5:17) Ke uwụtn̄kpọ, se Paul eketịn̄de ke Rome 7:21-24 ekeme ndisọp n̄n̄wan̄a nnyịn. Enye ọkọdọhọ ete: “Ke ini nyomde ndinam se inende, se idiọkde odu ye ami. . . . Owo nditaha nte ami!” Ndidiọn̄ọ ke eketie Paul ntre ke idem esidọn̄ nnyịn esịt ke ini in̄wanade ndikan idiọkn̄kpọ emi esịnede nnyịn ke idem.

Enyene mme n̄kpọ efen emi Paul eketịn̄de emi ẹwụtde nte eketiede enye ke idem. Enye ọkọdọhọ ke Galatia 2:20 ete ke imọ imenen̄ede inịm ke Jesus ‘ama ama imọ onyụn̄ ayak idemesie ọnọ kaban̄a imọ’! Paul akada ke Jesus akakpa ọnọ imọ. Ndi afo esinyụn̄ ada ntre? Ekeme ndidi usûdaha ntre ndusụk ini.

Edieke osụk etiede nnyịn ke idem nte nnyịn iwọrọke n̄kpọ ke ntak idiọkn̄kpọ emi ikanamde ke ini edem, ekeme ndisọn̄ ndinyịme ke Jehovah ama nnyịn onyụn̄ efen ọnọ nnyịn, owo itịn̄ke-tịn̄ iban̄a ndida ufak nte ọkpọkpọ enọ emi Jehovah ọnọde nnyịn. Ndi Jesus enen̄ede oyom ida ufak nte ọkpọkpọ enọ? Ekpedi ntre, nso idin̄wam nnyịn ida enye ntre? Ẹyak ineme iban̄a mbụme iba emi.

Jesus oyom ida ufak emi enye ekekpede nte ọkpọkpọ enọ. Isan̄a didie idiọn̄ọ? Kere ban̄a mbụk emi odude ke Luke 23:​39-43. Ete oro ọkọkọn̄ọde ke eto ndutụhọ ekpere Jesus ama enyịme ke imọ imedue sia ima inam idiọkn̄kpọ. Anaedi se enye akanamde ama enen̄ede ọdiọk sia ata akpatre idiọk abiatibet ke ẹkesikọn̄ ke eto ndutụhọ ẹwot. Enyịn ama anan enye, enye ama onyụn̄ ekpe Jesus ubọk ete: “Ti mi ke ini afo odụkde obio ubọn̄ fo.”

Nso ke Jesus akanam aban̄a oro? Da nte ke omokụt nte Jesus an̄wanade ndiwọn̄ọde iso nse anamidiọk oro. Kpa ye ọkpọsọn̄ ubiak, enye an̄wana atuak inua imam onyụn̄ ọdọn̄ ete oro esịt, ete: “Ke akpanikọ ke ndọhọ fi mfịn emi, Afo oyodu ye ami ke Paradise.” Ikpakakakke Jesus ndidọhọ enye ke ‘Eyen owo ekedi ndinọ ukpọn̄ esie nte ufak ke ibuot ediwak owo.’ (Matt. 20:28) Edi, ndi omokụt nte Jesus akanamde enye okụt ke n̄kpa imọ eyenyene ufọn ọnọ enye? Jesus eketịn̄ ikọ ye enye nte ufan onyụn̄ ada mme ikọ emi “afo” ye “ami” etịn̄ ikọ ye enye. Jesus ndikọdọhọ enye ke enye oyodu uwem ke Paradise ke isọn̄ ama anam enye okụt nte n̄kpa Jesus edinyenede ufọn inọ enye.

Imokụt ke Jesus okoyom ete oro okụt ke n̄kpa imọ eyenyene ufọn ọnọ enye n̄ko. Edieke Jesus okoyomde owo emi mîkenyeneke ifet ndinam n̄kpọ Abasi ọfiọk ke n̄kpa imọ eyenyene ufọn ọnọ enye, imekere ke enye enen̄ede oyom Christian emi ama akana baptism onyụn̄ anamde n̄kpọ Abasi okụt ke n̄kpa imọ enyene ufọn ọnọ enye. Edi nso ikeme ndin̄wam nnyịn inen̄ede inịm ke ufak emi Jesus ekekpede enyene ufọn ọnọ nnyịn kpa ye idiọkn̄kpọ emi ikanamde ke ini edem?

