UWEM imemke ye George. Enye inyeneke se ubon esie ẹdiade. Mbio obio mmọ n̄ko ke ẹdọn̄ọ, ndusụk inyụn̄ inyeneke udia idia. Edi enye okop ke n̄kpọ ọfọn etieti ke idụt emi ekperede idụt mmọ. Ntre enye ọdọhọ ete, ‘Mmọn̄ n̄wọrọ n̄koyom utom do, ekem nyedi ndimen n̄wan ye nditọ mi.’

Patricia emi edide eyen Nigeria n̄ko oyom ndiwọrọ n̄ka idụt en̄wen. Uwem imemke ke idụt mmọ, utom inyụn̄ idụhe. Ntre enye asan̄a ye ufan esie ọkpọn̄ Nigeria aka Algeria man ekebe do aka Spain. Enye ikọdiọn̄ọke ufen emi mmọ ẹdibọde ke Desat Sahara. Enye ọdọhọ ete: “N̄kasan̄a ye idịbi, n̄konyụn̄ nyom ndiman eyen mi ke obio mfia owo man enye ọkpọbọhọ kpukpru ufen emi.”

Rachel emi edide eyen Philippines okoyom ndiwọrọ n̄ka Europe. Ẹma ẹsio enye ke utom ke Philippines, ndien mme iman esie ẹma ẹdọhọ enye ke utom ọyọyọhọ Europe. Enye ama ọbuọt okụk odụk ubomofụm adaha Europe, ọkpọn̄ ebe ye eyen isua iba, onyụn̄ ọdọhọ mmọ ete: “Ẹkûkere, nyọsọp ndimen mbufo.”

Ẹdọhọ ke se iwakde ibe miliọn owo 200 ẹwọrọ ẹka idụt en̄wen ndondo emi nte George, Patricia, ye Rachel ẹkewọrọde. Okposụkedi emi ndusụk owo ẹwọrọde ke ntak ekọn̄, oto-obot afanikọn̄, m̀mê ke ntak ukọbọ, ata ediwak owo ẹka ndiyom ebiet emi n̄kpọ ọfọnde. Nso mfịna ke mmọ ẹsisobo ke idụt emi mmọ ẹkade? Ndi n̄kpọ esitie nte mmọ ẹkekerede? N̄kpọ esitie didie ye nditọ emi ete m̀mê eka ọkpọn̄de aka un̄wana ke obio owo? Se nte ẹbọrọde mme mbụme emi.

Ata akpa mfịna esikam edi ke usụn̄ isan̄. George emi iketịn̄de iban̄a ke akpa ibuotikọ akakama ata esisịt udia aka obio owo emi oyomde usụn̄ etieti. Enye ọdọhọ ke isan̄ ama ọdiọk akakaha. Ata ediwak mbon oro ẹsikade obio owo isisịmke obio emi mmọ ẹkeyomde ndika.

Patricia okoyom ndika Spain. Enye okodụk edem ana-in̄wan̄ ubomisọn̄ ebe Desat Sahara. Enye ọdọhọ ete: “Akada nnyịn urua kiet ndito Nigeria nsịm Algeria, ndien nnyịn owo 25 ikafaha idọn̄ọ ke edem ubomisọn̄ emi. Ima ikụt ediwak okpo owo ke usụn̄, inyụn̄ ikụt ediwak owo ẹyode ke desat emi ẹbet n̄kpa edida mmimọ. Ndien ndusụk mme awat ubomisọn̄ ẹnen̄ede ẹsọn̄ esịt, ẹsion̄o ndusụk owo ke ubomisọn̄ mmọ ẹbon ke usụn̄ ẹwat n̄kpọ mmọ ẹbe.”

Isan̄ Rachel iketiehe nte eke Patricia ye eke George. Enye ama esịm ebiet emi enye akakade, okonyụn̄ okụt utom do. Ti ke enye ama adaha ọkpọn̄ ebe ye eyen isua iba ke ufọk. Itọn̄ eyen esie ama ọdọn̄ enye owot. Enye ọdọhọ ete: “Ini ekededi oro n̄kụtde nte eka eyen akamade eyen esie, esịt esibụn̄ọ mi.”

