1-2. Mmanie ẹkeme ndin̄wam owo odot ndina baptism?

SISTA AMY emi odụn̄de ke Fiji ọdọhọ ete: “Mma mma se ẹkekpepde mi ke Bible, mma nnyụn̄ ndiọn̄ọ ke akpanikọ ke edi. Kpa ye oro, ini ntọn̄ọde ndidu ye nditọete ke n̄kekeme ndikpụhọde nnyụn̄ ndot ndina baptism.” Se Amy etịn̄de oro ekpep nnyịn akpan n̄kpọ kiet: Nditọete ẹma ẹdian ubọk ẹn̄wam owo emi eyenete en̄wen esikpepde Bible, enye ekeme ndika iso nnam mme n̄kpọ emi ẹdin̄wamde enye odot ndina baptism.

² Enyene se nnyịn owo kiet kiet ikemede ndinam n̄n̄wam owo yak edidụk esop. (Eph. 4:16) Sista Leilani emi edide asiakusụn̄ onyụn̄ odụn̄de ke Vanuatu ọdọhọ ete: “Ẹsidọhọ ‘ubọk mụm ubọk mụm otụt ukpa.’ N̄kere ke ntre ke onyụn̄ edi ye ndinam owo edidi mbet Christ. Ofụri esop ẹsidian ubọk ẹn̄wam owo edidụk esop.” Idịghe ete ye eka kpọt ẹsin̄wam eyenọwọn̄ okpon ọwọrọ owo. Iman, mme ufan, ye mme titia ẹsitiene ẹn̄wam. Mmọ ẹsitoro enye ẹnyụn̄ ẹkpep enye mme akpan n̄kpọ emi ẹdin̄wamde enye. Ukem ntre, nditọete ẹkeme ndinọ owo emi isikpepde Bible item, ẹtoro enye, ẹnịm eti uwụtn̄kpọ yak enye ekpebe, man ẹn̄wam enye odot ndina baptism.—N̄ke 15:22.

3. Nso ke ekpep oto se Ana, Dorin, ye Leilani ẹtịn̄de?

³ Ntak emi eyenete ekpenyịmede nditọete ẹtiene ẹn̄wam owo emi enye esikpepde Bible? Sista Ana emi edide akpan asiakusụn̄ ke Moldova ọdọhọ ete: “Ọsọsọn̄ owo ndida ikpọn̄ n̄n̄wam owo odot ndina baptism.” Brọda Dorin emi edide akpan asiakusụn̄ kpa ke idụt oro ọdọhọ ete: “Nditọete ẹsiwak nditịn̄ ikọ emi odụkde owo emi n̄kpepde Bible esịt, emi edide ekpedi nte ami nte ami, n̄kpekereke-kere n̄ka n̄kan̄ oro.” Leilani etịn̄ ntak en̄wen emi ọfọnde isiyak nditọete ẹtiene ẹn̄wam owo emi isikpepde Bible. Enye ọdọhọ ete: “Owo emi isikpepde Bible ama okụt ke nditọete ẹma imọ ẹnyụn̄ ẹkere  ẹban̄a imọ, oro ayanam enye okụt ke nnyịn idi ikọt Jehovah.”—John 13:35.

4. Nso ke idineme ke ibuotikọ emi?

⁴ Emekeme ndikere ete: ‘Didie ke n̄keme ndin̄wam owo emi mîdịghe ami nsikpep Bible yak odot ndina baptism?’ Ẹyak ineme se ikemede ndinam eyenete ama ọdọhọ isan̄a ye imọ ikekpep owo Bible, ye se ikemede ndinam owo ama ọtọn̄ọ ndidụk mbono esop. Iyokụt n̄ko nte mbiowo ẹkemede ndin̄wam mbon emi isikpepde Bible ẹdot ndina baptism.

