AN̄WA esinen̄ede okụt usụn̄ okoneyo. N̄kaminua esinam an̄wa ọdiọn̄ọ ini emi enye asan̄ade ekpere n̄kpọ, enye esinyụn̄ anam an̄wa ekeme ndimụm n̄kpri unam eken nta, akpan akpan ke okoneyo.

Kere ise: Enyene n̄kpọ emi odude ke ebiet emi n̄kaminua an̄wa esitịbede emi esinamde an̄wa ọfiọk se ikade iso. N̄kpọ emi esin̄wam enye, ekpededi ata ekpri ofụm otụk n̄kaminua esie. Emi esinam an̄wa ọdiọn̄ọ ebiet emi n̄kpọ anade ke usụn̄, idem ke ini enye mîkwe n̄kpọ oro ke ntak ekịm.

Udomo ofụm emi otụkde n̄kaminua an̄wa ke an̄wa esida ọdiọn̄ọ ebiet emi n̄kpọ odude. Kpa n̄kaminua emi ke enye esida odomo ese m̀mê ebiet emi imọ iyomde ndibe okpon ekem se ibede. Encyclopædia Britannica ọdọhọ ke owo ifiọkke ofụri se n̄kaminua an̄wa esinamde ọnọ an̄wa, edi ke imọdiọn̄ọ ke ndisịbe n̄kaminua an̄wa onyụn̄ etie nte owo ndibụn̄ inuen mba.

Ntaifiọk ke ẹbot ukwakutom emi ekemede ndinam ukem se n̄kaminua an̄wa esinamde. Mmọ ẹsịn n̄kpọ emi esinamde ukwakutom emi okûwat ọkọtọ n̄kpọ ke ini enye asan̄ade anam utom emi owo akpanamde. Ali Javey emi edide ataifiọk ke Ufọkn̄wed Ntaifiọk California emi odude ke Berkeley ọdọhọ ke ẹkeme ndisịn ukem n̄kpọ emi ke mme ukwakutom en̄wen emi ẹsidade ẹnam nsio nsio n̄kpọ.

Afo ekere didie? Ndi an̄wa emi enyenede utọ n̄kaminua emi okofoforo? Mîdịghe ndi ẹkebobot enye?