Ikememke inọ George ndimehe ye idụt emi enye akakade. Ediwak ọfiọn̄ ẹma ẹbe mbemiso enye enyene okụk ọnọ ẹka ufọk. Enye ọdọhọ ke ima isitua eyet ke ntak ndobo, ke esịt ikonyụn̄ inemke imọ.

Patricia ama edisịm adan̄a Morocco ke enye ama akabiat ediwak ọfiọn̄ ke Algeria. Enye ọdọhọ ete: “Mma mman eyen. Edi n̄kenyene ndidedịbe mbak mbon emi ẹsiyịpde iban emi ẹkade obio owo ẹmen ẹkesịn ke ufọk iban akpara ẹdikụt mi. Ekem, mma nnyene okụk ntiene ndụk ntaha ubom kiet n̄ka Spain. Ata ediwak owo ẹkedọn̄ọ ke ekpri ntaha ubom emi mînyeneke n̄kpọ ndomokiet. Ikada ikpaukot nnyịn ifop mmọn̄ ke ubom oro. Ke ima ikebehe ke Spain, n̄kenyeneke odudu ndiwọrọ ke ubom ndọk obot.”

Mbon emi ẹyomde ndika obio owo ẹkpenyene ndikere mban̄a emi ye mme mfịna en̄wen oro mmọ ẹdisobode. Ndusụk ke otu mfịna emi ẹdi ndidiọn̄ọ usem ye ido obio owo. Mfịna efen edi ebiet emi owo edidade okụk ẹkpe se ukara ẹyomde man ẹyak enye odụn̄ ke obio owo, ndien enye enyene ndiyọ kpukpru ufen emi ẹsimiade isenowo mbemiso ẹyakde mmọ ẹtiene ẹdụn̄ ke idụt en̄wen. Owo isisọpke ida mbon oro mînyeneke n̄wed ndidụn̄ ke obio owo ke utom, mmọ isisọpke inyene ufọk, m̀mê ndika eti ufọkn̄wed m̀mê ufọkibọk. Owo isiwakke ndinọ mmọ n̄wed uwat, mmọ isinyụn̄ ikemeke ndisịn okụk ke bank. Mme owo ẹsiwak nditụk nnyụn̄ ndia mmọ.

N̄kpọ en̄wen emi owo ekpekerede aban̄a edi idem okụk emi enye akade ndin̄wana. Ndi okụk enen̄ede ekeme ndinyan̄a owo? Kop item emi Bible ọnọde mi: “Kûkpa utom ndikọ inyene [m̀mê ndin̄wana okụk] . . . Koro enye iditreke nditịbe mba nte ntrukpom ndien efe ọdọk enyọn̄.” (Mme N̄ke 23:4, 5)  Kûnyụn̄ ufre ute ke se iyomde ke uwem emi ikan edi mme n̄kpọ oro owo mîkemeke ndidep ke okụk—oro edi, ima ye edidianakiet ke ubon. Esidiọk etieti ndikụt mme owo ẹmade okụk ẹkan nte ẹmade ebe, iban, m̀mê nditọ mmọ!—2 Timothy 3:1-3.

Nnyịn n̄ko imoyom Abasi. (Matthew 5:3) Abasi ọdọhọ mme ete ye eka ẹkpep nditọ Bible man mmọ ẹfiọk uduak imọ, ye nte imọ iyomde owo odu uwem. Ntem, nti ete ye eka ẹsinam kpukpru se ẹkekeme man ẹnam emi.—Ephesus 6:4.

Nsio nsio n̄kpọ ẹkeme ndiwọrọ mbon oro ẹwọrọde ẹka obio owo, edi se iketịbede inọ George, Rachel, ye Patricia oro iketịn̄de iban̄a owụt n̄kpọ kiet emi esitịbede ọnọ ediwak mmọ. Ufọk owo esitahade ke ini ete m̀mê eka ọwọrọde, ndien ndusụk ini ediwak isua ẹsibe mbemiso ofụri ufọk ẹfiakde ẹdiana kiet. Eke mme George ama ebe isua inan̄.

