Tọn̄ọ ke akpa ibuotikọ magazine emi tutu esịm enye emi, imọbọrọ nsio nsio mbụme oro anamde inen̄ede ifiọk Abasi. Akpa n̄kpọ oro iketịn̄de ekedi ke Bible ọdọhọ ke Abasi ekere Jehovah, ima inyụn̄ itịn̄ ke ima edi akakan edu esie. Ima ineme n̄ko se enye anamde ọnọ nnyịn ye se enye edinamde inọ nnyịn ke ini iso. Ediwak n̄kpọ ẹsụk ẹdodu emi ọkpọfiọkde aban̄a Abasi, edi emekeme ndibụp m̀mê nso ke ndifiọk kpukpru emi mban̄a Abasi edinam inọ imọ.

Jehovah ọdọhọ ke ‘edieke afo oyomde imọ, ke imọ iyayak fi okụt imọ.’ (1 Chronicle 28:9) Kere utọ akamba ufọn emi afo edidiade edieke oyomde Abasi onyụn̄ edide edifiọk enye: Bible ọdọhọ ke eyedi “ata ufan esie”! (Psalm 25:14) Nso ufọn ke edidia edieke edide ufan Abasi?

Eyenen̄ede okop inemesịt. Jehovah edi “Abasi inemesịt.” (1 Timothy 1:11) Edieke edide ufan Abasi onyụn̄ ekpebede enye, eyenen̄ede okop inemesịt, ndien oro ayanam esịt ana fi sụn̄, onyụn̄ anam okop inem uwem. (Psalm 33:12) Ndidi ufan Abasi oyonyụn̄ anam okûdu etịme etịme uwem, anam odu eti uwem, onyụn̄ anam odu ke emem ye mme owo. Ndien emi ayanam enen̄ede okop inemesịt. Oyokụt ke andiwet Psalm eketịn̄ akpanikọ ke ini enye ọkọdọhọde ete: “Ọfọn mi ndisan̄a n̄kpere Abasi.”—Psalm 73:28.

Abasi eyese aban̄a fi. Jehovah ọn̄wọn̄ọ ọnọ ikọt esie ete: “Nyetịn̄ fi enyịn ke idem nnyụn̄ nteme fi.” (Psalm 32:8) Emi ọwọrọ ke Jehovah enen̄ede etịn̄ enyịn ese ikọt esie, onyụn̄ ọnọ mmọ kiet kiet se mmọ ẹyomde. (Psalm 139:1, 2) Jehovah eyese aban̄a fi kpukpru ini edieke edide ufan esie.

Oyodu uwem ke nsinsi. Ufọn oro edidiade ikụreke ke ndikop inem uwem idahaemi. Jehovah etịn̄ se ekemede ndinam man odu uwem ke nsinsi ke Paradise. (Isaiah 48:17, 18) Bible ọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Kpa nte ukwak ubom esimụmde ubom enịm, kpasụk ntre ke idotenyịn oro Abasi ọnọde nnyịn anam ika iso isọn̄ọ ida ye enye ke idiọk ererimbot emi.—Mme Hebrew 6:19.

Se inemede emi edi ndusụk ke otu ntak oro akpanamde iyom ndinen̄ede ndiọn̄ọ Abasi, nnyụn̄ ndi ufan esie. Edieke akpamade ndifiọk n̄kpọ en̄wen, mbọk bụp Ntiense Jehovah ekededi, mîdịghe ka jw.org/efi.