5. Nso ikpedi utom fo eyenete ama ọdọhọ etiene imọ ekekpep owo Bible?

⁵ Ima ika ndikpep owo Bible, enen̄ede edi utom eyenete emi esikpepde owo oro Bible ndinam Ikọ Abasi an̄wan̄a enye. Eyenete ọkpọdọhọ asan̄a ye imọ ekekpep owo Bible, diọn̄ọ ke aka ndin̄wan̄wam enye. (Eccl. 4:9, 10) Nso ke akpanam man ukpepn̄kpọ oro enyene ufọn ọnọ owo emi ẹkpepde n̄kpọ do?

6. Mme N̄ke 20:18 akpan̄wam fi anam nso ini etienede aka ndikpep owo Bible?

⁶ Tịm idem nọ ukpepn̄kpọ oro. Bụp eyenete emi oyomde ndisan̄a kiet n̄kekpep owo n̄kpọ do n̄kpọ ekpri ban̄a owo oro. (Kot Mme N̄ke 20:18.) Emekeme ndibụp ete: “Enye esika ewe ufọkabasi? Edi n̄kpọ nte isua ifan̄? Ndi ọdọ ndọ? Ewe ibuotikọ ke ẹyom ndikpep? Nso ke oyom ndida ibuotikọ emi nnam enye ọdiọn̄ọ? Nso ke mûkpamaha ntịn̄ m̀mê nnam? Didie ke n̄keme ndin̄wam enye?” Imọdiọn̄ọ ke eyenete oro iditịn̄ke n̄kpọ emi owo oro mîkpamaha owo efen okop, edi se enye editịn̄de inọ fi ekeme ndin̄wam fi. Isụn̄utom kiet emi ekerede Joy esitịn̄ utọ n̄kpọ ntem ọnọ mbon emi enye ọdọhọde ẹsan̄a ye imọ ẹkekpep owo Bible. Enye ọdọhọ ke oro “esinam ọdọn̄ mmọ ndin̄wam mbon emi imọ ikpepde Bible onyụn̄ anam mmọ ẹdiọn̄ọ se ẹkpetịn̄de.”

7. Ama oyom nditiene n̄kekpep owo Bible, ntak emi ekpetịmde idem-e?

⁷ Ama oyom nditiene n̄kekpep owo Bible, ọkpọfọn ekpep itie emi ẹyomde ndikekpep owo oro. (Ezra 7:10) Brọda Dorin emi iketịn̄de iban̄a ke ikpehe ita ọdọhọ ete: “Esinem mi eyenete emi ndọhọde etiene edi ikekpep owo n̄kpọ ama etịm idem. Oro ayan̄wam enye etịn̄ se idin̄wamde owo emi n̄kpepde n̄kpọ.” N̄kpọ efen edi ke oro ekeme ndinam owo oro okụt ke mbufo ẹma ẹnen̄ede ẹtịm idem, ndien oro ayanam enye ekpep ndisitịm idem. Ekpededi ukemeke ndinen̄ede ntịm idem, sụk da ekpri ini yom mme akpan n̄kpọ ke itie emi ẹyomde ndikekpep owo oro.

8. Nso ke akpanam man akam fo otụk owo emi mbufo ẹyomde ndikpep Bible?

⁸ Akpan n̄kpọ kiet emi isinamde ima ika ndikpep owo n̄kpọ esidi ndibọn̄ akam.  Ntre edieke ẹdọhọde ke afo edibọn̄ akam, bem iso kere kan̄a se editịn̄de. Oro ekeme ndinam akam fo otụk owo emi ẹyomde ndikpep n̄kpọ. (Ps. 141:2) Hanae emi odụn̄de ke Japan osụk eteti mme akam sista kiet emi ekesisan̄ade ye owo emi ekesikpepde enye Bible edikpep enye Bible. Hanae ọdọhọ ete: “Mma n̄kụt ke enye enen̄ede ekpere Jehovah, n̄konyụn̄ nyom nditie nte enye. Enye ndikesisiak enyịn̄ mi ini ọbọn̄de akam ama anam n̄kụt ke enye ama mi.”