Rachel ama afiak edinyọn̄ Philippines man ekemen eyen esie emi enye akadahade ọkpọn̄ ke n̄kpọ nte isua ition. Patricia ama akama ekpri nsekeyen esie ke ubọk ekesịm Spain. Enye ọdọhọ ete: “Nnyeneke owo ndomokiet ke ebede enye, ntre ana ntịm nse enye enyịn.”

Edi ediwak mbon oro ẹkade obio owo isimaha ndifiak nnyọn̄, ekpedi n̄kpọ ọdiọk didie ye mmọ ke obio owo. Ediwak mmọ ẹma ẹtie ẹkere kpukpru ufen emi ikọbọde ye okụk emi ikabiatde ika obio owo, bụt isiyakke mmọ ẹfiak ẹnyọn̄ ufọk.

Allan emi otode Philippines ama enyene esịt ekem ndifiak nnyọn̄. Enye ama ekenyene eti utom ke Spain, edi ke isua kiet ye ọfiọn̄ itiokiet ama ekebe, enye ama edidaha ọnyọn̄. Enye ọdọhọ ete: “Itọn̄ n̄wan mi ye adiaha mi ama ọdọn̄ mi tutu. Mma mbiere ke ndinamke utom aba ke obio owo tutu kpukpru nnyịn iwọrọ ikodụn̄ do. Se ikonyụn̄ inamde edi oro. Mmedi ndikụt ke ubon mi edi akpan n̄kpọ akan okụk.”

Patricia ama okụt n̄kpọ en̄wen emi akande okụk. Enye ama akama ekpri Bible emi edide “Akani Testament” kpọt esịm Spain. Enye ọdọhọ ete: “N̄kada Bible emi nte n̄kpọ n̄kpemeidem. Edi mma ndinyene nneme ye mma kiet emi ekedide Ntiense Jehovah. N̄kesimaha ndineme nneme ye Mme Ntiense Jehovah. Emi akanam mbụp mma oro ata ediwak mbụme man n̄wụt enye ke se mmọ ẹkpepde idịghe akpanikọ. Edi utu ke oro, enye ama akam ada Bible ọbọrọ mme mbụme mi onyụn̄ owụt ke se mmimọ ikpepde ẹdi akpanikọ.”

Se Patricia ekekpepde ke Bible ama anam enye okụt ke idịghe okụk m̀mê obio owo anam owo okop inemesịt ke nsinsi, edi ke ndifiọk Abasi ye se enye aduakde ọnọ nnyịn anam owo okop inemesịt. (John 17:3) Patricia ama ekpep ekese n̄kpọ ke Bible ye nte ke ata Abasi ekere Jehovah. (Psalm 83:18) Enye ama okụt n̄ko ke Bible ọdọhọ ke Abasi ọmọn̄ anam Jesus Christ emi edide Edidem Obio Ubọn̄ Abasi ọnọ nnyịn kpukpru se iyoyom, ndien owo ndomokiet ididịghe ubuene aba. (Daniel 7:13, 14) Psalm 72:12, 14 etịn̄ se Jesus edinamde ete: “Enye ayanyan̄a ubuene emi esemede oyom un̄wam, ye owo ukụt ye owo ekededi emi mînyeneke andin̄wam. Enye ayafak ukpọn̄ mmọ osio ke ufịk ye afai.”

Nnyịn imesịn udọn̄ inọ fi ite ada ini ekpep Bible. N̄wed emi esịne ọniọn̄ Abasi, onyụn̄ ekeme ndin̄wam fi ọfiọk se inen̄erede idi akpan n̄kpọ ke uwem. Enye n̄ko ekeme ndin̄wam fi anam nti ubiere, ọyọ se osobode idahaemi, onyụn̄ enyene idotenyịn ke n̄kpọ ọyọfọn.—Mme N̄ke 2:6-9, 20, 21.