Anaedi emesikere ke ufan fo ayan̄wam fi ke ini enyenede mfịna. Ntak edi oro ndusụk owo ẹsidọhọde ke Abasi idịghe ufan mmimọ sia mmọ ẹkere ke enye inamke n̄kpọ ndomokiet ndin̄wam mmimọ. Edi Abasi ananam ata ediwak n̄kpọ emi an̄wamde nnyịn idahaemi oyonyụn̄ anam kpukpru ufen oro ibọde mfịn etre. Nso ye nso ke Abasi edinam inọ nnyịn?

Abasi oyosobo owo emi edide ntak idiọk n̄kpọ ererimbot emi efep. Bible anam idiọn̄ọ owo emi edide ntak idiọk n̄kpọ. Enye ọdọhọ ete: “Ofụri ererimbot esịne ke idak odudu andidiọk.” (1 John 5:19) Satan, emi ẹnyụn̄ ẹkotde Devil, edi “andidiọk” oro, ndien Jesus ọkọdọhọ ke enye edi “andikara ererimbot emi.” (John 12:31) Satan otụn mme owo usụn̄ ke ererimbot emi, ntak edi oro mfịna okponde ntem. Nso ke Abasi edinam?

Ibịghike Jehovah Abasi ọmọn̄ anam Jesus Christ Eyen esie “[osobo] enye emi ekemede ndida n̄kpa ndi, oro edi, Devil.” (Mme Hebrew 2:14; 1 John 3:8) Bible ọdọhọ ke Devil ke idemesie ọdiọn̄ọ ke “ini imọ edi ibio.” (Ediyarade 12:12) Abasi ayanam kpukpru idiọk n̄kpọ etre onyụn̄ osobo kpukpru mbon oro ẹnamde idiọkn̄kpọ.—Psalm 37:9; Mme N̄ke 2:22.

Ke Abasi ama akanam idiọk n̄kpọ etre, enye ayanam isọn̄ emi etie nte enye okoyomde onyụn̄ anam se enye ọkọn̄wọn̄ọde ndinam nnọ mme owo. N̄kpọ editie didie ini oro?

Emem ye ifụre oyodu ke nsinsi. “Mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—Psalm 37:11.

Nti udia oyodu barasuene. “Uwak n̄kpasịp [udia] ẹyedu ke isọn̄; ọyọyọhọ ọduọhọ ke mme enyọn̄ obot.”—Psalm 72:16.

Nti ufọk ye nti utom ẹyedu. “Mmọ ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. . . . Ndimek ikọt mi ẹyedia ufọn utom ubọk mmọ ọyọhọ ọyọhọ.”—Isaiah 65:21, 22.

Ndi ọdọn̄ fi ndikụt mme n̄kpọ emi? Nte uwem editiede kpukpru usen edi oro ke mîbịghike.

Idụhe owo emi mîsidọn̄ọke ke ererimbot emi, inyụn̄ idụhe owo emi mîkemeke ndikpa, edi ididịghe ntre aba. Ibịghike, Abasi ọmọn̄ ada ufak Jesus anam “owo ekededi eke ọbuọtde idem ye enye . . . enyene nsinsi uwem.” (John 3:16) Uwem editie didie ini oro?

Udọn̄ọ ididụhe aba. “Baba andidụn̄ kiet ididọhọke ite: ‘Ndọdọn̄ọ.’ Ẹyedahado ẹnọ mme andidụn̄ isọn̄ ke ndudue mmọ.”—Isaiah 33:24.

N̄kpa ididụhe aba. “Enye eyemen n̄kpa emen ke nsinsi, Jehovah Akakan Ọbọn̄ Andikara oyonyụn̄ ọkwọhọde mmọn̄eyet efep ke iso kpukpru owo.”—Isaiah 25:8.

Mme owo ẹyedu uwem ke nsinsi. “Enọ oro Abasi ọnọde edi nsinsi uwem ke Christ Jesus Ọbọn̄ nnyịn.”—Rome 6:23.

Ẹyenam mme akpan̄kpa ẹset. “Ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) Mmọ ẹyetiene ẹdia ufọn ufak oro Abasi ọkọnọde.

Abasi edisan̄a didie inam kpukpru emi?

Abasi edida Obio Ubọn̄ esie emi odude ke heaven inam kpukpru se enye ọn̄wọn̄ọde emi, ndien Jesus Christ ke enye emek Edidem Obio Ubọn̄ oro. (Psalm 110:1, 2) Obio Ubọn̄ oro ke Jesus ekekpep mme mbet esie ndibọn̄ akam mban̄a. Enye ọkọdọhọ mmọ ẹsibọn̄ akam ẹte: “Ete nnyịn emi odude ke heaven, . . . yak obio ubọn̄ fo edi.”—Matthew 6:9, 10.

Obio Ubọn̄ Abasi ayakara ofụri isọn̄ onyụn̄ anam ofụri ufen emi ibọde mi etre. Idụhe ukara emi edifọnde ye mme owo ntem! Ntak edi oro Jesus ekesịnde idem “ọkwọrọ eti mbụk obio ubọn̄” oro ke ini enye okodude mi ke isọn̄ onyụn̄ ọdọhọ mbet esie ẹtiene ẹkwọrọ.—Matthew 4:23; 24:14.

Jehovah Abasi ọn̄wọn̄ọ ndinam kpukpru nti n̄kpọ emi nnọ mme owo sia enye enen̄ede ama mmọ. Ndi oro inamke oyom ndinen̄ede ndiọn̄ọ enye nnyụn̄ ndi ufan esie? Edi nso ufọn ke edidia edieke anamde oro? Ibuotikọ oro etienede ọyọbọrọ mbụme emi.