Enyene n̄kpọ emi owụtde ke Jesus akakabade edi Akwa Oku ini enye akanade baptism ke isua 29 eyo esie. Nso n̄kpọ idi oro? Ini Jesus akanade baptism, enye ama owụt ke imọ imeben̄e idem ndida ofụri uwem imọ nnam ‘uduak Abasi.’ Ndinam uduak Abasi eketie nte enye ndiwa idem esie ke itieuwa. (Gal. 1:4; Heb. 10:5-10) Sia itieuwa edide ata akpan n̄kpọ kiet emi anade odu ke temple, anaedi ini Jesus akanade baptism ke akwa ndamban̄a temple ọkọtọn̄ọ ndidu n̄ko. Temple emi ada aban̄a kpukpru n̄kpọ emi ẹnamde ikeme ndituak ibuot nnọ Jehovah ke nnennen usụn̄ ke ntak emi Jesus akakpade afak nnyịn.—Matt. 3:16, 17; Heb. 5:4-6.

Akana akwa oku emi edinamde utom ke akwa ndamban̄a temple odu. Ntre Jehovah ama eyet Jesus aran “ke edisana spirit ye odudu” man enye edi Akwa Oku ke ndamban̄a temple oro. (Utom 10:37, 38; Mark 1:9-11) Edi nso ikeme ndinam inịm ke ẹma ẹyet Jesus aran man enye edi Akwa Oku mbemiso enye akpade onyụn̄ esetde? Uwụtn̄kpọ Aaron ye mbon eken emi ẹkedide akwa oku ke Aaron ama akakpa an̄wam nnyịn ibọrọ mbụme emi.

Ibet emi Jehovah ọkọnọde nditọ Israel ọkọdọhọ ke akwa oku kpọt ekekeme ndidụk Ata Edisana ke tent utuakibuot, enye kpọt okonyụn̄ ekeme ndidụk Ata Edisana ke temple. Ẹkeda ikpehe ẹbahade Edisana ye Ata Edisana. Akwa Oku ekesibe ikpehe oro odụk Ata Edisana ke Usen Usio-Isop kpọt. (Heb. 9:1-3, 6, 7) Ukem nte akanade ẹyet Aaron ye mbon eken emi ẹkedidide akwa oku aran mbemiso mmọ ‘ẹbe ke ata ata ikpehe’ ke tent utuakibuot ẹdụk Ata Edisana, anaedi ẹma ẹyet Jesus aran n̄ko nte Akwa Oku ke akwa ndamban̄a temple Jehovah mbemiso enye akpade, ekem asan̄a ‘ebe ke ikpehe, oro edi, obụkidem esie’ odụk heaven. (Heb. 10:20) Emi akanam apostle Paul ọdọhọ ke Jesus edi “nte akwa oku,” ekem asan̄a ebe ke “tent oro okponde onyụn̄ ọfọnde ama, emi owo mîdaha ubọk inam” odụk “heaven.”—Heb. 9:11, 24.

Ini emi obufa ediomi ọkọtọn̄ọde edi ukem ye ini emi ẹkesọn̄ọde enye. Ntak edide ntre? Ini Jesus ọkọdọkde aka heaven, enye ama ọkọnọ Abasi ekọmurua mfọnmma uwem esie emi enye akawade man ẹda ẹfak nnyịn. Ini oro ke enye akanam akpa n̄kpọ iba ke otu n̄kpọ ita emi ẹdade ẹsọn̄ọ obufa ediomi. N̄kpọ ita oro ẹkenyụn̄ ẹwụt ke ẹtọn̄ọ obufa ediomi. Mmọ ẹdi nso?

Akpa, Jesus ama okowụt Jehovah idem; ọyọhọ iba, Jesus ama ọnọ Jehovah ekọmurua uwem esie emi enye akawade; ndien ọyọhọ ita, Jehovah ama enyịme ekọmurua iyịp Jesus emi ẹkeduọkde. Obufa ediomi ọkọtọn̄ọ ndinyene ufọn ke mme n̄kpọ emi ẹma ẹketịbe.

Bible itịn̄ke ata nnennen ini emi Jehovah ekenyịmede ekọmurua uwa Jesus. Ntre nnyịn ikemeke ndisiak ata nnennen ini emi ẹketọn̄ọde obufa ediomi ye ini emi ẹkesọn̄ọde enye. Edi imọdiọn̄ọ ke Jesus ọkọdọk aka heaven usen duop mbemiso Pentecost. (Utom 1:3) Etie nte ufan̄ ini oro ke Jesus ọkọnọ Jehovah ekọmurua uwem esie emi enye akawade, Jehovah onyụn̄ enyịme. (Heb. 9:12) Se iketịbede ke Pentecost ọsọn̄ọ emi. (Utom 2:1-4, 32, 33) Ini oro ke ẹkekụt ke ẹma ẹsọn̄ọ obufa ediomi, ke Jehovah ke onyụn̄ ada enye anam uduak esie.

Se inemede emi owụt ke ẹketọn̄ọ ẹnyụn̄ ẹsọn̄ọ obufa ediomi ke Jehovah ama ekenyịme ekọmurua iyịp Jesus emi ẹkeduọkde. Ini oro ndien ke obufa ediomi ọkọtọn̄ọ ndinyene ufọn. Jesus emi edide Akwa Oku edi Esịne-Ufọt obufa ediomi oro.—Heb. 7:25; 8:1-3, 6; 9:13-15.