9. James 1:19 ọdọhọ ke nso ke akpanam man enen̄ede an̄wam eyenete emi ekpepde owo n̄kpọ?

⁹ N̄wam eyenete ini enye ekpepde owo n̄kpọ. Sista Omamuyovbi emi edide akpan asiakusụn̄ ke Nigeria ọdọhọ ete: “Owo emi asan̄ade ye eyenete aka ndikpep owo n̄kpọ ekpenen̄ede akpan̄ utọn̄, enye eyenyene ufọn ọnọ eyenete oro. Enye eyetịn̄ ikọ emi edin̄wamde owo emi mmọ ẹkpepde n̄kpọ do, edi iditịn̄ke ikọ awak akaha sia enye ọdiọn̄ọ ke idịghe ukpepn̄kpọ imọ ke edi.” Edinam didie ọdiọn̄ọ ini ekpesịnde uyo ye se ekpetịn̄de? (N̄ke 25:11) Nen̄ede kpan̄ utọn̄ kop se eyenete oro ye owo emi enye ekpepde n̄kpọ ẹtịn̄de. (Kot James 1:19.) Ama anam ntre, ọyọdiọn̄ọ nnennen ini emi ekpesịnde uyo. Edi mbemiso esịnde uyo, kere kan̄a se oyomde nditịn̄. Ke uwụtn̄kpọ, udûtịn̄ke ikọ awawak akaha, udûnyụn̄ ubọhọ eyenete oro ikọ ke inua m̀mê ndikpọn̄ se ẹkenemede n̄kodụk ibuotikọ efen. Edi ikọ ifan̄ emi etịn̄de, uwụtn̄kpọ emi ọnọde, m̀mê mbụme emi obụpde ekeme ndinam se ẹnemede enen̄ede an̄wan̄a. Ndusụk ini, ekeme nditie nte unen̄ekede unyene se etịn̄de esịn ke ukpepn̄kpọ oro. Ekpetie ntre, sụk toro owo oro nyụn̄ wụt ke emekere aban̄a enye. Oro eyenen̄ede an̄wam enye anam se enye ekpepde.

10. Didie ke nditịn̄ n̄kpọ mban̄a idemfo ekeme ndin̄wam owo emi ẹkade ẹkekpep Bible?

¹⁰ Tịn̄ n̄kpọ ban̄a idemfo. Emekeme nditịn̄ ekpri ekpri nte akasan̄ade edidụk esop, nte akakande idomo emi ekesịmde fi, m̀mê nte Jehovah akan̄wamde fi edieke okụtde ke oro ayan̄wam owo oro. (Ps. 78:4, 7) Se afo etịn̄de oro ekeme ndinen̄ede nnyene ufọn nnọ enye. Oro ekeme ndinam enye enen̄ede ọbuọt idem ye Jehovah mîdịghe anam enye esịn idem anam n̄kpọ man odot ndina baptism, onyụn̄ ekeme ndinam enye okụt se akpanamde aban̄a mfịna emi enye enyenede. (1 Pet. 5:9) Asiakusụn̄ kiet ke Brazil emi ekerede Gabriel eti se ikan̄wamde enye ini enye osụk ekpepde n̄kpọ. Enye ọdọhọ ete: “Ekesidi mma n̄kop nte nditọete ẹtịn̄de se ikan̄wamde mmọ ini mmọ ẹkenyenede mfịna, ami nda oro mfiọk ke Jehovah esikụt se isiwọrọde nnyịn. Edieke mmọ ẹkekemede ndiyọ se ikọwọrọde mmọ, ami n̄ko mmekeme ndiyọ.”

11-12. Owo emi eyenete en̄wen esikpepde Bible ama ọtọn̄ọ ndidụk mbono esop, ntak emi ikpanamde enye okụt ke ẹma nte imọ idide?

