Afo ndisụk ntọhọ ye n̄wan m̀mê ebe fo mma edi oro. Afo obụp idemfo ete: ‘Ntak n̄kpekpede enye ubọk? Idịghe ami n̄kọtọn̄ọ ikọ nan̄a!’

Esịt iyatke fi aba nte akayatde, edi n̄kpọ emi osụk afafịna mbufo mbiba. Afo ekere ke akpana ikpe enye ubọk, edi enen̄ede ọsọn̄ fi ndinam ntre.

Ntan̄idem. Ebe kiet emi ekerede Charles * ọdọhọ ete: “Ndusụk ini, ntan̄idem isiyakke n̄kpe n̄wan mi ubọk.” Edieke atan̄de idem, emi idiyakke enyịme ke ama edue.

Se afo ekerede. Emekeme ndikere ke owo emi akanamde ndudue edi n̄kukụre owo emi ekpekpede ubọk. Mma kiet emi ekerede Jill ọdọhọ ete: “Edieke ndiọn̄ọde ke ami n̄kada mfịna ndi, isisọn̄ke mi ndikpe ebe mi ubọk. Edi edieke edide nnyịn mbiba ikedue, esisọn̄ mi ndikpe ubọk. Ntak n̄kpekpede enye ubọk ke ini edide nnyịn mbiba isịn se inade emi?”

Edieke n̄wan ekerede ke mfịna okoto ebe, ebe ekere ke oto n̄wan, ekeme ndisọn̄ mmọ ndikpe kiet eken ubọk. Ebe kiet emi ekerede Joseph ọdọhọ ete: “Edieke ekerede ke mfịna ikotoho fi, udûmaha ndikpe ubọk mbak iditie nte ke ama edue.”

Se afo ekekpepde ke ufọk. Ekeme ndidi mbufo ikesiwakke ndikpe owo ubọk ke ufọk mbufo. Edieke ekedide ntre, ọwọrọ owo ikekpepke fi ndisinyịme ndudue fo. Sia mûkusuwakke ndikpe owo ubọk ke ini eyenọwọn̄, idahaemi ama okokpon owo mi, ọsọsọn̄ fi ndisikpe owo ubọk.

Kere nte editiede n̄wan m̀mê ebe fo ke idem. Ndi emeti nte ekenemde fi ke ini owo ekekpede fi ubọk? Nam etiene enem n̄wan m̀mê ebe fo n̄ko. Ọkpọkọm ekere ke ukûduehe, sụk kpe enye ubọk sia edide esịt ama ayat enye. Ekeme ndidi se akanamde ama abiak enye, okposụkedi emi mûkokoho-koi unam, edi sụk kpe enye ubọk. Edieke anamde ntre, esịt oyosụhọ enye.—Se se Bible etịn̄de ke Luke 6:31.

Kere ban̄a ndọ mbufo. Kûkere ke n̄kpeubọk edibabiat n̄kpọ inọ fi; n̄kpeubọk edikam inanam ndọ mbufo ọfọn. Edieke mûkpehe ubọk onyụn̄ ayakde esịt aka iso ayat n̄wan m̀mê ebe fo, enye editie nte “ọkpọsọn̄ obio” emi ọsọn̄de ndibe ndụk. (Mme N̄ke 18:19) Mbufo idikemeke ndidu ke emem, sia enye n̄ko edikere ke idịghe imọ ikpekpe fi ubọk. Edi edieke ọsọpde ekpe enye ubọk, udûyakke mfịna oro aman se ikponde ikan oro. Emi owụt ke uyomke n̄kpọ ndomokiet abiat ndọ mbufo.—Se se Bible etịn̄de ke Philippi 2:3.

Sọsọp kpe ubọk. Imọdiọn̄ọ ke isimemke utom ndikpe ubọk edieke mfịna mîtoho fi ikpọn̄. Edi ifọnke ayak ndudue an̄wan m̀mê ebe fo anam akanam se mûkpanamke. Ntre, kûdọhọ ke imọ idikpehe enye ubọk, ke enye eyefre aban̄a se iketịbede nte ini akade. Afo ndikpe enye ubọk ayanam emem utom ọnọ enye nditiene n̄kpe fi ubọk. Edieke anamde ntem ke ubọk ke ubọk, idisọn̄ke fi ndisikpe owo ubọk.—Se se Bible etịn̄de ke Matthew 5:25.

Wụt ke ekpe ubọk ke ofụri esịt. Nditịn̄ ikọ nnyan̄a idem idịghe n̄kpeubọk. Edieke ọdọhọde enye isa isa ete, “Ihih, utọ ekpri n̄kpọ oro ke afo ayat esịt ntre,” idịghe n̄kpeubọk edi oro. Edide ekere ke ikpakanaha enye ayat esịt m̀mê ukereke, nyịme ke ama etiene edue nyụn̄ kpe enye ubọk sia esịt ama ayat enye.

Kûnam nte inyeneke se iketịbede. Sụhọde idem nyịme ke afo n̄ko emekeme ndinam ndudue, sia idụhe eke ọfọnde ama. Idem ọkpọkọm ekere ke inyeneke se akanamde edue, ti ke ekikere idemfo edi oro; ekeme ndidi enyene mme n̄kpọ emi afo mûtịghi. Bible ọdọhọ ete: “Owo emi ebemde iso etịn̄ ikọ ke itie ikpe edi edinen; nsan̄a esie odụk edi onyụn̄ odụn̄ọde enye ese.” (Mme N̄ke 18:17) Edieke mûdaha idem ke n̄kpọ ukaha onyụn̄ enịmde ke emekeme ndinam ndudue, eyesisọp ndikpe owo ubọk.