Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Nso idi n̄kpọ inan̄ emi ikpanamde man ikwọ ikwọ ọfọn?

Iyekeme ndikwọ ikwọ ọfọn edieke idade ọfọn, imenerede n̄wedikwọ ke enyọn̄, inen̄erede ikot ibifịk, inyụn̄ itatde inua ikan nte isitatde ke ini itịn̄de ikọ.​—w17.11, p. 5.

Ntak emi amade mme itie emi obio ubọhọ ke Israel ẹkedude ye nte mme usụn̄ obio ubọhọ ẹketiede?

Obio ubọhọ itiokiet okodu ke Israel. Ama emem utom ndisọsọp mfehe n̄kesịm mme obio oro sia ẹma ẹsidiọn̄ mme usụn̄ obio ubọhọ oro.​—w17.11, p. 14.

Ntak emi Abasi ndikọnọ Jesus edikpa afak nnyịn ọfọnde akan enọ en̄wen ekededi?

Emi ayanam ikeme ndidu uwem ke nsinsi onyụn̄ anam iwọrọ ke ufụn idiọkn̄kpọ ye n̄kpa. Abasi ndinen̄ede mma nnyịn akanam enye ọnọ Jesus edikpa afak nnyịn ke adan̄a emi isụk idide mme anamidiọk.​—wp17.6, p. 6-7.

Didie ke Psalm 118 okosu Jesus ke idem?

Ẹma ẹsịn Messiah ẹnyụn̄ ẹwot enye. Akana ẹnam enye eset man enye edidi “etubom inụk.”​—w17.12, p. 9-10.

Ndi akana kpukpru mme ete ete Messiah edi akpan?

Ndusụk mbon oro ẹketienede ẹdi ete ete Messiah ẹkedi akpan, ndusụk ikedịghe. Kpa ye oro David mîkedịghe akpan Jesse, enye ama etiene edi ete ete Messiah.​—w17.12, p. 14-15.

Nso item ke Jehovah ọkọnọ nditọ Israel mbak mmọ idimen ndiọi udọn̄ọ?

Ibet Moses ọkọdọhọ nditọ Israel ẹkûdu ukpere mbon oro ẹdọn̄ọde ndiọi udọn̄ọ. Akana mmọ ẹyet ọfọn̄ mmọ ẹnyụn̄ ẹyere mmọn̄ ke ẹma ẹketụk okpo owo. Ibet oro ọkọdọhọ ẹsitịbi isọn̄ ke ebiet emi mîkpereke ufọk ẹfụk ndek. Ama onyụn̄ ọdọhọ ẹsinịm eyen erenowo mbobi ke ọyọhọ usen itiaita sia iyịp nsekeyen esitọn̄ọ ndiboho ke eyen ama ekebe urua kiet.​—wp18.1, p. 7.

Ntak emi mîdiọkke asan̄autom Abasi ndima idemesie?

Ana ima mbọhọidụn̄ nnyịn nte imade idem nnyịn. (Mark 12:31) Ana mme ebe ẹnyụn̄ ‘ẹma iban mmọ nte idemmọ.’ (Eph. 5:28) Edi ana ikpeme mbak nnyịn idima idem nnyịn ikaha.​—w18.01, p. 23.

Nso ke ikpanam man ika iso inyene spirit Abasi?

Ana isisịn idem ikpep Ikọ Abasi, itie ikere se ikpepde, inyụn̄ inanam se ikpepde. Ana isiyak spirit Abasi ada nnyịn usụn̄ ke kpukpru se inamde, isinyụn̄ inyịme mbon en̄wen ẹn̄wam nnyịn.​—w18.02, p. 26.

Ntak emi nnyịn mîkpakaha ibịne mme asiak ntantaọfiọn̄ ye mme etịn̄ ini iso?

Nsio nsio ntak do, edi ata akpan ntak edi ke Bible akpan utọ n̄kpọ oro.​—wp18.2, p. 4-5.

Nso ke ikpanam ini ẹkotde nnyịn ufọk?

Edieke edide ima inyịme ndika, ifọnke ifiak edieke akpan ntak mîdụhe. (Ps. 15:⁠4) Anaedi owo oro okokotde nnyịn ufọk ama enen̄ede eben̄e idem ebet nnyịn.​—w18.03, p. 18.

Didie ke mbiowo ye mme asan̄autom unamutom ẹkeme ndikpebe Timothy?

Timothy ama enen̄ede ekere aban̄a mme owo, ikonyụn̄ idaha n̄kpọ Abasi ibre mbre. Enye ama esisịn idem anam se enye ekekpepde. Enye ama esikpep idemesie n̄kpọ onyụn̄ esiben̄e Abasi spirit esie man an̄wam enye. Mbiowo ye nditọete eken ẹkeme ndikpebe Timothy.​—w18.04, p. 13-14.