¹¹ Man owo odot ndina baptism, ana enye esidụk mbono esop kpukpru ini, oro ayan̄wam enye. (Heb. 10:24, 25) Akpa ini emi owo oro edidide mbono esop, ekeme ndidi eyenete emi esikpepde enye Bible edikot enye edi. Enye ama edi, kpukpru nnyịn imekeme ndinam ọdọn̄ enye ndisika iso ndi mbono esop. Nso ke ikpanam?

¹² Nen̄ede kọm enye. (Rome 15:7) Ima inam enye okụt ke ẹma nte imọ idide, oro ekeme ndinam ọdọn̄ enye ndisidi mbono esop. Kọm enye ufan ufan, men enye wụt nditọete eken, edi kûnam ke usụn̄ emi edinamde bụt ananam enye. Kûkere ke owo efen ese aban̄a enye sia ekeme ndidi eyenete emi esikpepde enye n̄kpọ idisịmke kan̄a, mîdịghe edi ke anam n̄kpọ efen. Nen̄ede kpan̄ utọn̄ kop se owo oro etịn̄de nyụn̄ wụt ke emekere aban̄a enye. Ama anam enye okụt ke ẹnen̄ede ẹma nte imọ idide, didie ke oro edin̄wam enye? Brọda Dmitrii etịn̄ se iketịbede akpa ini emi enye odụkde mbono esop. Enye akana baptism isua ifan̄ emi ekebede onyụn̄ edi asan̄autom unamutom idahaemi. Enye ọdọhọ ete: “Brọda kiet emi okokụtde nte ndade ndịk ndịk ke iso Ufọkmbono Obio Ubọn̄ ama emen mi odụk esịtufọk. Ediwak owo ẹma ẹdikọm mi. Ama akpa mi idem tutu. Ama enem mi tutu editie nte mbono esop ekpesidi kpukpru usen. N̄kekwe utọ n̄kpọ oro akanam.”

13. Didie ke eti uwem fo ekeme ndin̄wam owo emi eyenete en̄wen esikpepde Bible?

¹³ Nyene eti uwem. Eti uwem fo ekeme ndinam owo oro enịm ke nnyịn idi ata mme Christian. (Matt. 5:16) Vitalii emi edide asiakusụn̄ idahaemi ke Moldova ọdọhọ ete: “Mma n̄kụt nte mbon en̄wen ke esop ẹsidude uwem, ẹsinamde n̄kpọ, ye nte mmọ ẹsidade nsio nsio n̄kpọ. Oro ama anam nnịm ke Mme Ntiense Jehovah ẹnen̄ede ẹnam n̄kpọ Abasi.”

14. Didie ke eti uwem fo ekeme ndin̄wam owo anam se idin̄wamde enye odot ndina baptism?

¹⁴ Ana owo anam se enye ekpepde man enye odot ndina baptism. Edi isimemke ndinam oro ndusụk ini. Owo ama okụt nte item Bible an̄wamde fi, oro ekeme ndinam enye anam se Bible etịn̄de. (1 Cor. 11:1) Yak ise se ikan̄wamde Hanae emi iketịn̄de iban̄a ke ikpehe itiaba. Enye ọdọhọ ete: “Mma n̄kụt nte nditọete ẹnamde se n̄kosụk n̄kpepde. Mma n̄kụt nte n̄kpọsọn̄ọde mbon efen idem, mfen nnọ mmọ, nnyụn̄ n̄wụt ke mmama mmọ. Kpukpru ini, mmọ ẹkesitịn̄ nti n̄kpọ ẹban̄a mbon efen. N̄koyom nditie nte mmọ.”

