KPUKPRU OWO

Se Bible ọdọhọde: ‘Abasi ikobotke isọn̄ ke ikpîkpu, edi okobot enye man ẹdụn̄ ke esịt.’—ISAIAH 45:18.

ISỌN̄

Se Bible ọdọhọde: “Emana kiet ebe, emana efen onyụn̄ edi; edi isọn̄ ada ke nsinsi.”—ECCLESIASTES 1:4.

NSO KE EMI ỌWỌRỌ? Bible ọdọhọ ke owo idisoboke isọn̄ ifep tutu amama, ke mme owo ẹyeka iso ẹdụn̄ ke isọn̄ ke nsinsi. Ntre, nso ke utịt ererimbot ọwọrọ?

KERE ISE: Bible emen utịt ererimbot emi odomo ye se iketịbede ke eyo Noah. ‘Afai ọkọyọyọhọ isọn̄’ ini oro. (Genesis 6:13) Edi Noah ekedi eti owo. Ntre Abasi ama ada Ukwọ osobo ndiọi owo, edi anam Noah ye ubon esie ẹbọhọ. Kop se Bible etịn̄de mi aban̄a se iketịbede ini oro: “Mme n̄kpọ oro ke ẹkeda ẹsobo ererimbot emi okodude adan̄aoro ke ini ẹkedade ukwọ ẹfụk enye.” (2 Peter 3:6) Utịt ererimbot ekedi oro. Edi, nso ke ẹkesobo? Owo ikosoboke isọn̄, edi ẹkesobo ndiọi owo emi ẹkedude ke isọn̄. Ntre, ke ini Bible etịn̄de aban̄a utịt ererimbot, emi iwọrọke ke ẹyesobo isọn̄ ẹfep. Utu ke oro, ẹdisobo ndiọi owo emi ẹdude ke isọn̄ ẹnyụn̄ ẹnam ndiọi n̄kpọ oro mmọ ẹnamde etre.

MFỊNA YE NDIỌI N̄KPỌ

Se Bible ọdọhọde: “Ayak esisịt, ­idiọkowo ididụhe aba; afo oyonyụn̄ etịn̄ enyịn ke ebiet esie, ndien enye ididụhe. Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—PSALM 37:10, 11.

NSO KE EMI ỌWỌRỌ? Ukwọ eyo Noah ikanamke idiọkn̄kpọ etre ofụri ofụri. Ke Ukwọ oro ama ekebe, ndiọi owo ẹma ẹfiak ẹtọn̄ọ ndinam ndiọi n̄kpọ ẹnyụn̄ ẹnam uwem ọsọn̄ ye mme owo. Edi ibịghike, Abasi ọmọn̄ anam idiọkn̄kpọ etre ofụri ofụri. Andiwet Psalm ọkọdọhọ ke “idiọkowo ididụhe aba” ini oro. Abasi edida Obio Ubọn̄ esie inam emi. Obio Ubọn̄ Abasi edi ukara emi ẹtiede ke heaven ẹkara nti owo ke ofụri isọn̄.

KERE ISE: Ndi mme andikara ererimbot emi ẹyesụk ibuot ẹnọ ukara Abasi? Bible ọdọhọ ke mmọ idisụkke. Mmọ ẹyesịme ndisịme ẹyom ndibiọn̄ọ ukara Abasi. (Psalm 2:2) Nso iditịbe? Obio Ubọn̄ Abasi oyosobo kpukpru ukara owo efep, ndien enye ikpọn̄ edikara ke nsinsi. (Daniel 2:44) Edi ntak anade ẹtre ukara owo?

Se Bible ọdọhọde: “Isịneke ke ubọk owo eke asan̄ade ndinen̄ede ikpatisan̄ esiemmọ.”—JEREMIAH 10:23.

NSO KE EMI ỌWỌRỌ? Abasi ikobotke owo yak akara owo. Ntak edi oro mme owo mîkemeke ndikara ọfọn mînyụn̄ ikemeke ndikọk mfịna ererimbot emi.

KERE ISE: N̄wed kiet emi ẹkotde Britannica Academic ọdọhọ ke etie nte ukara idụt kiet kiet ikemeke ndinam utọ mfịna nte ubuene, biọn̄, udọn̄ọ, oto-obot afanikọn̄, ekọn̄, ye afai etre. N̄wed oro ọdọhọ ke “ndusụk owo ẹnịm ke ẹdikeme ndikọk mme mfịna emi edieke ukara kiet kpọt akarade ofụri ererimbot.” Edi ọkpọkọm ofụri ukara ererimbot emi ẹdadiana kiet, owo idisụk ikemeke ndikọk mme mfịna ererimbot emi sia mbon emi ẹdikarade ifọnke ima. Obio Ubọn̄ Abasi kpọt ekeme ndikọk ofụri mfịna ererimbot emi.

Ntre, se Bible etịn̄de aban̄a utịt ererimbot owụt ke nti owo ikpokopke ndịk ke ini mmọ ẹkopde ke idiọk ererimbot emi ọmọn̄ esesịm utịt. Utu ke oro, mmọ ẹkpekam ẹbọbọn̄ akam ẹyom utịt edi, sia obufa ererimbot Abasi ayada itie idiọk ererimbot emi!

Ini ewe ke emi editịbe? Ẹyeneme nte Bible ọbọrọde mbụme emi ke ibuotikọ oro etienede.