KE INI N̄KPỌ MMỌN̄EYET ETỊBEDE, NDI EMESIKERE M̀MÊ ABASI OKODU KE M̀MỌ̀N̄? MÎDỊGHE NDI AKANAM AFANIKỌN̄ ETỊBE ỌNỌ FI EMI ANAMDE EKERE KE ABASI EFRE FI ENYỊN?

Ekeme ndidi esitie fi ke idem nte eketiede Sheila emi odụn̄de ke United States. Ubon mme Sheila ẹma ẹsisịn idem ke n̄kpọ ufọkabasi mmọ. Sheila ọdọhọ ete: “Mma mma Abasi toto ke ini emi n̄kedide eyenọwọn̄ sia edide enye okobot nnyịn. Edi n̄kenen̄ekede n̄kpere enye. N̄kekere ke enye etie nsannsan ese mi. Idịghe nte ke n̄kekere ke enye asasua mi, edi n̄kenịmke ke enye ama mi.” Ntak emi Sheila ekekerede ke Abasi imaha imọ? Enye ọdọhọ ete: “Ima isobo ediwak afanikọn̄ ke ubon nnyịn; ekesidi kiet ikụreke-kụre en̄wen etịbe, ndien eketie nte ke Abasi idọn̄ke enyịn ke se iwọrọde nnyịn.”

Ukem nte Sheila, ekeme ndidi afo n̄ko emenịm ke Abasi odu. Edi, emekeme ndikere m̀mê enye okụt se iwọrọde fi. Kpa ye oro Job ekenịmde ke Abasi enyene odudu onyụn̄ enyene ọniọn̄, enye ama ekere m̀mê Abasi akam okụt se iwọrọde imọ. (Job 2:3; 9:4) Ke ini nsio nsio afanikọn̄ ẹkesịmde Job, enye ama obụp Abasi ete: “Ntak emi afo edịpde iso fo onyụn̄ adade mi nte asua fo?”​—Job 13:24.

Nso ke Bible ọdọhọ? Ndi Abasi esinam afanikọn̄ etịbe? Ndi enyene n̄kpọ ndomokiet emi owụtde ke Abasi ekere aban̄a nnyịn owo kiet kiet? Ndi enyene nte owo ekemede ndidiọn̄ọ m̀mê Abasi esiti utọ owo nte imọ, ọfiọk nte etiede imọ ke idem, atua imọ mbọm, onyụn̄ an̄wam imọ ke ini inyenede mfịna?

Ke mme ibuotikọ oro ẹtienede, oyokụt ke nte Abasi okobotde nnyịn owụt ke enye ekere aban̄a nnyịn. (Rome 1:20) Iyonyụn̄ ineme nte Bible owụtde ke Abasi ama nnyịn. Edieke etịmde ese nte Abasi okobotde nnyịn onyụn̄ ekpepde Bible, eyedi edifiọk Abasi onyụn̄ okụt ke enye enen̄ede ‘ekere aban̄a fi.’​—1 John 2:3; 1 Peter 5:7.