Ke ini iyomde ndidiọn̄ọ owo, akpa n̄kpọ emi idibụpde enye edidi enyịn̄ esie. Edieke okpobụpde Abasi enyịn̄ esie, ekere ke enye ọkpọdọhọ didie?

“Ami ndi Jehovah. Enyịn̄ mi edi oro.”—Isaiah 42:8.

Abasi idaha enyịn̄ esie ibre mbre. Idịghe owo okosio Abasi enyịn̄, enye okosio idemesie enyịn̄. Jehovah ọkọdọhọ ete: “Emi edi enyịn̄ mi ke nsinsi, emi onyụn̄ edi se ẹdade ẹti mi ke kpukpru emana.” (Exodus 3:15) Ke Bible, enyịn̄ Abasi awak akan udori-enyịn̄ esie ekededi, utọ nte Ata Ọkpọsọn̄, Ete, Ọbọn̄, m̀mê Abasi, onyụn̄ awak akan enyịn̄ efen ekededi, utọ nte Abraham, Moses, David, m̀mê Jesus. N̄ko, Jehovah oyom mme owo ẹdiọn̄ọ enyịn̄ esie. Bible ọdọhọ ete: “Man mme owo ẹkpefiọk ẹte ke afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.”—Psalm 83:18.

Jesus idaha enyịn̄ Abasi ibre mbre. Ke ini Jesus ekekpepde mbet esie Akam Ọbọn̄, enye ọkọdọhọ mmọ ẹsidọhọ ẹte: “Yak ẹnam enyịn̄ fo asana.” (Matthew 6:9) Jesus ke idemesie ọkọbọn̄ akam ọnọ Abasi ete: “Ete, nọ enyịn̄ fo ubọn̄.” (John 12:28) Jesus akada ndinọ enyịn̄ Abasi ubọn̄ nte ata akpan n̄kpọ, ntak edi oro enye ọkọbọn̄de akam ete: “Ami mmonyụn̄ nnam mmọ ẹfiọk enyịn̄ fo nyonyụn̄ nnam mmọ ẹfiọk.”—John 17:26.

Mbon emi ẹdiọn̄ọde Abasi idaha enyịn̄ esie ibre mbre. Ikọt Abasi ke eset ẹma ẹdiọn̄ọ ke enyịn̄ Abasi ekeme ndikpeme onyụn̄ anyan̄a mmimọ. “Enyịn̄  Jehovah edi ọkpọsọn̄ tọwa. Edinen owo efehe odụk ke esịt ndien ẹkpeme enye.” (Mme N̄ke 18:10) “Kpukpru owo eke ẹsemede ẹkot enyịn̄ Jehovah ẹyebọhọ.” (Joel 2:32) Bible ọdọhọ ke enyịn̄ Abasi ayanam ẹdiọn̄ọ mbon oro ẹkponode ata Abasi. “Kpukpru owo ẹyesan̄a ke enyịn̄ abasi mmọ; edi nnyịn idisan̄a ke enyịn̄ Jehovah Abasi nnyịn ke nsinsi nsinsi.”—Micah 4:5; Utom 15:14.

Enyịn̄ Abasi anam ẹdiọn̄ọ enye. Ediwak ntaifiọk emi ẹsinamde ndụn̄ọde ẹban̄a Bible ẹdọhọ ke enyịn̄ oro Jehovah ọwọrọ “Enye Anam Akabade Edi.” Jehovah ama anam ẹfiọk se enyịn̄ esie ọwọrọde ke ini enye ọkọdọhọde Moses ete: “Ami Nyakabade Ndi Se Ndikabarede Ndi.” (Exodus 3:14) Ntem, enyịn̄ Abasi anam idiọn̄ọ ke enye okobot kpukpru n̄kpọ onyụn̄ owụt ke enye ekeme ndikabade ndi se ededi oro enye oyomde mîdịghe anam owo m̀mê n̄kpọ emi enye okobotde akabade edi se ededi oro enye oyomde man uduak esie osu. Mme udori-enyịn̄ Abasi ẹnam nnyịn ifiọk ke Abasi enyene odudu onyụn̄ okon̄ akan ke ofụri ekondo, edi enyịn̄ esie, Jehovah, kpọt anam ifiọk ofụri se enye edide ye se enye ekemede ndikabade ndi.

Enyịn̄ Abasi owụt ke Abasi ama nnyịn. Enyịn̄ Abasi owụt ke enye ayaka iso ese aban̄a se enye okobotde, esịnede mme owo. N̄ko, Abasi ndinam nnyịn ifiọk enyịn̄ esie owụt ke enye oyom nnyịn idiọn̄ọ imọ. Enye ke idemesie akasiak enyịn̄ esie ọnọ mme owo mbemiso mmọ ẹbụpde enye. Abasi iyomke nnyịn ida imọ nte spirit emi odude oyom usụn̄ ọkpọn̄ nnyịn, emi nnyịn mîkemeke ndikpere. Edi enye oyom isan̄a ikpere imọ.—Psalm 73:28.

Nnyịn ndisikot enyịn̄ Abasi owụt ke imama enye. Yak idọhọ ke enyene owo emi oyomde edi ufan fo. Edieke ọdọhọde enye esikot fi ke enyịn̄ edi enye imaha ndikot, ndi esịt ekpenem fi? Edieke enye osụk akade iso etre ndikot fi ke enyịn̄, emekeme ndikere m̀mê enye akam enen̄ede oyom ndidi ufan fo. Ntre n̄ko ke edi ye Jehovah. Enye asiak enyịn̄ esie ọnọ nnyịn, onyụn̄ ọdọhọ nnyịn isikot imọ ke enyịn̄. Ke ini inamde emi, iwụt Jehovah ke ikpama ndidi ufan esie. Bible ọdọhọ ke Jehovah esikpan̄ utọn̄ ọnọ “mbon oro ẹkerede ẹban̄a enyịn̄ esie.”—Malachi 3:16.

Akpa n̄kpọ emi ikpọfiọkde iban̄a Abasi edi enyịn̄ esie. Edi ikụreke ke oro. Enyene n̄kpọ en̄wen emi anade ifiọk iban̄a enye. Ana ifiọk nte Abasi etiede.