Utom ukwọrọikọ emi Jesus ọkọnọde Paul ama anam enye okụt ke Jesus akakpa ọnọ imọ. Didie ke  akanam? Paul ọkọdọhọ ete: “Mmọkọm Christ Jesus Ọbọn̄ nnyịn, emi ọkọnọde mi odudu, koro enye akabatde mi ke owo akpanikọ ke ndinọ mi utom nnam, okposụkedi n̄kedide osụn̄i isụn̄i ye andikọbọ ye owo emiom ke mbemiso.” (1 Tim. 1:12-14) Jesus ndikọnọ enye utom emi ama anam enye enịm ke Jesus atua imọ mbọm, ama imọ, onyụn̄ enịm ke imọ imekeme ndinam utom emi enye ọnọde imọ. Jesus ọnọ nnyịn utom n̄ko ete ikwọrọ eti mbụk inọ mme owo. (Matt. 28:19, 20) Ndi ukwọrọikọ ayanam ikụt ke Jesus akakpa ọnọ nnyịn n̄ko?

Albert emi afiakde ọnyọn̄ ebịne Jehovah ndondo emi ke ẹma ẹkesio enye ẹfep ke esop ke n̄kpọ nte isua 34 ọdọhọ ete: “Mmesiwak nditi ndiọi n̄kpọ emi n̄kesinamde. Edi ke ini n̄kade ukwọrọikọ, nsida ke Jesus ọnọ mi utom, ukem nte apostle Paul akadade. Ukwọrọikọ esisọn̄ọ mi idem onyụn̄ anam n̄kụt ke mmedi n̄kpọ, ke uwem mi enyene ibuot, ke mmonyụn̄ nnyene idotenyịn mban̄a ini iso.”—Ps. 51:3.

Allan emi ekesidude uwem afai esinyụn̄ abiatde ibet mbemiso enye edikpep akpanikọ ọdọhọ ete: “Nsụk nteti kpukpru ibak emi n̄kesinamde mme owo. Ndusụk ini, emi esinam mi mfụhọ. Edi mmọkọm Jehovah nte enye ayakde anamidiọk nte ami ọkwọrọ eti mbụk ọnọ mbon efen. Mma n̄kụt nte eti mbụk anamde mme owo ẹkpụhọde, oro esinam nti nte Jehovah ọfọnde onyụn̄ amade mme owo. N̄kere ke enye ada mi an̄wam mbon emi ẹdude utọ uwem emi n̄kodude akpa.”

Nnyịn ndikwọrọ ikọ an̄wam nnyịn ikere nti n̄kpọ inyụn̄ ida odudu nnyịn inam nti n̄kpọ. Enye anam inịm ke Jesus atua nnyịn mbọm, ama nnyịn, onyụn̄ enịm ke imekeme ndinam utom emi enye ọnọde nnyịn.

Adan̄a nte idiọk ererimbot Satan emi osụk akade iso odu, esịt ekeme ndika iso mfịna nnyịn ke ndiọi n̄kpọ emi ikanamde ke ini edem. Nso idin̄wam nnyịn ikan utọ n̄kpọ emi?

Esịt esiwak ndifịna Jean ke ntak emi enye okodude uwem esịt iba ini enye ekedide uyen. Enye ọdọhọ ete: “Enem mi etieti ndifiọk ke ‘Abasi okpon akan esịt nnyịn.’” (1 John 3:19, 20) Ukem nte Jean, nnyịn n̄ko imekeme ndibọ ndọn̄esịt ima idiọn̄ọ ke an̄wan̄a Jehovah ye Jesus nte etiede nnyịn ke idem akan nte an̄wan̄ade nnyịn. Ti ke mmọ ẹkenam ufak odu man ẹn̄wam mme anamidiọk emi ẹkabarede esịt, idịghe mbon emi ẹfọnde ẹma.—1 Tim. 1:15.

Edieke ibọn̄de akam inyụn̄ itiede ikere nte Jesus akanamde n̄kpọ ye mme owo kpa ye emi mmọ mîkọfọnke ima, inyụn̄ inam se ikekeme man inam utom ukwọrọikọ emi enye ọkọnọde nnyịn, iyenen̄ede inịm ke ufak enyene ufọn ọnọ nnyịn. Ama anam emi, afo eyekeme nditịn̄ nte Paul eketịn̄de ete: ‘Jesus ama ama mi onyụn̄ ayak idemesie ọnọ kaban̄a mi.’