15. Didie ke Mme N̄ke 27:17 owụt ntak emi ikpedide ufan ye owo emi eyenete en̄wen esikpepde Bible?

 ¹⁵ Di ufan esie. Nte owo oro osụk odụkde mbono esop aka, nam enye okụt ke emekere aban̄a enye. (Phil. 2:4) Yom usụn̄ nen̄ede diọn̄ọ enye. Emekeme ndidọhọ enye ke imama nte enye anamde se enye ekpepde. Emekeme ndibụp enye nte enye adade se enye ekpepde, onyụn̄ obụp enye aban̄a ubon esie ye utom esie. Oro ekeme ndinam mbufo ẹnen̄ede ẹkpere. Edi kûbụp mbụme emi ekemede ndinam enye bụt. Ama ekpere enye, ayan̄wam enye ekeme ndinam mme n̄kpọ emi ẹdin̄wamde enye odot ndina baptism. (Kot Mme N̄ke 27:17.) Hanae edi asiakusụn̄ ofụri ini idahaemi. Enye eti nte n̄kpọ eketiede ini enye ọkọtọn̄ọde ndidụk mbono esop. Enye ọdọhọ ete: “Nte n̄kenyenede ufan ke esop n̄ka, ntre ke ekenen̄ede ọdọn̄ mi ndisidụk mbono esop; mma nsinyụn̄ ndụk ekpededi akakak mi ke idem. Ama esinem mi ndidu ye mbufa ufan mi, oro ama an̄wam mi ntre ufan ye mbon emi mîkponoke Jehovah. Mma nnen̄ede nyom ndikpere Jehovah ye nditọete, ntre mma mbiere ndina baptism.”

16. Nso en̄wen ke akpanam man enem obufa owo ndidu ke esop?

¹⁶ Nte owo oro osụk anamde mme n̄kpọ emi ẹdin̄wamde enye odot ndina baptism, nam enye okụt ke ẹma enye nte ẹmade nditọete eken. Emekeme ndisikot enye ufọk. (Heb. 13:2) Denis emi odụn̄de ke Moldova eti nte ẹkesinamde n̄kpọ ye enye ini enye osụk ekpepde Bible. Enye ọdọhọ ete: “Nditọete ẹma ẹnyene ekpri mboho, mmọ ẹma ẹsikot mi ye n̄wan mi. Ima isikop mmọ ẹtịn̄de nte Jehovah akan̄wamde mmọ. Oro ama ọsọn̄ọ nnyịn idem. Mme n̄kpọ oro ẹkenam ibiere ndinam n̄kpọ Jehovah inyụn̄ inịm ke uwem eyenem nnyịn edieke inamde n̄kpọ Jehovah.” Owo emi eyenete en̄wen esikpepde Bible ama edi asuanetop, emekeme ndidọhọ enye asan̄a ye afo aka ukwọrọikọ. Diego emi edide asuanetop ke Brazil ọdọhọ ete: “Ediwak nditọete ẹma ẹsidọhọ mi nsan̄a ye mmọ n̄ka ukwọrọikọ, se ikanamde nnen̄ede ndiọn̄ọ mmọ edi oro. Nte n̄kasan̄ade ye nsio nsio nditọete n̄kwọrọ ikọ, mma n̄kpep ediwak n̄kpọ nto mmọ nnyụn̄ nnen̄ede n̄kpere Jehovah ye Jesus.”

17. Didie ke mbiowo ẹkeme ndin̄wam owo emi osụk ekpepde Bible?

¹⁷ Nyene ini nọ mmọ. Mbiowo, ẹma ẹma ẹnyụn̄ ẹwụt ke ẹmekere ẹban̄a mbon emi nditọete ẹsikpepde Bible, oro ayan̄wam mmọ ẹnam se idinamde mmọ ẹdot ndina baptism. Ndi emekeme ndisineme nneme ye mmọ mmọ ẹma ẹdi mbono esop? Ama eti enyịn̄ mmọ, akpan akpan mmọ ẹma ẹtọn̄ọ ndibọrọ mbụme, oro ayanam  mmọ ẹkụt ke emekere aban̄a mmimọ. Ndi emekeme ndidi anam anam afo asan̄a ye eyenete ekekpep owo Bible? Oro ekeme ndinen̄ede n̄n̄wam owo oro n̄kan nte afo ekpekerede. Asiakusụn̄ kiet ke Nigeria emi ekerede Jackie ọdọhọ ete: “Idem esikpa ediwak mbon emi nsikpepde Bible mmọ ẹma ẹdiọn̄ọ ke brọda emi nsan̄ade kiet n̄kekpep mmọ n̄kpọ edi ebiowo. Owo kiet ọkọdọhọ ete: ‘Pastọ nnyịn ikpedehe-dei inam utọ n̄kpọ oro. Enye esika ekese mme imọ owo kpọt. Mmọ mînyụn̄ inọhọ enye okụk, ikaha!’ ” Owo oro Jackie etịn̄de aban̄a do esidụk mbono esop idahaemi.

