Ibat enan̄ukwak emi ẹkenyamde ke Italy ke 2012 ama awak akan moto. Ntak edi ke moto ọsọn̄ urua, aranuwat ọsọn̄ urua n̄ko, inyụn̄ imemke ndikama moto. Edi enan̄ukwak isọn̄ke urua, iyomke aranuwat, inyụn̄ isọn̄ke ndikama.

Ukara Armenia ẹma ẹsịn n̄kparawa 17 emi ẹdide Mme Ntiense Jehovah ke ufọk-n̄kpọkọbi sia mmọ mîkamaha ndinam utom ye mbonekọn̄. Ẹma ẹmen ikpe emi ẹka Esopikpe Europe Oro Esede Aban̄a Unen Owo, ndien esop emi ọkọdọhọ ke se ukara Armenia anamde ye n̄kparawa oro ọdiọk etieti. Ntre, esop emi ama ọdọhọ ukara Armenia ẹnọ n̄kparawa emi okụk ukotikpe, ẹnyụn̄ ẹnọ mmọ okụk ke ofụri ufen emi ẹkemiade mmọ.

Ke Japan, ẹbiat ediwak nditọwọn̄ emi ẹnyenede facebook, twitters, 2go, ye n̄kpọ ntre ke Intanet. N̄kpọ nte nditọwọn̄ 63 ke otu 100 ke ẹbiat sia mme ete ye eka mîkanamke mmọ ẹfiọk ke mme idiọkowo ẹsida n̄kpọ emi ẹbiat nditọwọn̄. Ke ini ẹkebụpde owo 599 ntak emi mmọ ẹsinamde emi, n̄kpọ nte owo 443 ẹkedọhọ ke isida ikpehe Intanet emi itap nditọwọn̄ ikadan̄.

Moto awak etieti ke China tutu ukara iyakke kpukpru mbon oro ẹdepde moto idahaemi ẹwat ke ikpọ obio. Ke uwụtn̄kpọ, kpukpru isua, ẹsiyak n̄kpọ nte mbufa moto 240,000 kpọt ẹwat ke Beijing. Ke August 2012, n̄kpọ nte owo 1,050,000 ẹkedep moto, edi ẹkeyak owo 19,926 kpọt ẹwat.