18. Didie ke mbiowo ẹkeme ndinam se Utom 20:28 ọdọhọde mmọ ẹnam?

¹⁸ N̄wam nditọete ẹdiọn̄ọ se mmọ ẹkpenamde, nyụn̄ sọn̄ọ mmọ idem. Mbiowo, edi utom mbufo ndin̄wam nditọete ẹdiọn̄ọ ndikwọrọ ikọ nnyụn̄ n̄kpep mme owo n̄kpọ ọfọn. Idịghe ekpri utom ke mbufo ẹnyene oro. (Kot Utom 20:28.) Akpasan̄a ye eyenete aka ndikpep owo n̄kpọ, ndien bụt anam enye ndikpep owo n̄kpọ ke iso fo, bụp enye m̀mê imọ imekeme ndikpep usen oro. Jackie emi iketịn̄de iban̄a ke ikpehe 17 ọdọhọ ete: “Mbiowo ẹsiwak ndibụp mi mban̄a mbon emi nsikpepde n̄kpọ. Ọkpọsọn̄ mi ndin̄wam owo emi nsikpepde Bible, mmọ ẹsiteme mi se n̄kpanamde.” Awak se mbiowo ẹkemede ndinam nsọn̄ọ nditọete idem nnyụn̄ n̄n̄wam mmọ ẹka iso ẹsịn idem ẹkpep mme owo n̄kpọ. (1 Thess. 5:11) Jackie afiak ọdọhọ ete: “Esinem mi mbiowo ẹma ẹtoro mi ẹnyụn̄ ẹdọhọ ke imama nte nsịnde idem n̄kpep mme owo Bible. Utọ ikọ oro esitie nte ẹnọ mi mbịtmbịt mmọn̄ n̄n̄wọn̄ ke usen anainai eyo. Itoro mmọ esinam nnịm ke mman̄wam mbon emi n̄kpepde Bible, esinyụn̄ anam utom oro enen̄ede enem mi.”—N̄ke 25:25.

19. Nso ikeme ndinam esịt enem kpukpru nnyịn?

¹⁹ Ekpededi nnyịn inyeneke owo emi ikpepde Bible idahaemi, imosụk ikeme ndin̄wam owo odot ndina baptism. Ima isan̄a ye eyenete ika ndikpep owo Bible, nnyịn iditịn̄ke ikọ awak akaha, edi ima itịn̄ se iketịmde idem nditịn̄, oro ayan̄wam eyenete oro. Imekeme ndidi ufan ye mbon emi nditọete en̄wen ẹsikpepde Bible mmọ ẹma ẹdi mbono esop, imonyụn̄ ikeme ndinam nti n̄kpọ yak mmọ ẹkpebe. Mbiowo ẹma ẹnyene ini ẹnọ mbon emi nditọete ẹsikpepde Bible, oro ọyọsọn̄ọ mmọ idem. Mmọ ẹma ẹnyụn̄ ẹn̄wam nditọete emi ẹsikpepde owo n̄kpọ ẹnyụn̄ ẹtoro mmọ, oro ọyọsọn̄ọ mmọ idem n̄ko. Esịt esinen̄ede enem nnyịn ima in̄wam owo ama Jehovah onyụn̄ anam n̄kpọ esie ekpededi se ikanamde ekedi ekpri ekpri.